Jayam Ravi: விஷால் சிங்கம் மாதிரி வருவான்.. 5 பெண்ணுங்க கூட பெட்டில் இருக்கிற சீன்.. ஓபனாக பேசிய ஜெயம் ரவி

பிஹைண்ட்வுட்ஸ் யூடியூபில் காதலிக்க நேரமில்லை படம் தொடர்பாக டான்ஸ் மாஸ்டர் கலா, நடிகர் ஜெயம் ரவியிடம் எடுத்த பேட்டி வைரல் ஆகிவருகிறது. அதன் தொகுப்பு இதோ..

காதலிக்க நேரமில்லை திரைப்படத்தின் கதை எப்படி ஓகே செய்தீர்கள்?

காதலிக்க நேரமில்லை திரைப்படத்தின் கதை ஒரு 5 வருஷம் முன்பே ஒரு லைனாக சொல்லிட்டாங்க, கிருத்திகா. அப்போ, பெண் இயக்குநர் என்பதால் ஹீரோயினுக்கு அதிக முக்கியத்துவம் கொடுத்திருந்தாங்க. நான் ஒன்னே ஒன்னு கேட்டேன். அதிகமாக வேண்டாம். 60 - 40னு இருக்கிறதை, 50 -50னு செய்யுங்க. சரிசமமாக இருந்தால் நான் நடிக்கிறேன் எனச் சொன்னேன். கதைப் பிடிச்சிருக்கு என்று சொன்னேன். அவங்க அதை ஒத்துக்கிட்டாங்க. அதை அவங்க புரிஞ்சுகிட்டு, சில படங்கள் எல்லாம் பண்ணிட்டு, அதற்கப்புறம் வந்தாங்க. படத்தில் ஃபைட் இல்லை. எதுவுமே இல்லை.

பெண் இயக்குநர்கிட்ட வொர்க் பண்ணுனது எப்படி?

என்னுடைய யோசிக்கும் முறையே மாறுச்சு. அவங்க சொன்னவுடன் வழக்கமாக நாம் செய்யிற மாதிரி ரியாக்‌ஷன் பண்ணுவேன். ஆனால், கிருத்திகா நீங்க நடிச்சது நல்லாயிருக்கு. இருந்தாலும் நான் சொல்றதை கொஞ்சம் மனசில் வைச்சிட்டு ஒன்னு பண்ணுங்கன்னு சொல்வாங்க. அப்போது கொஞ்சம் குழப்பமாக இருந்தது. லவ் புரொபோசல்கூட கொஞ்சம் கேசுவலாக சொல்லுங்க. தயங்கி சொல்லாதீங்க என அவங்க சொல்றதைக் கேட்டு செய்யும்போது, புது கோணம் கிடைத்தது. மானிட்டரில் போய் பார்க்கும்போது எனக்கே அது புதுசாக இருந்தது. கிருத்திகா சூப்பர் டைரக்டர். பாலச்சந்தர் எப்படி நெறைய விஷயங்களை உடைச்சாரோ, அப்படி ஒரு டைரக்டரா அவங்க வரணும்னு எனக்கு ஆசை. வருவாங்கன்னு நினைக்கிறேன்.

இயக்குநர் கிருத்திகா உதயநிதி சூட்டிங் ஸ்பாட்டில் எப்படி?

கிருத்திகா ரொம்ப கூல் தான். நிறைய பிரச்னைகள் சூட்டிங் ஸ்பாட்டில் நடக்கும். அவங்க மைண்ட்டுக்கு எடுத்துக்கவே மாட்டாங்க. அவங்களுக்குத் தேவை அந்த ஷாட் எப்படி வரணும் அதை மட்டும் தான் யோசிப்பாங்க. நான் டென்ஷன் ஆனால், ஆர்ட்டிஸ்ட்டை போய் டென்ஷன் செய்வேன். ஆர்ட்டிஸ்ட் டென்ஷன் ஆனால், ஷாட் தப்பா வரும் என்கிற அடிப்படை விஷயத்தை இப்போது வரைக்கும் கடைப்பிடிச்சிட்டு இருக்காங்க. அவங்க லைஃபில் நினைச்சதை சினிமாவில் கூட அவங்க கடைப்பிடிப்பாங்க.

நித்யாவை கிண்டல் எல்லாம் செய்தீங்களாமே?

வாய்ப்பே இல்லை. அவங்களை கிண்டல் எல்லாம் பண்ணுனதே கிடையாது. ஜாலியாக நாங்கப்பேசிப்போம். அவ்வளவு தான். அவங்க கிண்டல் பண்றமாதிரி இல்லை. ரொம்ப திறமையான நடிகை. அவங்க ஒரு கதாபாத்திரத்தை எப்படி எடுத்து பண்றாங்க, அதெல்லாம் கத்துக்கமுடிஞ்சது. ரொம்ப டேக்ஸ் வாங்கமாட்டாங்க. இது வழக்கமான காதல் கதை கிடையாது. இன்னொரு நேஷனல் அவார்டுகூட கிடைச்சாலும் தப்பே கிடையாது.

ஏ.ஆர்.ரஹ்மான் இசையில், பாடல்களில் டான்ஸ் நல்லாயிருந்தது ரவி? மலேசியா ஷோவிலேயே நீங்க பின்னிப்பிடல் எடுத்துட்டீங்க. டான்ஸ் மூவ்மென்ட்டுமே நல்லாயிருந்தது.அது பற்றி?

முதலில் டான்ஸ் பற்றி சொல்லிவிடுகிறேன் மாஸ்டர். உங்க கிட்ட கத்துக்கிட்டு இதுகூட பண்ணலைன்னா எப்படி. நான் கிளாஸிக்கல் டான்ஸர் என்பது உங்களுக்குத் தெரியும். வெஸ்டர்ன் டான்ஸ் எல்லாமே உங்கள்கிட்டதான் கத்துக்க ஆரம்பிச்சேன். அதில் தான் வண்டி ஓடிட்டு இருக்கு. நீங்கள் வந்து ஒருத்தர்கிட்ட இருக்கிறதை மேம்படுத்திடுவீங்க. நீங்கள் இவனுக்கு எது வரும். எது வராதுன்னு ஒரு ஆள் போட்டு சொல்லிக்கொடுத்தீங்க. இந்த நேரத்தில் நன்றி சொல்லிக்கிறேன்.

காதலிக்க நேரமில்லை படத்தில் மறக்கமுடியாத சீன்?

முதல் நாளே ஐந்து பொண்ணுங்க கூட கட்டிப்பிடிச்சு, பெட்டில் சாய்றமாதிரி ஒரு சீன். அது வந்து டிரெய்லர்ல வரும். உடனே, நான் என்ன இது சீனு, இது சிம்பிளா தெரியல அப்படின்னு டைரக்டர்கிட்ட சொன்னேன். நான் யோசிக்கவே இல்லைன்னு சொன்னாங்க. அதுகொஞ்சம் அருவருப்பாக இருந்தது. மத்தபடி, கிருத்திகா மற்றும் நித்யா ரொம்ப அழகாக ஹேண்டில் செய்திட்டாங்க.

விஷாலுடைய நட்பு பற்றி சொல்லுங்க?

விஷால் மாதிரி ஒரு தைரியசாலியே கிடையாது. அவனுக்கு இப்ப வந்து கெட்ட காலம் எனச் சொல்லலாம். அந்த தைரியம் வந்து அவனைக் காப்பாத்தும். கூடிய சீக்கிரம் அவன் வருவான். நிறையபேருக்கு உதவிய அந்த நல்ல மனசுக்கு, அவன் திரும்பி சிங்கம் மாதிரி வருவான்.

நன்றி: பிஹைண்ட்வுட்ஸ்