Vishal:சினிமாவும் சூதாட்டமும் ஒரே பிரிவில் இருப்பது வருத்தமா இருக்கு.. பெண்கள் தற்காப்புக் கலை கற்கணும்.. விஷால் கருத்து

மத கஜ ராஜாவுக்குப் பின் மீண்டும் சுந்தர் சி கூட இணையப் போவது குறித்து அதிகாரப்பூர்வமாக விரைவில் தகவல் வரும்.

மற்ற நடிகர், நடிகைகள் பற்றி தரக்குறைவாகப் பேசுவது அநாகரிகமான விஷயம்: விஷால்!

நீங்க என்ன வேண்டுமென்றாலும் எழுதுங்க. என்னோட ஆரோக்கியம் பற்றி உச்ச கட்ட கற்பனையில் ஒரு டாக்டர் பேசினார். அவர் டாக்டரா இல்லை கம்பவுண்டரான்னு கூட எனக்குத் தெரியாது. விஷாலுக்கு நரம்பு தளர்ச்சி, மூன்று மாசம் எழுந்திருக்கமாட்டான் அப்படின்னு கற்பனை பண்ணுனாங்க. அதேபோல், மற்ற நடிகர், நடிகைகள் பற்றி தரக்குறைவாகப் பேசுவது அநாகரிகமான விஷயம். ஏனென்றால் உங்கள் வீட்டிலும் பெண்மணிகள் இருக்காங்க. அதனால் பொறுப்புணர்ந்து பேசுங்க. வியூஸ்க்காக இப்படி பேசினால் பார்த்திட்டு இருக்கமுடியாது. அதனால் தான் கேஸ் ஃபைல் பண்ணவேண்டியதாகப் போச்சு.

பேச்சுரிமை இருக்கு என்பதற்காக, படத்தைப் பற்றி விமர்சிக்கலாம். ஆனால், ஒருத்தவங்களுடைய தனிப்பட்ட வாழ்க்கையைப் பற்றி பேசுவதற்கு யாருக்கும் எந்த உரிமையும் கிடையாது. முதலில் கண்ணாடியைப் பார்த்திட்டு அவங்களுக்கு நாம் பேசினால் எப்படி பாதிக்கப்படுவாங்கன்னு யோசிச்சிட்டு பேசுங்க. பேசலாம். அடுத்தவங்க காயப்படுறமாதிரி பேசக்கூடாது. ரொம்ப கொச்சைப்படுத்தி பேசுறதை எங்களால் தாங்கிக்கொள்ள முடியாது. அதனால் ஒருத்தங்க இன்னொருத்தவங்களைக் காயப்படுத்தாமல் பேசக் கத்துக்கணும்.

பெண்கள் தற்காப்புக் கலை கற்றுக்கொள்ள வேண்டும்: விஷால்!

சென்னையில் பாதுகாப்பு இல்லைன்னு சொல்றது இருக்கட்டும், பெண்கள் பள்ளிக்கு மற்றும் கல்லூரிக்குப் போய் படிக்கிறப்போ, தற்காப்புக்கலையைக் கற்றுக்கொள்ளுங்க.

சில பொறுக்கிகளுக்கு கடவுளே வந்து சொன்னாலும் கேட்கமாட்டாங்க. பெண்களை வந்து விலைபோகும் பொருள் போல் போதையில் ஏதோ சொல்றாங்க.

இப்போது எல்லாம் காவல் துறை மதுகுடித்துவிட்டு ஓட்டுவதைத் தீவிரமாகக் கண்காணிக்கணும். பெண்கள் அதேமாதிரி ஆண்கள் மாதிரி இருக்கணும். பெண்கள் தற்காப்புக் கலை கற்றுக்கொள்ள வேண்டும்.

சினிமாவையும் சூதாட்டத்தையும் ஒரே வகையில் பிரிச்சி ஜி.எஸ்.டி போட்டிருக்காங்க. அதனால்,மத்திய பட்ஜெட்டில், சினிமாவுக்கு இந்த வகைப்படுத்தலில் இருந்து வெளியே வந்து வரியைக் குறைத்தால் நன்றாக இருக்கும்.

இந்தியாவிலேயே தமிழ்நாட்டில் தான் இரண்டு வரி கட்டுறாங்க. அதை மோடி ஐயாவுக்கும், அண்ணாமலை அவருக்கும் கொடுத்திருந்தோம். இந்தியா முழுக்க ஒரு டேக்ஸ் கட்டினால் போதும் என்று பிரதமர் சொல்லியிருக்கிறார்.

ஆனால், தமிழ்நாட்டில் மட்டும் இரண்டு வரிகள் கட்டுகிறோம். சினிமாவும் சூதாட்டமும் ஒரே பிரிவில் இருப்பது வருத்தமாக இருக்கு. தமிழ் சினிமாவுக்கு ஏதாவது அறிவிப்புகள் விட்டார்கள் என்றால் மத்திய நிதியமைச்சரை நேரில் பார்த்து நன்றி தெரிவிப்போம்’’ எனக் கூறினார், நடிகர் விஷால்.