Bigg Boss Tamil: ஐஸூ எலிமினேட் ஆனதற்கு நிக்சன் காரணமில்லையா?.. ‘உங்கள சாருன்னு வேற கூப்பிடணுமா?’ - நிக்சனை வெளுத்த கமல்

இந்த நிலையில் இந்த வாரத்தில் அக்‌ஷயா, விக்ரம், பூர்ணிமா, கானா பாலா ஆகியோரில் யாராவது ஒருவரை கமல்ஹாசன் வெளியேற்றுவார் என்று எதிர்பார்க்கப்படுகிறது. இன்னும் குறிப்பாக, கானா பாலா நிகழ்ச்சியில் இருந்து வெளியேற்றப்பட அதிக வாய்ப்பு இருப்பதாக கூறப்படுகிறது.

நேற்றைய எபிசோடில் கேப்டனாக மறுபடியும் தினேஷ் தேர்வான நிலையில், விசித்ராவும், அர்ச்சனாவும், உன்னைப்போல் ஒருவன் டாஸ்க்கில், சக போட்டியாளர்கள் திட்டமிட்டு எங்களை மோசமான ஃபெர்ஃபாமர் என்று முத்திரைகுத்தி, அடுத்த டாஸ்க்கில் பங்கேற்க விடாமல் செய்ததாக கூறினர். மேலும் இதனை காரணம் காட்டி, ஜெயிலுக்குள் செல்லாமல், விதிகளை மீறி வெளியே சென்று விட்டனர்.

இதனை பார்த்த கேப்டன் தினேஷ், அவர்கள் ஜெயிலை தவிர வேறு எந்த வீட்டிற்குள்ளும் நுழைய விடாமல் செய்ய வேண்டும் என்று சகபோட்டியாளர்களிடம் ஆலோசனை செய்திருக்கிறார். இதற்கிடையே ஐஸூ வெளியே சென்றதற்கு நிக்சன் அவருடன் நெருங்கி பழகியதே காரணம் என்று விசித்ரா கூறி வந்தார்.

அதனைப்பிடித்துக்கொண்டு நிக்சன் விசித்ராவுடன் சண்டைக்குச் சென்றார். அந்த வாக்குவாதத்தில் இனி உங்களை விசித்ரா மேம் என்று அழைக்க முடியாது என்றும் விசித்ரா என்றுதான் அழைப்பேன் என்று நிக்சன் சாட.., விசித்ராவோ போடா.. என்று சொல்கிறார். இதில் கோபமான நிக்சன்.. போடா.. என்றெல்லாம் சொல்லக்கூடாது என்று கூறினார்.

இந்த விவகாரம்தான் தற்போது பிக்பாஸ் புரமோவில் இடம் பெற்று இருக்கிறது. அப்போது விசித்ரா, நான் உங்களை மேம் என்று அழைக்க வேண்டுமென்றால், நீங்கள் என்னை சார் என்று அழைக்க வேண்டும் என்று நிக்சன் சொன்னதாக கூற, நிக்சன் நான் சார் என்று சொல்லி அழைக்கச் சொல்லவே இல்லை என்று வாதாடினார்

இதனை பார்த்த கமல் நீங்கள் சார் என்று அழைக்க வேண்டும் என்று சொன்னதை நானே பார்த்தேன் என்று இடையில் கம்பை நீட்டினார். அதற்கு நிக்சன் எனக்கு நியாபகம் இல்லை என்று சொல்ல, எங்களுக்கு நியாபகம் இருக்கிறது என்றார் கமல்.

தொடர்ந்து பேசிய விசித்ரா, நிக்சன் ஐஸூ எலிமினேட் ஆனதற்கு நான்தான் காரணம் என்று சொல்லி வாதடியதாக சொல்ல, அப்படி நீங்கள் நினைக்கிறீர்களா? கமல் கேட்க, ஒன்றுமே தெரியாத பிள்ளை போல நிக்சன் திருதிருவென முழிக்கிறார்.