வசூல் வேட்டையாடிய கேஜிஎஃப் 2 ஓடிடி ரிலீஸ் தேதி அறிவிப்பு!

ரசிகர்களின் மிகுந்த எதிர்பார்ப்புக்கு மத்தியில் கடந்த ஏப்ரல் மாதம் 14ஆம் தேதி ‘கே.ஜி.எப் 2’ உலகம் முழுவதும் ரிலீஸ் செய்யப்பட்டது. இந்த படத்தை ரசிகர்கள் கொண்டாடி வருகின்றனர். திரை பிரபலங்கள் பலரும் இந்த படத்தை பார்த்து விட்டு பாராட்டி தெரிவித்து வருகின்றனர்.

படத்தில் கதை சொல்லும் விதம், திரைக்கதை மற்றும் எடிட்டிங் ஆகியவை இருக்கையின் நுனியில் உட்கார வைக்கும் அளவுக்குச் சிறப்பாக இருந்ததாக பிரமாண்ட இயக்குநர் சங்கர் கருத்து தெரிவித்திருந்தார்.

தமிழ், தெலுங்கு, கன்னடம், மலையாளம், இந்தி உள்ளிட்ட மொழிகளில் பான் இந்தியா படமாக வெளியான ‘கே.ஜி.எஃப் 2’, தற்போது வரை 1230 கோடி ரூபாய் வசூலை தாண்டியுள்ளது. தொடர்ந்து வசூல்மழையை பொழிந்து வருகிறது.

இந்நிலையில், ‘கே.ஜி.எஃப்.2’ படம், பிரபல ஓடிடி தளமான அமேசான் பிரைம் வீடியோவில் வருகிற ஜூன் 3ஆம் தேதி வெளியாக உள்ளதாக அதிகாரப்பூர்வ அறிவிப்பு வெளியாகியுள்ளது. இதனால் ரசிகர்கள் உச்சக்கட்ட மகிழ்ச்சியில் உள்ளனர்.

கடந்த 2018ஆம் ஆண்டு யஷ், பிரசாந்த் நீல் கூட்டணியில் வெளியான ‘கே.ஜி.எஃப் 1’ மிகப்பெரிய வரவேற்பை பெற்றதையடுத்து, ‘‘கே.ஜி.எஃப்.2’ படத்திற்கு பெரும் எதிர்பார்ப்பு நிலவியது. அதை பூர்த்தி செய்யும் விதமாக அதிரடி ஆக்ஷன் காட்சிகள், எமோஷன், மிரட்டல் டயலாக் என அனைத்தும் கலந்த கலவையாக 'கேஜிஎஃப் 2 படம் அமைந்திருந்தது.