HBD Santhosh Narayanan : கோலிவுட்டின் கானா #சநா.. மெலடி, துள்ளல் எதுவாகயிருந்தாலும் இவர் தான்..சநா பிறந்தநாள் இன்று!
தனித்துவமான தனது இசையால் ரசிகர்களின் மனதை கவர்ந்த சந்தோஷ் நாராயணன் இன்று (மே 15) தனது பிறந்த நாளைக் கொண்டாடுகிறார்.
பொறியியல் முடித்த பட்டதாரியான சந்தோஷ் நாராயணன் இசை அமைப்பாளராக வேண்டும் என்ற கனவுடன் பல இசையமைப்பாளர்களிடம் இசை பொறியாளராக பணியாற்றி உள்ளார் சந்தோஷ் நாராயணன். அந்த வகையில் ஏ ஆர் ரஹ்மானிடம் குரு திரைப்படத்தில் சில பாடல்களில் பணியாற்றிய சந்தோஷ் நாராயணன். இதுவரை 40க்கும் மேற்பட்ட திரைப்படங்களுக்கு இசையமைத்துள்ள சந்தோஷ் நாராயணன் அனைத்து திரைப்படத்திலும் பெயர் சொல்லும்படியான வெற்றியை பதிவு செய்துள்ளார்.
2012-ல் வெளியான இயக்குநர் பா.ரஞ்சித்தின் அட்டகத்தி படத்தின் மூலம் திரைப்பட இசையமைப்பாளராக அறிமுகமானார். அந்தப் படத்தில் அனைத்துப் பாடல்களும் ஹிட். ஆடி போனா ஆவணி போன்ற ஆட்டம்போட வைக்கும் ஒரு வைப் பாடல்கள் கொடுத்த அவர் ஆசை ஓர் புல்வெளி என மென்மையான மெலடி பாடல்கள் கொடுத்து மனதை கொள்ளையடித்து இருப்பார்.
அதே ஆண்டு வெளியான கார்த்திக் சுப்புராஜின் பீட்சா படத்துக்கும் சந்தோஷ் நாராயணன் இசையமைத்தார். அடுத்தடுத்த ஆண்டுகளில் வெளியான சூது கவ்வும், குக்கூ போன்ற படங்கள் அவரை அடுத்த கட்டத்துக்குக் கொண்டு சென்றன. குறிப்பாக குக்கூ படம் வெற்றி பெற்றதற்கு அதன் இனிமையான பாடல்களுக்கு முக்கியப் பங்கு உண்டு. அப்படிப்பட்ட படத்துக்கேற்ற மண் மனம் சார்ந்த இசையைத் தந்திருந்தார் சந்தோஷ் நாராயணன்.
குக்கூ படத்தில் இவரின் பாடல்கள் சில
“மனசுல சூரக் காத்தே அடிக்குது காதல் பூத்தே
மனசுல சூரக் காத்தே அடிக்குது காதல் பூத்தே
நிலவே சோறூட்டுதே கனவே தாலாட்டுதே
மின்னல் ஓசையும் காதிலே கேட்குதே
உந்தன் வாசனை வானவில் காட்டுதே” இந்த பாடல் இன்றும் பேருந்து பயணங்கள், ரயில் பயணங்கள் என எங்கு சென்றாலும் பலர் விரும்பி கேட்கும் பாடலாக இருக்கிறது.
இதேபடத்தில் இடம்பெற்றுள்ள மற்றொரு பாடல்,
“ஆகாசத்த நான் பாக்குறேன்
ஆறு கடல் நான் பாக்குறேன்
கண்ணால எதையும்
காணாத இவதான்
கண்ணீரப் பாத்தேனே
இனி என்னோட அழக
பொன்னான உலக
உன்னால பாப்பேனே” மனதை மயக்கும் இப்பாடல் தந்து அசத்தி இருப்பார்.
இயக்குநர்களான ரஞ்சித், கார்த்திக் சுப்புராஜ், ராஜுமுருகன், நலன் குமாரசாமி, மாரி செல்வராஜ் ஆகியோருக்கும் ஆஸ்தான இசையமைப்பாளராக இருக்கிறார் சந்தோஷ் நாராயணன்.
சூது கவ்வும், எனக்குள் ஒருவன், காதலும் கடந்து போகும்,பரியேறும் பெருமாள் என இப்படிப்பட்ட படங்களுக்கு சந்தோஷின் இசை பெரும் ஈர்ப்பு சக்தியாக இருந்துள்ளன.
பரியேறும் பெருமாள் படத்தில் இடம்பெற்றுள்ள இந்த பாடல்
“ரெக்கை வெச்சான்
வானத்தை அள்ள
கத்தி நின்னேன் கரணம் இல்ல
ஓரம் நிக்க தேவை இல்ல
ஓட பக்கம் புல் காஞ்சதில்ல
ஓசை இப்போ எருது
காத்தில் மெல்ல” இது நாம் அனுபவிக்காத ஒரு வித்தியாசமான உணர்வை கொடுக்கும்.
அதேபோல் சூப்பர் ஸ்டார் ரஜினிகாந்துக்கு கபாலி, காலா, விஜய்க்கு பைரவா, தனுஷுக்கு கொடி, வடசென்னை என சந்தோஷின் இசை அந்த நடிகர்களின் ரசிகர்கள் கொண்டாடும் வகையில் பாடல்கள் கொடுத்து இருப்பார்.
பெரும்பாலான பாடல்கள் இணையத்தில் கோடி பார்வையாளர்களை கடந்து சென்று கொண்டிருக்கிறது. குறிப்பாக மேகமோ அவள், கண்ணம்மா, ஆகாயம் தீப்பிடிச்சா மற்றும் பல பாடல்கள் மக்கள் மத்தியில் ஒரு தனி இடம் பிடித்துள்ளது. இதில் குறிப்பாக 2016 ம் ஆண்டு உதயநிதி ஸ்டாலின் நடிப்பில் வெளியான மனிதன் படத்தில் இடம் பெற்றுள்ள அவள் பாடல் சமீபத்தில் ரசிகர்கள் மத்தியில் மிக பிரபலமாக ஓடிக் கொண்டிருக்கிறது.
சந்தோஷ் நாராயணன் இசையில் பாடலாசிரியர் விவேக் எழுதி காதல் பாடலாக உருவாகிய அவள் பாடல் வெளியான அன்றே நல்ல வரவேற்பை பெற்றது. பின் ஏழு வருடங்கள் கழித்து தற்போது அந்த பாடல் மிகப்பெரிய அளவு வரவேற்பை பெற்று வருகிறது. இதே போல 2016 ல் வெளிவந்த இறைவி படத்தில் இடம்பெற்ற பாடல்
”கண்ணக் காட்டி
முறைச்சா ஒத்த வாட்டி
சிாிச்சாப் போதும் சொச்ச
காலம் இனிக்கும் பச்ச
வாழை துளிா்க்கும் நேரம்” என்ற பாடலும் மீண்டும் செம ட்ரெண்டானது.
தனுஷின் கர்ணன் படத்திலிருந்து வெளியான கண்டா வரச்சொல்லுங்க.. கர்ணனை கையோட கூட்டி வாருங்க என்று கிடக்குழி மாரியம்மாளின் நாட்டுப்புறக் குரலோடு சேர்ந்து தனது இசையையும் குரலையும் சேர்த்து உயிரூட்டுகிறார் சந்தோஷ் நாராயணன். கும்மிருட்டில் பறையிசை அதிர பாடல் பதிவை நடத்தி பாராட்டுகளை குவித்தார் சந்தோஷ் நாராயணன்.
இசை குறித்த தனித்தன்மை வாய்ந்த அணுகுமுறையால் ரசிகர்களின் மனதை கவர்ந்த சந்தோஷ் நாராயணன் இன்று (மே 15) தனது பிறந்த நாளைக் கொண்டாடுகிறார். அவருக்கு பிறந்தநாள் வாழ்த்துக்கள். இவரின் பாடல்களில் உங்களுக்கு பிடித்தது எது?
தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
டாபிக்ஸ்