இவர் அட்டகத்தி அல்ல.. பிரிவினை செய்வோருக்கு எல்லாம் காலா.. ஆணித்தரமாக நிரூபிக்கும் பா.ரஞ்சித்..

சினிமாவை கருவியாக பயன்படுத்திய கலைஞன்

மதத்தாலும், கடவுளின் பெயராலும், சாதி அடிப்படையாலும் காலம் காலமாக தங்களுக்கு எதிரான அடக்குமுறைகளை சமந்து வருபவர்களை மேல் தட்டு மக்கள் எப்படி எல்லாம் அவர்களின் சுயநலத்திற்காக பயன்படுத்துகின்றனர். அவர்களின் வாழ்க்கை முறையை எப்படி எல்லாம் விமர்சனத்திற்கு உள்ளாக்குகின்றனர் என்பதை மிகத் தெளிவாக பேசி வருகிறார்.

இவரது முதல் படமான அட்டகத்தி, வாழைப் பழத்தில் ஊசி ஏற்றுவது போன்று அத்தனை அழகான அரசியல் கருத்துகளை சொல்லாமல் சொல்லிப் போனது. தலித் மக்களின் வாழ்வாதாரம், உணவு முறை, இருப்பிடச் சூழல் என மக்களுக்கு வார்த்தைகளே இல்லாமல் புரிய வைத்தது.

அடுத்தடுத்த படங்களில் ஆக்ஷன் தான்

முதல் படத்தில் தன்னை நிரூபித்த பிறகு அந்தப் படம் கொடுத்த வெற்றி, அவரை அடுத்த படத்தில் நேரடியாகவே அரசியல் வசனங்கள் பேச வைத்தது.

வடசென்னை மக்கள் என்றாலே அவர்கள் அடியாட்களாகவும் ரவுடிகளாகவும் தான் இருப்பார்கள் என்ற பிம்பத்தை மாற்றி, அவர்களிலும் படித்த இளைஞர்கள் இருக்கின்றனர். அவர்கள் மற்றவர்களைப் போல பெரிய பெரிய ஐடி நிறுவனங்களில் பணியாற்றுகின்றனர் என்ற இதுவரை வடசென்னை பற்றி மக்கள் அறிந்திராத மறைக்கப்பட்ட பக்கத்தையும் வெளிச்சசத்திற்கு கொண்டு வந்தார்.

அந்தப் படத்தில் அவர் அத்தோடு நிறுத்திக் கொள்ளவில்லை. வடசென்னை மக்களை அரசியல் தலைவர்கள் எப்படி பயன்படுத்தி வருகின்றனர் என்பதையும் பேசி இருப்பார்.

ரஜினியை வைத்து அரசியல் பேசிய ரஞ்சித்

இதையடுத்து இவர் ரஜினியை வைத்து இயக்கிய கபாலி படத்தில் கொத்தடிமைகள் போல் நடத்தப்படும் தலித் மக்களின் உரிமைக்காக குரல் கொடுத்திருப்பார். மேலும், தலித் சமுதாயத்தில் இருப்பவர்கள் அணியும் உடை மற்றவர்களை எப்படி பேச வைக்கிறது என்பது பற்றியும் பல ஆண்டுகால அரசியல் பற்றியும் தனது கூரிய வசனங்கள் மூலம் பதிலடி கொடுத்திருப்பார்.

காலா படத்தில், தலித் மக்கள் வாழும் மண், நிலம் அவர்களுக்கான உரிமை. அதை அவர்களிடமிருந்து எந்தநாளும் பறிக்க முடியாது என்பதை வெளிப்படுத்தி இருப்பார். தொடர்ந்து, தங்கலான் படத்திலும் தலித் மக்களின் ஆதிக்குடிகளின் கதையை மையமாக பேசி இருப்பார்.

அடங்காத குரல்

இப்படி, தன்னுடைய ஒவ்வொரு படைப்புகளையும் தான் சார்ந்த மக்களின் முன்னேற்றத்திற்காகவும், அவர்கள் சமூகத்தின் மீது வைத்திருக்கும் பார்வையை மாற்றவும் ஒடுக்குமுறைக்கு எதிரான அடங்காத குரலாக வெளிவந்து உரக்கப் பேசுகிறார்.

சினிமாவில் தான் வளர்ந்தால் போதும் என்ற மனநிலையில் நில்லாமல், தன் சமுதாயத்திற்காக குரல் கொடுக்கும் அவர்களின் வளர்ச்சியில் பங்கு கொள்ள நினைக்கும் அத்தனை பேரையும் ஆதரித்து அவர்களுக்கு தேவையான வாய்ப்புகளை வழங்கி, சினிமாவைத் தவிர்த்து மக்களுக்கான கல்வி, அவர்களின் கலைப் படைப்புகள் வெளியே கொண்டுவருவதற்கான தளம், அம்பேத்கரிய கருத்துகளை வெகுஜன மக்களுக்கும் கொண்டு சேர்க்க தன்னால் முடிந்த அத்துனை முயற்சிகளையும் எடுத்து வருகிறார்.

வாழ்த்துகள் பா.ரஞ்சித்

தன்னுடைய பேச்சும், செயலும் சிந்தனையும் எப்போதும், தன்னைப் போல் அடிபட்டு கிடந்த மக்களை காக்கும் நோக்கிலே இயங்கி வரும் பா.ரஞ்சித் இன்று அவரது 42வது பிறந்தநாளைக் கொண்டாடுகிறார். அவருக்கு ஹிந்துஸ்தான் டைம்ஸ் தமிழ் சார்பில் வாழ்த்துகள்.