மாய மாதாவாக வந்த சமந்தா! எப்படி இருக்கிறது சமந்தாவின் 'சீரியல் கில்லர்' சுபம் திரைப்படம்? விமர்சனம் இதோ

மேலும் படிக்க| சினிமாவில் சம்பிரதாயப் பொருளான கிளாப் போர்டு.. காரணம் சொன்ன இயக்குநர்!

மூன்று நண்பர்களின் கஷ்டங்கள்

பிம்னிப்பட்டினம் கிராமத்தில் கேபிள் டிவி நடத்தி வருகிறார் ஸ்ரீனு (ஹர்ஷித் ரெட்டி). வங்கியில் பணிபுரியும் ஸ்ரீவள்ளியை (ஸ்ரீயா) ஸ்ரீனு திருமணம் செய்து கொள்கிறார். மனைவியை தன் கட்டுப்பாட்டில் வைத்திருக்க நினைக்கும் ஸ்ரீனுவுக்கு முதல் இரவில் எதிர்பாராத அதிர்ச்சி காத்திருக்கிறது. 'ஜன்ம ஜன்மால பந்தம்' என்ற சீரியலைப் பார்த்து பேய் பிடித்தது போல் விசித்திரமாக நடந்து கொள்கிறார் ஸ்ரீவள்ளி.

தனது நெருங்கிய நண்பர்கள் (ஸ்ரீனிவாஸ் கவி ரெட்டி, சரண் பெரி) வீட்டிலும் இதே பிரச்சினை இருப்பதை ஸ்ரீனு அறிகிறார். அவர்களது மனைவிகளான பரிதா, காயத்ரி ஆகியோரும் இரவு 9 மணிக்கு ஒளிபரப்பாகும் 'ஜன்ம ஜன்மால பந்தம்' சீரியலைப் பார்த்து விசித்திரமாக நடந்து கொள்கிறார்கள், தடுக்க முயன்றால் கொலை செய்யவும் துணிகிறார்கள் என்பது தெரிய வருகிறது.

சுபம் பட கதை

அந்த சீரியலால் மூன்று நண்பர்களும் என்னென்ன கஷ்டங்களை அனுபவித்தார்கள்? அந்த சீரியலுக்கும் ஆவிகளுக்கும் என்ன தொடர்பு? இந்தக் கஷ்டத்திலிருந்து அவர்களை மாயா மாதா எப்படி மீட்டார்? டிஷ் குமாருக்கும் இந்த சீரியலுக்கும் ஏதாவது தொடர்பு இருக்கிறதா என்பதே இந்தப் படத்தின் கதை.

தயாரிப்பாளராக தனது முதல் படத்தை பெரிய பட்ஜெட், பிரபல நடிகர்களுடன் சமந்தா எடுத்திருக்கலாம். ஆனால், வித்தியாசமான கதையைத் தேர்ந்தெடுத்து, குறைந்த பட்ஜெட்டில் 'சுபம்' படத்தை தயாரித்து தனது தனித்துவத்தை வெளிப்படுத்தியுள்ளார்.

மேலும் படிக்க| 'குறைந்தபட்ச புரிதல் இருக்கிறதா..?' ஐஸ்வர்யா ராஜேஷை ட்ரோல் செய்யும் நெட்டிசன்கள்! காரணம் இதுதான்..

சீரியல் வெறியில்...

பெண்களின் சீரியல் வெறியை மையமாகக் கொண்ட திகில் நகைச்சுவைப் படம் இது. எளிமையான கதையுடன் இறுதிவரை ரசிக்க வைத்துள்ளார் இயக்குநர் பிரவீன் காந்த்ரேகுல.

சீரியல்கள் வருடக்கணக்கில் நீள்வது வழக்கம். ஒரு டிவி சீரியலைத் தொடர்ந்து பார்த்து வந்தவர்கள், அது முடியும் முன்பே இறந்து போனால், அவர்களது ஆவிகள் திரும்பி வந்து சீரியலைப் பார்த்தால் என்ன ஆகும் என்பதே 'சுபம்' படத்தின் கதை. இந்த சுவாரஸ்யமான கதையை மூன்று இளம் தம்பதிகளின் வாழ்க்கையுடன் நகைச்சுவையாகத் திரையில் காட்டியுள்ளார் இயக்குநர். டிவி சீரியல்களில் அதிகமாகக் காட்டப்படும் பெண்கள் மீதான ஒடுக்குமுறை, ஆணாதிக்கம் போன்ற உணர்ச்சிப்பூர்வமான விஷயங்களை சர்ச்சைக்கு இடமின்றி நகைச்சுவையாகக் கையாண்ட விதம் சிறப்பு.

2004 பின்னணியில்...

2004 பின்னணியில் 'சுபம்' கதை தொடங்குகிறது. மூன்று நண்பர்களின் வாழ்க்கை, மனைவிகள் மீதான அவர்களின் ஆதிக்கம் ஆகியவற்றுடன் திகில் கலந்து முதல் பாதி நகர்கிறது. ஸ்ரீனுவை மணந்த ஸ்ரீவள்ளிக்கு மாமியார் வீட்டில் ஏற்படும் பிரச்சினைகள் உணர்ச்சிப்பூர்வமாகக் காட்டப்பட்டுள்ளன. பெண்கள் முன் தலை வணங்கக் கூடாது என்று திருமணத்தில் ஸ்ரீவள்ளிக்கு ஸ்ரீனு மோதிரம் போட விடாமல் தடுக்கும் காட்சிகள் சிந்திக்க வைக்கின்றன.

அழகு நிலையம் தொடங்க வேண்டும் என்ற கனவு இருந்தும், கணவன் சொல் கேட்டு வீட்டுக்குள்ளேயே முடங்கிக் கிடக்கும் பரிதாவின் போராட்டம், கணவனின் ஆதிக்கத்தால் காயத்ரி படும் துன்பங்கள் நெஞ்சைத் தொடுகின்றன. இந்த ஆதிக்கத்தை ஒரு செய்தியாகச் சொல்வது போல் அல்லாமல், நகைச்சுவையாகச் சொல்ல இயக்குநர் ஓரளவுக்கு வெற்றி பெற்றுள்ளார்.

மேலும் படிக்க| முந்தியடிக்கும் திரைத்துறை.. 'ஆபரேஷன் சிந்தூர்', 'மிஷன் பஹல்காம்' பெயருக்கு கூடும் மவுசு..

திருப்பம் வெளியான பிறகு...

சீரியலால் தங்கள் மனைவிகள் சந்திக்கும் பிரச்சினைக்குத் தீர்வு காண மூன்று நண்பர்களும் செய்யும் முயற்சிகளைச் சுற்றி இரண்டாம் பாதி நகர்கிறது. முக்கியமான இரண்டாம் பாதியில் இயக்குநர் தடுமாறியதால் படம் சோர்வடையச் செய்கிறது. கதையின் திருப்பம் வெளியான பிறகும் வரும் காட்சிகள் ஈர்ப்பதில்லை. ஆல்ஃபா மேல் கதையை நன்றாகவே எழுதியிருந்தாலும், திரையில் அந்த மாயாஜாலம் இல்லை. பல காட்சிகள் திரும்பத் திரும்ப வருவதால் படம் சலிப்பை ஏற்படுத்துகிறது.

நகைச்சுவை நேரம் பிளஸ்...

ஆணாதிக்க மனப்பான்மை கொண்ட நண்பர்களாக ஹர்ஷித், ஸ்ரீனிவாஸ் கவி ரெட்டி, சரண் பெரி ஆகியோர் தங்கள் நகைச்சுவை நடிப்பால் கவர்ந்துள்ளனர். உணர்ச்சிப்பூர்வமான, திகில் காட்சிகளில் அவர்களால் சிறப்பாக நடிக்க முடியவில்லை. ஸ்ரீவள்ளி கதாபாத்திரத்தில் ஸ்ரீயா கொந்தம் நியாயம் செய்துள்ளார். ஷாலினி கொண்டேபுடி, ஸ்ராவணி லட்சுமி ஆகியோரின் நடிப்பு சிறப்பு.

மாய மாதாவாக சமந்தாவின் சிறப்புத் தோற்றம் இந்தப் படத்துக்குப் பலம் சேர்க்கிறது. வசனங்கள் மூலமே நகைச்சுவையை வழங்கியுள்ளார். தொழில்நுட்ப ரீதியாக விவேக் சாகரின் பாடல்கள், பின்னணி இசை சிறப்பு. காட்சிகள் கண்களைக் கவர்கின்றன. சிறிய படம் என்ற எண்ணம் எங்கும் தோன்றவில்லை.

நகைச்சுவையை எதிர்பார்த்து...

புதுமையான கதையுடன் வந்துள்ள திகில் நகைச்சுவைப் படம் 'சுபம்'. நகைச்சுவையை எதிர்பார்த்து திரையரங்கிற்குள் நுழைந்தால் நிச்சயம் ஏமாற்றமடைய மாட்டீர்கள்.

ரேட்டிங்: 2.75/5