26 Years of Veera Thalattu: சொத்துக்கு ஆசைபட்டு தம்பியைக் கொல்லும் அண்ணன்.. சிதறும் குடும்பங்கள் இறுதியில் என்ன ஆனது?

வீரத்தாலாட்டு திரைப்படத்தின் கதை என்ன?

கிராமத்தில் வசிக்கும் ஆதரவற்ற இளைஞர் பாண்டியன். பாண்டியனை சிறுவயதில் இருந்து வளர்த்து வருகிறார், நாகலட்சுமி. இதற்கிடையே பாண்டியனை அவ்வூரைச் சேர்ந்த கிராமத்து பெண்மணி விரும்புகிறார். அவரது தந்தையாக சுந்தர்ராஜனும் அப்பெண்ணின் பாட்டியாக மனோரமாவும் நடித்துள்ளனர். இதற்கிடையே சம்பந்தம் பேசுகையில், அப்பெண்ணின் தாய், பாண்டியனுக்குத் தந்தை யார் எனக் கேள்வி கேட்கிறார். இதனால் ஆத்திரம் அடையும், பாண்டியன், தனது தாய் நாகலட்சுமியிடம் தனது தந்தை குறித்து கேட்கிறான். அப்போது நாகலட்சுமியின் வீட்டில், சிறுசிறுவேலைகள் செய்துகொண்டு தங்கி இருக்கும் ராதாரவி, அப்போது பாண்டியனின் உண்மையான தாய் பற்றியும், அவரது தந்தை பற்றியும் கூறுகின்றார்.

இதனையறிந்த பாண்டியன் சிறையில் சென்று தனது அம்மாவை பார்க்கின்றான். சிறைவாசம் முடித்து வெளியில் வந்தவுடன் ராதிகாவின் உண்மையான அண்ணன் ராதா ரவி எனத்தெரிகிறது.

அதன்பின் ராதிகா, தனது மகனிடம் நாம் யார் என்பதை விளக்குகிறார். கதை ஃப்ளாஷ் பேக்குக்கு செல்கிறது. பாண்டியனின் தந்தையாக ராஜ் கிரணும், தாயாக ராதிகாவும் இருக்கின்றனர். ராஜ்கிரண் அவ்வூரில் பெரியகுடும்பத்தைச் சார்ந்தவர். ராஜ்கிரணும் ராதிகாவும் காதல் திருமணம் செய்துகொண்டு, அவரது வீட்டுக்குச் செல்லும்போது, அவரின் அண்ணியான நாகலட்சுமி, தனது கணவரிடம்(சந்தான பாரதி) பேசி, தம்பியின் சொத்துகளைப் பிரித்து எழுதிக் கொடுத்துவிடுகிறார்.

பின், ராஜ்கிரண் முழுக்க விவசாயியாகவும், அவரது அண்ணன் சந்தானபாரதி ஊதாரியாகவும் மாறுகின்றனர். எப்படியாவது, தம்பி ராஜ்கிரணின் சொத்தைப் பறிக்க நினைத்த அண்ணன்,அவரை ஆள் வைத்துக்கொல்கிறார். அதைத் தடுக்கும் ராதிகா, சிறைக்குச் செல்கிறார். இவ்வாறு கதை ஃபிளாஷ் பேக் முடிகிறது.

 தங்கை வெளியில் வந்ததும், சந்தானபாரதியைப் போய் நேரில் சந்தித்து எச்சரித்து வருகிறார், ராதா ரவி. அப்போது கொல்லப்படுகிறார்.

இறுதியில் பாண்டியன் தனது தாய் மாமாவைக் கொன்றும், தனது தந்தையைக் கொன்றும் சொத்துகளை அபகரித்த பெரியப்பா சந்தான பாரதியை கொல்ல முற்படுகிறார். இறுதியில் சந்தானபாரதி, ராதிகாவின் காலில் விழுந்து உயிர் பிச்சைக் கேட்க, அவரை மகன் பாண்டியனிடம் மன்னிக்கச்சொல்கிறார். பாண்டியனும் மன்னித்துவிடுகிறார். அப்படியே படம் முடிகிறது.

இப்படத்தில் பாண்டியனாக முரளியும், பாண்டியனை விரும்பும் பெண்ணாக வினிதாவும் பாண்டியனின் வளர்ப்புத்தாய் நாகலட்சுமியாக லட்சுமியும் நடித்துள்ளனர். பாண்டியனின் நிஜ தாயாக ராதிகாவும், அவரது நிஜ தந்தையாக ராஜ்கிரணும் நடித்துள்ளனர். பாண்டியனின் பெரியப்பாவாக சந்தானபாரதி நடித்திருக்கிறார். பாண்டியனை ஒருதலைப் பட்சமாக காதலிக்கும் பெண்ணாக குஷ்பூ நடித்துள்ளார். 

இப்படத்தை கதை, திரைக்கதை,வசனம், எழுதி இயக்கி, தயாரித்தது மட்டுமல்லாமல் அனைத்துப் பாடல்களையும் எழுதி ஹிட் கொடுத்திருந்தார், கஸ்தூரி ராஜா. 

'கதைபோல தோணும் இது கதையும் அல்ல’, ’வாடிப்பட்டி மாப்பிள்ளை உனக்கு வாக்கப்பட்டு’,’படிக்கட்டுமா படிக்கட்டுமா தெக்குத்திசை பாட்டு ஒன்னு’, ‘சாந்துபொட்டும் சந்தானப்பொட்டும்’, ‘கும்பாபிஷேக கோயிலுக்குத்தான் குப்பம்மா எடுத்தால் மாவிளக்குத்தான்’, ‘ஆளப்பிறந்த மகராசா.. மகராசா’, கிளியபோல, அம்மன்கோயில், ஆராரோ ஆகிய எட்டு பாடல்களை இளையராஜாவின் இசையில் எழுதியிருந்தார், கஸ்தூரி ராஜா. இதில் ஐந்து பாடல்களாவது சிறுநகரம் மற்றும் கிராமப்பகுதி மக்களை வெகுவாகக் கவர்ந்தது எனலாம். அதாவது, பி மற்றும் சி சென்டரில் இப்பாடல்கள் இன்றும் திருவிழா மற்றும் விஷேச வீடுகளில் ஒலிபரப்பாகிவருகிறது. கமர்ஷியலாக ‘வீரத்தாலாட்டு’ ஹிட் படம். பாடல்களும் இனிமையாக இருக்கும்.

படம் வெளியாகி 26ஆண்டுகளை நிறைவு செய்தாலும் இன்று டிவியில்போட்டாலும், ‘வீரத்தாலாட்டு’படத்தை ரசிக்கலாம்.