‘சூர்யா வீட்டுப்பக்கத்துல வணங்கான் போஸ்டர ஒட்டாதீங்கன்னு பாலா.. அப்படியே அதிர்ச்சியாகிட்டேன்’ - சுரேஷ் காமாட்சி!

நல்ல புரிதல்

இது குறித்து சுரேஷ் காமாட்சி ரெட் பிக்ஸ் யூடியூப் சேனலுக்கு அளித்த பேட்டியில், ‘சூர்யா சாருடன் ஏன் வணங்கான் படத்தில் இணைந்து பணியாற்ற வில்லை என்று பாலா அண்ணனிடம் நான் ஒரு வார்த்தை கூட கேட்கவில்லை.

ஆனால், சூர்யா சாருக்கும் பாலா அண்ணனுக்கும் நல்ல புரிதல் இருக்கிறது என்பது மட்டும் எனக்குத்தெரியும்; இப்போதும் அந்த புரிதல் இருக்கிறது. பாலாவுடன் பணியாற்றிய பல நடிகர்கள் இருக்கிறார்கள். இவர்கள் எல்லோரையும் விட பாலா அண்ணனுக்கு, சூர்யா சாரின் மீது அக்கறை அதிகம்.

சின்ன கோரிக்கை

ஒரு முறை பாலா அண்ணன் என்னை தொடர்பு கொண்டு, ஒரு சின்ன கோரிக்கை என்றார். உடனே, நான் என்ன கோரிக்கை என்று கேட்டேன். அப்போது அவர், வணங்கான் படத்தின் போஸ்டர்களை சூர்யா சாரின் வீடு மற்றும் அலுவலகம் இருக்கும் பகுதிகளில் மட்டும் ஒட்டவேண்டாம் என்றார். அதைக் கேட்டவுடன் எனக்கு அதிர்ச்சியாக இருந்தது.

காரணம் என்னவென்றால், அவருக்கும் இவருக்கும் எந்த பிரச்சினையும் இல்லை என்றுதான் படத்தை கமிட் செய்தோம். இவர் சொல்வதை பார்த்தால், வேறு ஏதேனும் ஒப்பந்த ரீதியாக பிரச்சினைகள் இருக்குமோ என்ற சந்தேகம் வந்தது. ஆனால், நான் பாலா அண்ணனிடம் பேசும் முன்னரே, போஸ்டர்களை ஒட்டச் சொல்லி ஆட்களை அனுப்பிவிட்டேன்.

சூர்யா வீட்டருகே போஸ்டர் வேண்டாம்

ஆனாலும், இவரிடம் சரி அண்ணன் என்று கூறி விட்டு விட்டேன். ஒரு வேளை போஸ்டர் ஒட்டப்பட்டால், அவர்கள் ஒட்டி விட்டார்கள் என்று சொல்லிக்கொள்ளலாம் என்று நினைத்தேன். இருந்தாலும், ஏ.எல். விஜய்க்கு போன் செய்து காரணத்தைக் கேட்ட போது, பாலா அண்ணன் சூர்யா சாருக்கு ஒரு சின்ன வருத்தம் கூட வந்து விடக்கூடாது என்று நினைக்கிறார்.

ஒருவேளை சூர்யா சார் போஸ்டரை பார்க்கும் பட்சத்தில், நாம் செய்ய இருந்த படம், தற்போது வேறு ஒருவர் செய்திருக்கிறாரே என்று நினைத்து விடக்கூடாது என்பதற்காகத்தான் அப்படி சொல்லி இருக்கிறார் என்றார். ஒரு மனிதரை பாலா இவ்வளவு மதிக்கிறாரே என்று கூறி, போஸ்டர் ஒட்டுபவருக்கு போன் செய்து சூர்யா சாரின் வீடு இருக்கும் பகுதிகளில் போஸ்டரை ஒட்ட வேண்டாம் என்று கூறினேன். ஆனால் நான் கூறுவதற்கு முன்னரே பாலா அண்ணன் அவனுக்கு வாய்ஸ் மெசெஜ் அனுப்பிவிட்டார்’ என்று கூறினார்.

பொறுப்புத் துறப்பு:

இந்தக் கட்டுரையில் உள்ள எந்தவொரு தகவல்/பொருள்/அல்லது நம்பகத்தன்மைக்கு எந்த விதமான உத்தரவாதமும் இல்லை. இதில் குறிப்பிடப்பட்டுள்ள தகவல்கள் அனைத்தும் பல்வேறு ஊடகங்களில் இருந்து சேகரித்து, உங்களுக்குத் தரப்பட்டுள்ளது. எங்கள் நோக்கம் தகவல்களை வழங்குவது மட்டுமே. இதிலிருந்து வெறும் தகவல்களை மட்டுமே பயனாளர்கள் எடுத்துக்கொள்ள வேண்டும். மற்றபடி இதிலிருந்து பயன்படுத்திக்கொள்வது பயனாளரின் பொறுப்பாகும்.