அச்சமில்லை.. அச்சமில்லை..அமரன் டூ ஷேர்ஷா வரை.. மிலிட்டரி பேக் ட்ராப்பில் அமைந்த சில சூப்பர் திரைப்படங்கள்

துப்பாக்கி

வெடிகுண்டு சம்பவம் ஒன்றில் விடுமுறைக்கு வந்த ராணுவவீரரான விஜயிடம் பயங்கரவாதி ஒருவன் சிக்குகிறான். அவனிடம் நாட்டையே உலுக்கப்போகும் தீவிரவாதிகளின் வெடிகுண்டு திட்டம் இருப்பது தெரியவருகிறது. இதனையடுத்து விஜய் தன்னுடைய நண்பர்களோடு சேர்ந்து ஸ்லீப்பர் செல்களை வேட்டையாடுகிறார்.

அதன் பின்னரான மோதலில் என்ன நடந்தது என்பது படத்தின் கதையாக விவரிக்கப்பட்டு இருந்தது. தீவிரவாதிகளை அவர்கள் பாணியிலேயே துவம்சம் செய்வது, விஜய் நாட்டிற்காக தன்னையும், தன் தங்கையையும் பணயம் வைப்பது உள்ளிட்ட அம்சங்கள் ராணுவ வீரர்களின் தியாகத்தை வெளிப்படுத்தும் விதமாக அமைந்திருந்தன. இப்படத்தை ஏ.ஆர். முருகதாஸ் இயக்கி இருந்தார்.

விஸ்வரூபம்

அமெரிக்க வாழ் கதக் நடனக்கலைஞராக பெண்மையும், ஆண்மையும் கலந்து தோன்றிய கமலுக்கு, வேறு யாருனுடனும் தொடர்பு இருக்கிறதா என்பதை துப்பறியும் நிபுணர் மூலம் உளவு பார்க்கிறார் மனைவி பூஜா. ஆனால், எதிர்பாராத விதமாக அல்கொய்தா தீவிரவாதிகளிடம் சிக்கிக்கொள்ளும் அந்த துப்பறிவாளன் கொல்லப்பட, அவரை தேடும் பணியில் இறங்கும் கமலும், பூஜாவும் தீவிரவாதிகளிடம் சிக்கிக்கொள்கிறார்கள்.

அப்போது கமல் ஒரு முஸ்லிம் என்று தெரியவருகிறது. அவர் யார்?, எதற்கு அமெரிக்கா வந்தார்? தலிபான்களின் தலைவர் ஓமர் ஏன் அவரைப் பழிவாங்க எண்ணுகிறார் என்பதெல்லாம் கதையாக படத்தில் சொல்லப்பட்டு இருந்தது.

தீவிரவாத இடங்களையும், அவர்களின் மனநிலையையும் துல்லியமாக எடுத்துக்காட்டியது விஸ்வரூபம். இன்ட்டெலிஜென்ட் ஏஜென்ட்டாக கமல் வெளிப்படுத்திய நடிப்பு, அவர் படத்தை கையாண்டிருந்த விதமும் உண்மைக்கு மிகவும் நெருக்கமாக இருந்தது. கமல் நடித்து இயக்கிய இப்படம் பெரும் வரவேற்பை பெற்றது.

மேலும் படிக்க | ‘பழிவாங்கியாச்சு.. இன்னைக்கு நிம்மதி கிடைக்கும்..’ ஆபரேஷன் சிந்தூர் பற்றி பேசிய பஹல்காமில் உயிரிழந்த ஆதில் ஷா குடும்பம்!

ஷெர்ஷா

1999-ம் ஆண்டு நடந்த கார்கில் போரில் வீர மரணம் அடைந்த விக்ரம் பத்ராவின் வாழ்க்கையை அடிப்படையாகக் வெளியான படமே ‘ஷெர்ஷா’. இராணுவத்தில் சேர்ந்த கொஞ்ச காலத்திலேயே மிகப்பெரிய தாக்குதலை தடுத்து பதவி உயர்வு பெறும் இளைஞன் ஒருவன் கொடுத்த தகவலை வைத்து தீவிரவாதக் குழுவின் தலைவன் ஹைதரை கொல்கிறார். இந்த சம்பவம் கார்கில் போருக்கு விதையாக அமைகிறது.

அதன் பின்னர் என்ன நடந்தது என்பது மீதிக்கதை; படத்தில் காஷ்மீர், ராணுவ முகாம்கள், யுத்தக்களம் உள்ளிட்டவை மிகவும் தத்ரூபமாக காட்டப்பட்டிருந்தன. படத்தின் இறுதி 45 நிமிட காட்சிகளும், அதற்கேற்ற பின்னணி இசையும் பார்ப்பவர்களை நிச்சயம் கண்ணீரில் கரைய வைத்து விடும். விஷ்ணு வர்தன் இயக்கிய இந்ததிரைப்படத்திற்கு அவருக்கு தேசிய விருதும் கிடைத்தது.

மேலும் படிக்க | போராளியின் சண்டை தொடங்குகிறது.. ராயல் சல்யூட்.. ஆபரேஷன் சிந்தூரை பாராட்டிய ரஜினி

உரி தி சர்ஜிக்கல் ஸ்டிரைக்.

உரியில் நடத்தப்பட்ட பயங்கரவாதத் தாக்குதலில், பல இந்திய வீரர்கள் கொல்லப்பட்டதற்கு பதிலடி கொடுக்கும் வகையில், இந்திய ராணுவம் முன்னெடுத்ததுதான் தி சர்ஜிக்கல் ஸ்டிரைக்.இந்த சம்பவத்தை தழுவி உருவாக்கப்பட்ட திரைப்படம்தான் உரி தி சர்ஜிக்கல் ஸ்டிரைக். ஆதித்யா தார் இயக்கி, விக்கி கெளஷல் நடித்திருந்த இப்படம் பெரிய வரவேற்பை பெற்றது.

அமரன்

முகுந்த் வரதராஜனின் பயோபிக்காக உருவானதுதான் அமரன். சென்னையில் நடுத்தரக் குடும்பத்தில் பிறந்த சிவகார்த்திகேயன் ராணுவத்தில் சேர விரும்ப, அவருடைய அம்மா எதிர்ப்பு தெரிவிக்கிறார். ஆனால், காதலி சாய் பல்லவி உறுதுணையாக இருக்கிறார். அதன் பின்னர் ராணுவத்தில் சேர்ந்து பெரிய இடத்தை அடையும் சிவ கார்த்திகேயன் காஷ்மீரில் தீவிரவாதத்துக்கு எதிரான போரில் வீரமரணம் அடைகிறார். ராஜ்குமார் பெரிய சாமி இயக்கி இருந்த இப்படம் மிகப்பெரிய வரவேற்பை பெற்றது.