Thalapthy 69 Update: ஜனநாயகனாக வந்த விஜய்.. தளபதி 69 டைட்டில் ரிலீஸ்! குஷியில் ரசிகர்கள்..

ஜனநாயகனான விஜய்

அதன்படி, விஜய்யின் கடைசி மற்றும் 69வது படத்தின் பெயர் 'ஜனநாயகன்' எனத் தெரிகிறது. இந்தப் படத்தின் போஸ்டரே கவனம் ஈர்க்கும் வகையில் அமைந்துள்ளது. விஜய் அரசியலுக்கு வந்த நிலையில், அவர் பொது இடத்தில் நின்று செல்ஃபி எடுப்பது போன்றும் அவருக்கு பின் ஆயிரக் கணக்கானோர் நின்று கோஷமிட்டு குரல் எழுப்பது போன்றும் போஸ்டர் வெளியிடப்பட்டு ரசிகர்களை கவர்ந்து வருகிறது.

இதனால், விஜய்யின் கடைசி படமான ஜனநாயகத்தின் கதை அரசியலைத் தொடர்பு கொண்டு தான் இருக்கும் என ரசிகர்கள் கருத்து தெரிவித்து வருகின்றனர். மேலும், படத்தின் போஸ்டரில் நாங்கள் அவரை ஜனநாயகன் என அழைப்போம் என்றும் படக்குழு குறிப்பிட்டுள்ளது. 

ரீ-கிரியேட் செய்த விஜய்

விஜய் முன்னதாக மாஸ்டர் படத்தின் படப்பிடிப்பில் இருந்த சமத்தில் அவருக்கு சொந்தமான இடங்களில் ரெய்டு நடந்தது. இந்த சம்பவம் அவரது ரசிகர்களிடம் பெரும் அதிர்வலையை ஏற்படுத்திய நிலையில், அவர் நெய்வேலியில் படப்பிடிப்பு தளத்தில் அவரைக் காண வந்த ரசிகர்களை சந்தித்தார். அந்த சமயத்தில் அவர் வாகனம் மீது ஏறி நின்று எடுத்த செல்ஃபி தான் சில நாட்களுக்கு ஹாட் டாப்பிக்காக இருந்தது.

இந்நிலையில், அதே போன்ற புகைப்படத்தை விஜய்யின் படத்தின் ஃபர்ஸ்ட் லுக் போஸ்டராக வந்துள்ளதால், இந்தப் படத்திலும் விஜய் நிச்சயம் சம்பவம் செய்வார் என்பது தெரியவந்துள்ளதாக ரசிகர்கள் ஆர்பரித்து வருகின்றனர்.

ரசிகர்களின் யூகங்கள்

தமிழ் சினிமாவில் குறிப்பிட்ட சில படங்களே இயக்கி இருப்பினும், அதில் தன் கதை மற்றும் இயக்கத்தால் வெற்றி கண்டவர் இயக்குநர் ஹெச். வினோத். தன்னுடைய முதல் படத்திலேயே தமிழ் சினிமா மொத்தத்தையும் திரும்பிப் பார்க்க வைத்த இயக்குநரான ஹெச். வினோத் தற்போது நடிகர் விஜய்யின் கடைசி படமான தளபதி 69 படத்திற்கான வேலைகளில் முழு வீச்சில்இறங்கிய நிலையில், இந்தப் படத்தின் சின்னச் சின்ன அப்டேட்களையும் மக்கள் எதிர்பார்த்து வருவதுடன், அவர்களின் ஊகங்களையும் தெரிவித்து வருகின்றனர்.

அதன்படி, அரசியலுக்கு வருகை தரும் விஜய்யின் 69வது படத்தின் தலைப்பு நிச்சயம் நாளைய தீர்ப்பு என்று தான் வைக்கப்படும் என சில நாட்களாக அவரது ரசிகர்கள் கூறி வந்தனர். இது விஜய்யின் ஆரம்பகால கெரியரில் முக்கியமான படமாக அமைந்தது. அதுமட்டுமின்றி, தற்போதைய அரசியல் சூழலுக்கும் ஏற்ற பெயர் என்பதால் இது தான் வைக்கப்படும் என பலரும் கருத்து தெரிவித்து வந்தனர்.

பகவந்த் கேசரி ரீமேக்

அதுமட்டுமின்றி, விஜய், இயக்குநர் அனில் ரவிபுடி இயக்கத்தில் தெலுங்கு நடிகர் நந்தமுரி பாலகிருஷ்ணா நடித்த பகவந்த் கேசரி படத்தை தான் ரீமேக் செய்ய உள்ளார். இதுதான் தளபதி 69 படத்தின் கதா. இதற்காக அனில் ரவிபுடியுடன் பேச்சுவார்த்தை நடந்தது என்றும் கூறி வந்தனர். இதற்கிடையில், விடிவி கணேஷும் இதுகுறித்து பேசி தளபதி 69 படத்தை வைரலாக்கினார்.

தளபதி 69 விஜய்யின் கதாப்பாத்திரம் என்ன?

சினிமாவிலிருந்து விலகி அரசியலுக்கு செல்ல இருப்பதால், நடிகர் விஜய்யின் இந்தப் படம் நிச்சயம் அரசியலை மையப்படுத்தியே நகரும் என பலரும் கூறி வருகின்றனர். இந்த நிலையில், தற்போது தளபதி 69 படத்தில் விஜய் போலீஸ் அதிகாரியாகவே நடிக்க உள்ளார் எனக் கூறி வருகின்றனர்.

ஏற்கனவே, தீரன் அதிகாரம் ஒன்று படத்தில் கார்த்தியையும், வலிமை படத்தில் அஜித்தையும் போலீஸ் அதிகாரியாக நடிக்க வைத்து மிரட்டி இருப்பதால், ஹெச்.வினோத் விஜய்யின் கடைசி படத்தில் அவரை போலீஸ் அதிகாரியாகவே நடிக்க வைப்பார் என கருத்து தெரிவித்து வருகின்றனர்.

நடிகர் விஜய்யின் தளபதி 69 படத்தின் பூஜைகள் முடிந்து, படப்பிடிப்பு பணிகள் தொடங்கிய நிலையில், இதுபோன்ற தகவல்கள் பரவுவதால், ஒருவேளை தளபதி 69 படத்தில் விஜய் போலீசாகத்தான் நடிக்க உள்ளாரோ என பலரும் சந்தேகத்தில்உள்ளனர்.

தளபதி 69 அறிவிப்பு

நடிகர் விஜய் முழு நேர அரசியலில் ஈடுபடவுள்ள நிலையில், அவரது கடைசி படமான தளபதி 69ல் ஒரு நட்சத்திர பட்டாளமே நடித்து வருகிறது. இந்தப் படத்தில் விஜய்க்கு ஜோடியாக மீண்டும் பூஜா ஹெக்டே நடிக்க ஒப்பந்தம் ஆகியுள்ளார். வில்லனாக பாலிவுட் நடிகர் பாபி தியோலும் நடிக்கின்றனர்.

மேலும் இந்தப் படத்தில், பிரேமலு நடிகை மமிதா பைஜூ, பிரியாமணி, கௌதம் வாசுதேவ் மேனன், நரேன், பிரகாஷ் ராஜ் போன்றவர்கள் நடிக்க உள்ளதாக தளபதி 69 படத்தின் தயாரிப்பு நிறுவனமான கேவிஎன் புரொடக்ஷன்ஸ் அறிவித்தது.

ரசிகர்களுக்கு அதிர்ச்சி

தமிழ் திரைப்படத் துறையில் தனது ஆதிக்கத்தை செலுத்தி வந்த நடிகர் விஜய் கோலிவுட் ரசிகர்களை மட்டுமல்லாமல், இந்தியா முழுவதும் குறிப்பாக மலையாள ரசிகர்களை பெரிதும் கவர்ந்தவர். இவர், தற்போது தமிழக வெற்றிக் கழகம் எனும் கட்சியைத் தொடங்கி தீவிர அரசியலில் ஈடுபடவுள்ளதாக அறிவித்தார். அத்துடன் நில்லாமல், இனி படங்களில் நடிக்கப் போவதில்லை எனவும் அறிவித்து அவரது ரசிகர்களுக்கு பெரும் அதிர்ச்சியைகொடுத்தார்.