Indian 2: இது என்ன கொடுமை.. இந்தியன் 2 படம் பார்த்து ஸ்ட்ரெஸ் வந்துருச்சா.. சலுகையில் கிடைக்கும் மசாஜ்

இந்தியன் முதல் பாகத்தின் ஏகோபித்த வெற்றி, இந்த படத்தின் மீதான எதிர்பார்ப்பை கூட்டி இருந்த நிலையில், சமீபத்தில் இந்த திரைப்படம் வெளியாகி இருக்கிறது.

கதையின் கரு

இந்தியன் முதல் பாகத்தில், லஞ்சம் வாங்கிக்கொண்டு மக்களுக்கு எதிராக செயல்படும் அதிகாரிகளையும், அரசியல் வாதிகளையும், இந்தியன் தாத்தா கொல்வதை மைய கருவாக வைத்து கதை சொல்லி இருந்தார் இயக்குநர் ஷங்கர். தற்போது வெளியாகி இருக்கும் இரண்டாம் பாகத்திலும், அதுதான் மையக்கரு. ஒரே வித்தியாசம், தற்போதைய தலைமுறையில் லஞ்சத்தால் ஏற்படும் பிரச்சினைகளை கருவாக எடுத்து காட்சிகளை வடிவமைத்து இருக்கிறார் அவ்வளவுதான்.

அந்த பிரச்சினை சம்பந்தமான காட்சிகளை சித்தார்த்தையும், அவர் நடத்தி வரும் யூ- டியூப் சேனல் மூலமாகவும் நகர்த்தி இருக்கும் ஷங்கர், அதன் மூலமாக, பல்லாண்டுகளுக்கு முன்னதாக தாய்பேய்க்கு சென்ற இந்தியன் தாத்தாவிற்கு, சோசியல் மீடியா வழியாக அழைப்பு விடுகிறார்.

இந்தியா வரும் இந்தியன் தாத்தா

இதனையடுத்து இந்தியா வரும் இந்தியன் தாத்தா என்ன செய்தார்? இந்த முறை லஞ்சத்தை ஒழிக்க அவர் கையில் எடுத்த ஆயுதம் என்ன?... லஞ்சத்தை ஒழிக்க அவர் கூற வரும் தீர்வு என்ன? என்பதே படத்தின் கதை.

மிரட்டலான நடிப்பில் கமல் ஹாசன்

வழக்கம் போல கெட்டப்பிலும், நடிப்பிலும் கமல் ஹாசன் மிரட்டுகிறார். இந்தியன் தாத்தாவிற்கே உரித்தான கிடுக்கிலும், மிடுக்கிலும் அரட்டுகிறார். அவரை சுற்றியே பெரும்பான்மையான கதை நகர்வதால், இதர கதாபாத்திரங்கள் பெரிதாக கவனம் பெறவில்லை. ஆனாலும் கொடுத்த கதாபாத்திரத்துக்கு நடிகர்கள் நியாயம் செய்து இருக்கிறார்கள். ஆக்ஷன் காட்சிகளில் கமல் ஹாசன் பயன்படுத்தும் வர்ம முறைகள் ரசிக்க வைக்கின்றன. வசனங்களும் கவனம் ஈர்க்கின்றன.

மக்கள் தொகையில் சோசியல் மீடியாவில் இருப்பவர்கள் சொற்பமானவர்களே. அப்படி இருக்கும் போது, அதை வைத்தே பெரும் சாதனை புரிவது போன்ற காட்சிகளை வைத்திருப்பது அபத்தம். இளைஞர்களிடத்தில் மாற்றத்தை ஏற்படுத்துவதான் ஒரே வழி என்ற கருத்து உண்மை என்றாலும், அது தொடர்பான காட்சிகளில் அழுத்தமும், தாக்கமும் இல்லாமல் போனது ஏனோ? கருத்து கந்த சாமியோடு சேர்ந்த ஷங்கரின் ரெகுலரான கலவையும் படத்தில் இருந்த்திருந்தால் இந்தியன் 2 இன்னும் நன்றாக ரசித்திருக்கலாம்.

இப்படி ஒரு சலுகையா

இந்நிலையில் இந்தியன் 2 படத்திற்கு சரியான வரவேற்பு கிடைக்காத காரணத்தினால் அனைவரும் விரக்தியில் இருக்கிறார்கள். 

இதனிடையே கரூர் மாவட்டத்தில் இருக்கும் அழகு நிலையம் ஒன்று விநோத அறிவிப்பை வெளியிட்டு உள்ளது.

அதன்படி தாந்தோணி மலையில் இருக்கும் Studio 9 Family Saloon And Bridal Studio இந்தியன் 2 படத்துக்கு சென்று மன அழுத்தம் அதிகரித்தவர்களுக்கு 20% தள்ளுபடியில் தலைக்கான மசாஜ் ( Head Massage) செய்யப்படும் என விநோதமான அறிவிப்பை வெளியீட்டு உள்ளது.

இந்த சலுகையை பெற விருப்பம் உள்ளவர்கள், இந்தியன் 2 படம் பார்த்ததற்கு ஆதாரமாக டிக்கெட்டை எடுத்து கொண்டு வர வேண்டும் என தெரிவிக்கப்பட்டு உள்ளது.

சமூக வலைத்தளங்களில் எங்களை பின்தொடலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9