ஸ்டார் தேவையில்லை, கதைதான் முக்கியம்.. பாக்ஸ் ஆபிஸ் வசூல் அப்புறம் தான்! எப்போதும் கெத்தாக இருக்கும் கோலிவுட் ரசிகர்கள்
கோலிவுட் சினிமாவில் 2024ஆம் ஆண்டு ஸ்டார் நடிகர்களை காட்டிலும், அவர்களுக்கு அடுத்த இடத்தில் இருந்து வரும் டயர் 2 ஹீரோக்களுக்கான ஆண்டாக அமைந்துள்ளது. அத்துடன் பாக்ஸ் ஆபிஸ் வசூலை காட்டிலும் கண்டென்ட்களுக்கு மதிப்பு அளிக்கும் கிங் எனவும் கோலிவுட் ரசிகர்கள் கெத்தாக மீண்டும் நிருபித்துள்ளனர்.
கடந்த ஆண்டை பொறுத்தவரை தளபதி விஜய்யின் லியோ, சூப்பர் ஸ்டார் ரஜினிகாந்தின் ஜெயிலர் என இரு படங்களும் தலா ரூ. 600 கோடிக்கு மேல் வசூலித்தன. இதைத்தொடர்ந்து பொன்னியின் செல்வன் 2 ரூ. 300 கோடிக்கு மேலும் வாத்தி, மாவீரன் போன்ற படங்கள் கணிசமான வசூலையும் பெற்றது.
அத்துடன் விடுதலை முதல் பாகம், ஜிகர்தண்டா டபுள் எக்ஸ், சித்தா, மாமன்னன் போன்ற படங்கள் ரசிகர்களால் கொண்டாடப்பட்டதுடன், பாக்ஸ் ஆபிஸிலும் நல்ல வசூலை பெற்று ஹிட் படங்களாக மாறியது.
பாக்ஸ் ஆபிஸில் டாப்பில் இருக்கும் விஜய்
இந்த ஆண்டிலும் தமிழில் அதிக வசூலை பெற்ற படங்களில் தளபதி விஜய்யின் தி கோட் முதல் இடத்தை பிடித்துள்ளது. இந்த படம் ரூ. 450 கோடிக்கு மேல் வசூலித்துள்ளது. அதேபோல் சூப்பர் ஸ்டார் ரஜினிகாந்தின் வேட்டையன் படமும் ரூ. 250 கோடிக்கு மேல் வசூலை ஈட்டியுள்ளது. இந்த இரண்டு படங்களும் ஸ்டார் மதிப்பு மிக்க படங்களாக இருப்பதுடன், முந்தையா ஆண்டில் இவர்களின் படங்கள் பெற்ற வசூலை விட குறைவாக உள்ளது. இருப்பினும் இந்த ஆண்டில் அதிக வசூலை பெற்ற படமாக தி கோட் இருப்பதால், கோலிவுட் ஹீரோக்களில் விஜய் தான் டாப்பில் இருக்கிறார்.