சென்சார் சொன்ன மாற்றங்கள்.. இறுதி வெர்ஷன் ரெடி - சென்சாருக்கு தயாரான கேம் சேஞ்சர்

சென்சார் சொன்ன மாற்றங்கள்

அரசியல் ஆக்‌ஷ்ன் த்ரில்லர் பாணியில் உருவாகியிருக்கும் இந்த படம் ரிலீஸாக இன்னும் ஒரு வாரம் மட்டும் இருக்கும் நிலையில் படம் சென்சாருக்கு அனுப்பப்பட்டுள்ளது. இதையடுத்து சென்சார் குழு சார்பில் சில முக்கிய மாற்றங்கள் செய்ய அறிவுறுத்தப்பட்டுள்ளது. அதன்படி கேம் சேஞ்சர் படம் தெலுங்கில் உருவாகியிருக்கிறது என்பதை படத்தின் டைட்டில் தெலுங்கிலும் தோன்ற வேண்டும் என கூறப்பட்டுள்ளது.

அத்துடன் படத்தில் முக்கிய கதாபாத்திரத்தில் நடித்திருக்கும் பிரம்மாநந்தம் பெயரின்போது டைட்டில் கார்டில் பத்மஸ்ரீ என குறிப்பிடப்பட்டுள்ளது. ஒருவரின் பெயருக்கு பின்னால் குறிப்பிடப்படும் இந்த கெளரவ பெயர்களை தவிர்க்குமாறு அறிவுறுத்தப்பட்டுள்ளது.

அதேபோல் வில்லன் கதாபாத்திரம் பேசும் சில ஆட்சோபனைக்குரிய வார்த்தைகள் மியூட் செய்ய வேண்டும் எனவும் தெரிவிக்கப்பட்டுள்ளது. இந்த மாற்றங்கள் செய்து சென்சார் வெர்ஷன் ரெடியாகி இருக்கும் நிலையில் ஜனவரி 4ஆம் தேதி பார்க்கப்பட்டு படத்துக்கு சென்சார் அளிக்கப்படும் என தெரிகிறது.

ராம் சரணுக்கு தேசிய விருது

தெலுங்கு சினிமா ரசிகர்களில் மிக பெரிய எதிர்பார்ப்பை ஏற்படுத்தியிருக்கும் படமாக கேம் சேஞ்சர் உள்ளது. கடந்த மூன்று ஆண்டுகளுக்கும் மேலாக இந்த படம் உருவாகி வந்தது. படத்தில் ராம் சரண் இரட்டை வேடங்களில் நடித்துள்ளார்.

சமீபத்தில் பேட்டி ஒன்றில் இயக்குநர் ஷங்கர், ராம் சரணின் நடிப்பை வெகுவாக பாராட்டினார். ராம் சரண் நடிப்புக்கு அவருக்கு தேசிய விருது கிடைக்கலாம் என தெரிவித்தார். அதேபோல் படத்தின் முதல் காபியை பார்த்த தயாரிப்பாளர் தில் ராஜு, இறுதி வெர்ஷன் மிகவும் திருப்திகரமாக இருப்பதாக தெரிவித்தார். அத்துடன் படத்தை பெரிய அளவில் மக்களிடம் கொண்ட சேர்க்க முடிவு செய்திருப்பதாகவும் கூறினார்.

தெலுங்கில் உருவாகியிருக்கும் கேம் சேஞ்சர் தமிழ், இந்தி உள்பட மொழிகளிலும் பான் இந்தியா படமாக வெளியாகிறது. படத்துக்கு தமன் இசையமைத்துள்ளார். இதன் டீஸர் சமீபத்தில் வெளியாக ரசிகர்கள் மத்தியில் வரவேற்பை பெற்றது. இதையடுத்து படத்தின் ட்ரெய்லர் விரைவில் வெளியாகும் என தெரிகிறது.

கோடிகளின் உருவான பாடல்கள்

கேம் சேஞ்சர் படம் ரூ. 400 கோடி பட்ஜெட்டில் உருவாகியிருப்பதாக கூறப்படுகிறது. மற்ற ஷங்கர் படம் போல் வழக்கமாக இந்த படத்தில் பாடல் காட்சிகள் மிக பெரிய பொருள் செலவில், கலர்ஃபுல்லாக உருவாக்கப்பட்டுள்ளது. படத்தின் பாடல்களுக்கு மட்டும் ரூ. 90 கோடிக்கு மேல் செலவு செய்யப்பட்டுள்ளதாக தகவல்கள் வெளியாகியுள்ளன.

படத்தில் மொத்தம் 5 பாடல்கள் இருக்கும் நிலையில், ஹைரா என்ற பாடல் இன்ஃப்ரா ரெட் கேமரா மூலம் படமாக்கப்பட்டுள்ளது. இந்த பாடலுக்கு மட்டும் ரூ. 15 கோடிக்கும் மேல் செல்வு செய்யப்பட்டுள்ளதாக சொல்லப்படுகிறது. இதன் விஷுவல் ரசிகர்களுக்கு புதிய அனுபவத்தை தருவதோடு, இந்திய சினிமாக்களில் ஒரு பாடலுக்கு அதிக செலவு செய்யப்பட்ட பாடலாகவும் இது அமைந்துள்ளதாக விவரம் அறிந்தவர்கள் கூறுகிறார்கள்.