தமிழ் சினிமா ரீவைண்ட்: பாலசந்தர் - பாரதிராஜா இணைந்து நடித்த ஒரே படம்! ஏப்ரல் 23 முந்தைய ஆண்டுகளில் ரிலீசான படங்கள்
ஏப்ரல் 23ஆம் தேதியில் முந்தைய ஆண்டுகளில் மாதவன் நடித்த ஆக்சன் த்ரில்லர் படம் தவிர பெரிய ஹீரோக்கள் படங்கள் எதுவும் வெளியாகவில்லை. இயக்குநர் சிகரம் பாலசந்தர் - இயக்குநர் இமயம் பாரதிராஜா இணைந்து நடித்த ஒரே படம் வந்துள்ளது. இந்த நாளில் முந்தைய ஆண்டுகளில் வெளியாகி கவனம் ஈர்த்த படங்களை பற்றி பார்க்கலாம்
ஏப்ரல் 23, 2025க்கு முன், இதே தேதியில் முந்தைய ஆண்டுகளில் மாதவன் நடித்த ஆக்சன் த்ரில்லர் படமான எதிரி, இயக்குநர் சிகரம் பாலசந்தர் - இயக்குநர் இமயம் பாரதிராஜா இணைந்து நடித்த ரெட்டைச்சுழி போன்ற படங்கள் வெளியாகியுள்ளன. இந்த படங்கள் பற்றிய சுவாரஸ்ய விஷயங்களை ரீவைண்ட் செய்து பார்க்கலாம்
ரெட்டைச்சுழி
தாமிரா இயக்கத்தில் மறைந்த இயக்குநர் சிகரம் கே. பாலசந்தர், இயக்குநர் இமயம் பாரதிராஜா, நடிகர் ஆரி அர்ஜுனன், அஞ்சலி பிரதான கதாபாத்திரத்தில் நடிக்க ட்ராமா பாணியில் உருவாகி 2010இல் வெளியான படம் ரெட்டைச்சுழி. கிராமத்து பின்னணியில் உருவாகியிருந்த இந்த படம் தமிழ் சினிமாவின் இரண்டு ஜாம்பவான் இயக்குநர்கள் இணைந்து நடித்த படமாக இருந்ததால் எதிர்பார்ப்பை ஏற்படுத்தியது. ஆனால் வலுவான திரைக்கதை, சுவாரஸ்யமான காட்சிமைப்புகள் இல்லாத காரணத்தால் எதிர்மறை விமர்சனத்தை எதிர்கொண்டது.
இயக்குநர்கள் பாலசந்தர், பாரதிராஜா கதாபாத்திர படைப்பும், அவர்களது நடிப்பு சிறப்பாக இருந்தபோதிலும் திரைக்கதை ரசிக்கும் படியாக இல்லாமல் படம் தோல்வியை தழுவியது. இந்த இரண்டு இயக்குநர்கள் இணைந்து நடித்த முதலும், கடைசியுமான படமாக இது அமைந்தது.
எதிரி
கே.எஸ். ரவிக்குமார் இயக்கத்தில் மாதவன், சதா, விவேக், ரஹ்மான், டெல்லி கணேஷ், கனிகா பிரதான கதாபாத்திரங்களில் நடிக்க காமெடி கலந்த ஆக்சன் த்ரில்லர் பாணியில் உருவாகி 2004இல் வெளியான படம் எதிரி. முதல் பாதி முழுக்க காமெடி, இரண்டாம் பாதியில் ஆக்சன் என்கிற பேக்கேஜில் அமைந்திருந்த இந்த படம் சிறந்த பேமிலி எண்டர்டெயினராக இருந்தது. மாதவன் - விவேக் காம்போவின் காமெடிக்கள் வயிற்றை புண்ணாக்கும் விதமாக இருந்தன. பாட்டில் மணி என்ற கேரக்டரில் போலி ரவுடியாகவும், பின்னர் காதலியை காப்பற்றும் கேரக்டரிலும் மாதவன் தோன்றியிருப்பார்.
மாதவன் நடித்த மாஸ் படமாகவும் அமைந்த எதிரி ஹிட் படமாகவும் மாறியது. யுவன் ஷங்கர் ராஜா இசையில் சைதானே, முதல் முதலாக, இச்சு தாறியா, காதல் வந்து தீண்டும் போது போன்ற பாடல்கள் அந்த காலகட்டத்தில் ரீப்பீட் மோடில் கேட்கப்பட்டன. யுவன் ஷங்கர் ராஜா பீக்கில் இருந்த போது வந்த எதிரி படத்தின் பாடல்கள் தற்போது Underrated எனவும் கொண்டாடப்பட்டு வருகிறது. இந்த படம் ரஹ்மானுக்கு கம்பேக்காக அமைந்த நிலையில், படத்தில் அவர் வில்லனாக சிறப்பான நடிப்பை வெளிப்படுத்தியிருப்பார். இந்த படம் தெலுங்கில் ரீமேக் செய்யப்பட்ட அங்கும் வரவேற்பை பெற்றது.
2004இல் மாதவன் நடிப்பில் எதிரி, ஆய்த எழுத்த ஆகிய படங்கள் வெளியாகின. இதில் ஆய்தஎழுத்து படத்தில் வில்லனாக நடித்திருப்பார். மாதவன் நடித்த இந்த இரண்டு படங்களும் நல்ல வரவேற்பை பெற்றன. இது தவிர நத்திங் பட் லைஃப் என்ற இங்கிலீஷ் படத்திலும், மேட் இன் யுஎஸ்ஏ என்ற மலையாள படத்திலும் நடித்தார் மாதவன்.
Muthu Vinayagam Kosalairaman
