விவேக்கின் காமெடி பார்ட்னர்..தனித்துவ நடிப்பால் ரசிகர்களை சிரிக்க வைத்த காமெடியன் வையாபுரி

நடிப்பு பயணம்

தேனி மாவட்டத்தை சேர்ந்த வையாபுரி ஒரிஜினல் பெயர் ராமகிருஷ்ணன் ஆகும். சினிமா நடிகராக வேண்டும் என்ற ஆசையில் 1980களின் இறுதியில் சென்னைக்கு வந்துள்ளார். சினிமாவில் எந்த பேக்கிரவுண்டும் இல்லாத நிலையில் ஹோட்டலில் வேலை பார்த்து கொண்டே வாய்ப்புகளை தேடினார். இவரது ஒல்லியான தோற்றம் காரணமாக ஏராளமான வாய்ப்புகள் மிஸ்ஸான நிலையில், தூர்தர்ஷனில் ஒளிபரப்பான மறைந்த எழுத்தாளர் சுஜாதாவின் கொலையுதில் காலம் தொடரில் சிறிய வேடத்தில் நடிக்கும் வாய்ப்பு கிடைத்தது.

இதன்பின்னர் பாரதிராஜா இயக்கத்தில் 1994இல் வெளியான கருத்தம்மா படத்தில் சிறிய ரோலில் தோன்றிய இவர், தொடர்ந்து நெப்போலியன் நடித்த மணிரத்னம், செல்லக்கன்னு போன்ற படங்களில் வந்து போயுள்ளார்.

விவேக் - வையாபுரி காம்போ

வையாபுரி சினிமா கேரியரில் திருப்புமுனை ஏற்படுத்தியதில் மறைந்த நடிகர் விவேக்கின் பங்கு அளப்பரியது. இளையராகம் என்ற படத்தில் காமெடியானாக வரும் விவேக், வையாபுரி காம்போவாக வைத்து காமெடியில் கலக்கியிருப்பார். இதன் பிறகு மக்கள் மனதில் கவனம் பெறு நடிகரான வையாபுரிக்கு திருப்பம் தந்த படமாக பாலுமகேந்திரா இயக்கிய ராமன் அப்துல்லா படம் அமைந்தது.

கவுண்டமணி, செந்தில் காம்பினேஷனுக்கு பிறகு அப்போது காமெடியன்களாக உருவெடுத்து வந்தி விவேக், வடிவேலு ஆகியோருடன் இணைந்து துணை காமெடியனாக பல படங்களில் நடித்திருப்பார் வடிவேலு. குறிப்பாக விவேக்குடன் இணைந்து 40க்கும் மேற்பட்ட படங்களில் நடித்திருக்கும் வையாபுரி, பல்வேறு விதமான காமெடியில் பட்டையை கிளப்பியிருப்பார்.

கமல் படங்களின் ஆஸ்தான நடிகர்

முதல் முறையாக கமல்ஹாசனின் அவ்வை சண்முகி படத்தில் சிறிய வேடத்தில் நடித்திருப்பார் வையாபுரி. அவரது நடிப்பு திறமை, உடல் வாகு, டயலாக் டெலிவரி போன்றவற்றால் வெகுவாக கவர்ந்த கமல் தனது படங்களில் வையாபுரிக்கு என்ற காமெடி அல்லது குணச்சத்திர கதாபாத்திரங்களை வைத்திருந்தார். அப்படி கமலுடன் இணைந்து காதலா காதலா, ஹேராம், பம்மல் கே சம்மந்தம், வசூல் ராஜா எம்பிபிஎஸ் என தற்போது கமல் நடித்து வரும் தக்லைஃப் வரை அவரது ஆஸ்தான நடிகராக இருந்து வருகிறார். கமலின் மும்பை எக்ஸ்பிரஸ் படத்தில் சோலோ காமெடியனாக கலக்கியிருப்பார்.

கமலை போல் அஜித், விஜய் ஆகியோர் முன்னணி ஹீரோக்களாக உருவெடுத்த காலகட்டத்தில் அவரது படங்களில் தவறாமல் இடம்பெறும் காமெடியனாக இருந்துள்ளார்.

நினைவில் நிற்கும் கதாபாத்திரங்கள்

என்னதான் துணை காமெடியனாகவும், காமெடி கதாபாத்திரங்ளில் ஒருவராக நடித்திருந்தாலும் பல படங்களில் தனது சோலோ பெர்பார்மென்ஸ் மூலமும் ரசிகர்களை வெகுவாக கவர்ந்திருக்கிறார் வையாபுரி. அந்த வகையில் விஜய்யின் துள்ளாத மனமும் துள்ளும் படத்தில் கல்யாணசுந்தரம் என்ற கதாபாத்திரத்தில் திருநங்கையாக தோன்றி சிறப்பான நடிப்பை வெளிப்படுத்தியிருப்பார். இதன் பின் பெண்ணின் மனதை தொட்டு படத்தில் வாய் பேச முடியாதவர் வேடத்தில் தோன்றியிருந்தாலும் எமோஷனலான நடிப்பை வெளிப்படுத்தி ஸ்கோர் செய்திருப்பார்.

அதேபோல் அர்ஜுன் நடித்த ரிதம் படத்தை குடை வியாபாரியாக தமிழ் நண்டு கதை காமெடி மூலம் ரசிக்க வைத்திருப்பார். காமெடி கதாபாத்திரத்தில் மட்டுமல்லாமல் கடந்த ஆண்டு வெளியான லியோ படத்தில் ஜோதிடராக திருப்பம் தரும் கேரக்டரில் தோன்றியிருப்பார். இதுபோல் பல்வேறு நினைவில் நிற்கும் கதாபாத்திரங்களில் தோன்றி தனது நடிப்பு திறமையை வெளிக்காட்டியிருப்பார்.

பிக்பாஸில் வையாபுரி

தமிழில் முதல் பிக்பாஸ் நிகழ்ச்சி 2017இல் ஒளிபரப்பானது. இதில் போட்டியாளராக பங்கேற்ற வையாபுரி 84 நாள்கள் பிக்பாஸ் வீட்டில் இருந்த நிலையில், பொதுமக்கள் வாக்குகளின் மூலம் வெளியேற்றப்பட்டார்.

இந்த நிகழ்ச்சியில் காமெடி, செண்டிமென்ட், அழுகை என பல்வேறு எமோஷன்களை வெளிப்படுத்தி பார்வையாளர்களை கவர்ந்தார். அத்துடன் சன்டிவி, ஜீ தமிழ் தொலைக்காட்சிகளில் ஒளிபரப்பாகும் சீரியல்களிலும் நடித்துள்ளார்.