சாம்ராஜ்ஜியங்களைக் கட்டி ஆண்ட சரித்திர நாயகன்.. ஊடகத்துறையில் புரட்சிகளை செய்த முன்னோடி ராமோஜி ராவ் பிறந்தநாள் இன்று!

பத்திரிகைத் துறையில் வேலை

விவசாயக் குடும்பத்தில் பிறந்த இவர், தன் தொடக்க வேலையை விவசாயத்தில் இருந்தே ஆரம்பித்துள்ளார். விவசாயத்தில் மக்கள் படும் இன்னல்களுக்கு அறிவியல் பூர்வமாக தீர்வு காண நினைத்த அவர், அன்னமாதா எனும் பத்திரிகை மூலம் எண்ணற்ற விவசாய உக்திகளை வெளியிட்டு வந்தார். இவற்றை சோதனை அடிப்படையில் செய்து பார்த்த பலருக்கும் கை கொடுத்த நிலையில், பல விவசாயிகளும் ராமோஜி ராவால் பொருளாதார ரீதியாக முன்னேறினர்.

ஈநாடு பத்திரிகை மூலம் புரட்சி

பத்திரிகை துறை எப்போர்பட்ட மாற்றத்தைக் கொண்டுவரும் என்பதை கண்கூடாக பார்த்த அவர், தன் தீவிர முயற்சியால் 1974ம் ஆண்டு ஈநாடு எனும் தினசரி தெலுங்கு நாளிதவை தொடங்கி அதன் மூலம் மக்களுக்கு மேலும் நெருக்கமானார். அதுமட்டுமின்றி, இவர் தனது நாளிதழ் மூலம் தெலுங்கு மொழியை வளர்க்க நிபுணர் குழுவையும் ஏற்படுத்தினார்.

அத்துடன், இன்று அனைத்து மக்களுக்கும் வீடு தேடி நானிதழ்கள் விநியோகிக்கப்படுகிறது என்றால் அதற்கு முக்கிய காரணம் ராமோஜி ராவ் தான். அந்தக் காலத்தில் குறைந்த மக்களே பத்திரிகைகளை படிக்கும் பழக்கம் கொண்டவர்களாக இருந்தனர். அவர்களுக்கு எவ்வித சிரமமும் இல்லாத வண்ணம் தான் வெளியிடும் நாளிதழ் போய் சேர வேண்டும் என்பதற்காக ஏஜெட்டுகள் அமைத்து நாள் விடியும் முன்னரே நாளிதழ்களை விநியோகம் செய்தார். இது பத்திரிகை உலகில் மாபெரும் புரட்சியை செய்தது.

24 மணிநேர தொலைக்காட்சி

தான் அடியெடுத்து வைத்த துறையில் பல புதிய மாற்றங்களையும் தடக்கங்களையும் உருவாக்க வேண்டும் என நினைத்த ராமோஜி ராவ், 1995ம் ஆண்டு 24 மணி நேர தொலைக்காட்சியை ஈடிவி எனும் பெயரில் அறிமுகப்படுத்தினார். பொழுதுபோக்கை மையமாகக் கொண்ட இந்த டிவி, இதுவரை தெலுங்கு ஊடகங்கள் வைத்திருந்த பாணியை முற்றலுமாக உடைத்தெரிந்து மக்கள் விரும்பும் நம்பர் 1 சேனலாக மாறியது.

பின் அவர், பொழுதுபோக்கு நிகழ்ச்சிகள், தினசரி சீரியல்கள் என பல புதிய நிகழ்ச்சிகளைக் கொண்டு வந்து தெலுங்கு மொழியின் ஆஸ்தான டிவி என்ற நிலைக்கு ஈடிவியை முன்னேற்றினார்.

தெலுங்கில் பல திறமை வாய்ந்த பாடகர்களை உருவாக்கியது, நகைச்சுவை நிகழ்ச்சிகல் மூலம் மக்கள் கவலைகளைப் போக்குவது, ரியாலிட்டி நிகழ்ச்சிகள் மூலம் மக்களுடன் தொடர்ந்து நல்ல நட்புறவில் இருந்தது.

மற்ற மொழி பக்கம் திரும்பிய கவனம்

இதை தனக்கான கிரீன் சிக்னலாக பார்த்த ராமோஜி ராவ், ஈடிவி பங்களா, ஈடிவி மாராத்தி, கன்னடம் என பல மொழிகளில் தொலைக்காட்சி நிறுவனங்களைத் தொடங்கினார்.

இவர் அத்தோடும் நிறுத்த வில்லை. அச்சு, காட்சி என இரண்டு குதிரைகளில் வெற்றிகரமாக பயணித்த அவர், அங்கிருந்தே மின்னணு ஊடகம் எனும் மீனுக்கும் வலை போட்டார். அதுவும் வெற்றிகரமாக அமைந்தது. இப்படி, ஒரே நபரின் நிறுவனம் அடுத்தடுத்து பெற்ற வெற்றியை கருத்தில் கொண்டு 13 மொழிகளில் தனது ஈடிவி பாரத் மின்னணு ஊடகம் வழியாக அந்தந்த மாநிலத்தின் செய்திகளை வழங்கி வருகிறார்.

ராமோஜி ஃபிலிம் சிட்டி

பத்திரிகையில் இருந்து ஆரம்பித்த இவரது வாழ்க்கையில் பத்திரிகைத் துறையை விட முக்கிய இடம் பிடித்தது சினிமா துறை. இவர் 1996ம் ஆண்டு காடு, மலை, மேடு என பரந்து விரிந்த நிலப்பரப்பில் மாபெரும் பிலிம் சிட்டியைத் தொடங்கி வைத்தார். இங்கு ஒருவர் படம் எடுப்பதற்கான கதையுடன் வந்தால் மட்டும் போதும், வெளியே செல்லும் போது மொத்த படத்தையும் முடித்துவிட்டு நேரடியாக ரிலீஸிற்கான வேலைப் பார்க்கலாம் எனும் அளவிற்கு வசதிகளை செய்து கொடுத்தார். 

இங்கு ஒரே நேரத்தில் 5 படங்களின் படப்பிடிப்பை நடத்தும் அளவிற்கு வசதி உள்ளது. மருத்துவமனை, ஏர்போர்ட், ரயில் நிலையம், கிரமப்புற செட், அடுக்குமாடி செட், மாளிகை, தோட்டம் என ஒரு படம் எடுக்க என்ன வேண்டுமோ அவை அத்தனையும் இங்கு உள்ளது. 

மேலும் உலகளவில் மாபெரும் வெற்றிப் படமாக அமைந்த பாகுபலி திரைப்படம் இங்கு எடுக்கப்பட்டது தான். அத்துடன் இந்த ஃபிலிம் சிட்டியை சுற்றுலாத் தலமாகவும் மாற்றி அமைத்துள்ளனர்.

இது சினிமாத் துறையினருக்கு கிடைத்த வரப் பிரசாதமாக மாறியது மட்டுமின்றி, ஆயிரக் கணக்கான மக்களுக்கு வாழ்வாதாரம் தரும் இடமாகவும் அமைந்தது. இதைத் தொடர்ந்து அவர் மயூரி பிலிம்ஸ் எனும் சினிமா விநியோக நிறுவனத்தையும் தொடங்கினார்.

உணவுத்துறையிலும் கால் தடம்

இதன் மூலம் ஊடகங்கள் மூலம் மக்களை தொடர்பு கொள்வது தான் இவரது நோக்கம் என நினைத்து வந்தால், பிரியா ஃபுட்ஸ் எனும் பெயரில் மசாலா, ஊறுகாய், எண்ணெய் விற்பனை செய்கிறார். பின், மார்க்கதரிஷி எனும் பெயரில் சிட்ஃபண்டு கம்பெனி நடத்துகிறார்.

அத்தோடும் அவர் நிறுத்தவில்லை, அவர் தனது மனைவி ரமா தேவி பெயரில் ஹைதராபாத்தில் பள்ளி தொடங்குகிரார். பின் அவரின் நிறுவனத்தில் வேலை செய்வோரின் பிள்ளைகள் படிப்பதற்காக சில சலுகைகளை அளித்து பிலிம் சிட்டிக்கு உள்ளேயே பள்ளிகளைத் தொடங்கினார். பத்திரிகைத் துறையில் விருப்பம் உள்ளவர்களுக்காகவும் வகுப்புகள் தொடங்கினார்.

முதுமையிலும் மாறாத பழக்கம்

இப்படி தன் வாழ்க்கை முழுவதும் மக்களுக்கு உதவும் வகையில் புதுவித சிந்தனைகளை யோசித்துக் கொண்டே இருந்துள்ளார். இவர் 80 வயதைக் கடந்த பின்னும் அதிகாலை 4 மணிக்கே எழுந்து, தன் வீட்டிலிருந்து நடந்தே அலுவலகத்திற்கு வந்து அன்றைய நாளிதழ்களை வாசிக்கும் பழக்கம் கொண்டவர். அத்துடன் அவர் தன் இறுதி நாட்கள் வரை நேரம் தவறாமையை கடைபிடித்தவர்.

கொடை வள்ளல்

எப்போதும் வெள்ளை சட்டை வெள்ளை பேண்ட்டுடன் காணப்படும் இவர், மனதும் வெள்ளை தான். தனது நிறுவனங்கள் மூலம் நேரடியாக 5000 பேருக்காவது வேலை கொடுத்து வந்திருப்பார். அத்துடன், ஆந்திரா, தெலுங்கானா மட்டுமல்ல. அண்டை மாநிலமான கேரளாவில் மழை வெள்ளத்தால் பாதிக்கப்பட்ட மக்களுக்கு வீடு கட்டிக் கொடுத்து உதவியும் செய்துள்ளார்.

கௌரவித்த இந்திய அரசு

ஊடகத் துறையில் எண்ணில் அடங்காத சாதனைகளைப் புரிந்த ராமோஜி ராவை கௌரவிக்கும் விதமாக இந்திய அரசு அவருக்கு பத்ம விபூஷன் விருது வழங்கி பெருமை செய்தது. இவர், தன் அசாத்திய முயற்சியால் பல இளம் தலைமுறை பட்டதாரிகளுக்கு வாய்ப்பளித்து அவர்களின் வாழ்க்கையை முன்னேற்றியுள்ளார். தான் செய்யும் வேலையில் முழு மூச்சாக இறங்கி அவற்றில் புது முயற்சிகள் செய்தால் வெற்றி நம்மைத் தேடி வரும் என்பதற்கு அவர் மாபெரும் எடுத்துக் காட்டாக விளங்கினார்.

ராமோஜி ராவ் மறைவு

இப்படி தன் வாழ்நாள் முழுவதும் தான் உருவாக்கிய நிறுவனங்களை கண்காணிப்பதில் தீவிரம் காட்டி வந்த ராமோஜி ராவ், கடந்த ஜூன் மாதம் 8ம் தேதி தனது 87வது வயதில் உடல்நலக் குறைவால் காலமானார்.

விவசாயக் குடும்பத்தில் பிறந்து தன் கனவுகளை துரத்தியதன் மூலம் மாபெரும் வெற்றி கண்ட நாயகன் பல தலைமுறைகளுக்கு எடுத்துக்காட்டாக இருக்கிறார் என்பதில் சந்தேகமே இல்லை.