‘அவதாரை குறை சொல்லும் போது நான் எம்மாத்திரம்?.. சின்னத்தம்பி கூட இப்போ ஃப்ளாப் ஆகிடும்’ பி.வாசு உருக்கம்!

‘‘ஒரு படம் ஆரம்பிக்கும் போது, அதை நான் முடிவு பண்ணிவிட்டேன் என்றால், அது சரியோ, தவறோ, நான் எடுத்துப்பேன். ஆனால், எனக்கு தைரியமா இந்த துறையில் ஊக்கம் அளிப்பது என் பள்ளி நண்பர்கள் தான். 

என்னுடைய படத்தை பார்த்துவிட்டு, ‘டேய்.. என்னடா படம் எடுத்துருக்க?’ என்பதும் அவர்கள் தான். அதே சில படங்களைப் பார்த்து விட்டு, ‘ரொம்ப பெறுமையா இருக்குடா’ என்று சொல்வதும் என் நண்பர்கள் தான். இன்று என்னுடைய பலம் எல்லாம், என்னுடைய நண்பர்கள் தான். 

90களில் எனக்கு தொடர்ந்து வெற்றிகள் வந்த நேரத்தில், இந்த மாதிரி மீடியாக்கள் கிடையாது. அவ்வாறு இருந்திருந்தால், அப்போது எனக்கு கிடைத்த தொடர் வெற்றிகளை இப்படி கொண்டாடியிருப்பார்களா என்று தெரியாது. 

இயக்குனர்களை தேடி நடிகர்கள் போக வேண்டும். நடிகர்களை தேடி இயக்குனர்கள் போகக் கூடாது. இப்போ, இயக்குனர்களை தேடி நடிகர்கள் போவது எனக்கு பெறுமையா இருக்கு. ஆனால், அதே நேரத்தில் அதை சாதாரணமாக தான் இயக்குனர்கள் எடுத்துக் கொண்டு பயணிக்க வேண்டும். அதை விட்டு விட்டு, நம்மை எங்கோ கொண்டு போகிறார்கள் என்று, உணர்ந்து கொள்ள கூடாது. மீண்டும் இந்த துறை, இயக்குனர்கள் கையில் வந்திருப்பது மகிழ்ச்சி தான். 

இந்த தலைமுறை ரசிகர்களிடம், சந்திரமுகி 2 திரைப்படம் என்னை அறிமுகம் செய்துள்ளது. விமர்சனங்கள் வரத்தான் செய்யும். டைட்டானிக் எடிட்டிங் சரியில்லை என்று சொன்னவர்களை நான் பார்த்திருக்கிறேன். அவதார்2 படத்தின் திரைக்கதை சரியில்லை என்று எழுதியவர்களை நான் பார்த்திருக்கிறேன். அப்படி பேசுபவர்களுக்கு மத்தியில் நானெல்லாம் சாதாரணம். 

இன்று இருக்கும் மீடியா அன்று இருந்திருந்தால், சின்னத்தம்பி படம் பெரிய தோல்விபடமாக ஆகியிருக்கும். ‘சிவாஜி மாதிரி ஒரு பெரிய நடிகரோடு மகனுக்கு தாலி என்றால் என்னவென்று தெரியாமல் படம் எடுத்து வெச்சிருக்கான், என்ன கதை, இது என்ன படம்?’ என்று சொல்லி காலி பண்ணிருப்பாங்க.

நாம ஜெயிக்கும் போது, நம்மைச் சுற்றி ஒரு கூட்டம் இரக்கும், நம்மை நோக்கி ஓடி வருவார்கள்.  படம் தோற்கும் போது இவன் யாரு என்பது தெரியாத மாதிரி கடந்து போவதையும் நான் நிறைய பார்த்திருக்கிறேன். மிகப்பெரிய ரெக்கார்டு ஹிட் கொடுத்திருக்கேன், ரெக்கார்டு ஃபெயிலரும் கொடுத்திருக்கேன். 

இரு தோல்விகள் தொடர்ந்தால், நம்மை யார் என்றே தெரியாத மாதிரி போவார்கள். அதெல்லாம் பெரிய அவமானமாக கருதுகிறேன். மன்னன் படத்தில் அம்மா என்றழைக்காத பாடல், என் அம்மாவுக்காக எழுதி எடுத்தது. அதை காட்டுவதற்கு முன் அவர் இறந்துவிட்டார். அது தான் என் வாழ்நாளில் நான் மறக்க முடியாத கண்ணீர் விட்டு கதறிய நாள்,’’

என்று அந்த பேட்டியில் பி.வாசு கூறியிருந்தார்.