தேர்தல் என்றாலே திமுக - அதிமுக மட்டும்தான்! விஜய் அரசியலில் ஜெயிக்க இதை செய்ய வேண்டும் - எஸ்.வி. சேகர் பேச்சு

கடந்த 10 ஆண்டுகளுக்கு முன்பு நாங்கள் 'வாய்ஸ் ஆர்ட்டிஸ்ட் யூனியன்' என்று தொடங்கினோம். இது லேபர் கமிஷனில் பதிவு செய்யப்பட்டது. ஆனால் ராதாரவிக்கு இதற்கு ஒத்துவரவில்லை.

நாங்கள் மற்ற யூனியன்களில் உறுப்பினராக இருப்பது லேபர் கமிஷன் அலுவலகத்துக்கு மட்டும்தான் தெரியும். நான் 1984ஆம் ஆண்டிலிருந்து இருக்கிறேன். இப்போது ஒரு சட்டம் கொண்டு வந்து அதை நடைமுறைப்படுத்த சொல்கிறார்கள்.

அரசியலாக்க பார்க்கிறார்

டப்பிங் யூனியன் கட்டிடம் ரூ. 2 கோடிக்கு மேல் கட்டப்பட்டது. அது முறையாக இல்லை என நீதிமன்றம் அந்த கட்டிடத்தை இடிக்க சொல்லியது. ஆனால் திமுக அரசுதான் இதை இடிக்க சொன்னதாக ராதாரவி பரப்புரை செய்து வருகிறார். காரணம் பாஜகவில் இருப்பதால் இதை அரசியலாக்க பார்க்கிறார்.

அரசாங்கத்தின் உதவி இருந்தால் தான் எந்த துறையும் முன்னேறும். ஆனால் ராதாரவியின் தனது சுய நோக்கத்துக்காக, அரசை எதிர்த்து பேசுவது பல தொழிலாளர்களின் நலனை பாதிக்கும். நான் 11 யூனியங்களில் மெம்பராக உள்ளேன். ராதாரவி 7 முதல் 8 யூனியன்களில் மெம்பராக உள்ளார்.

எந்த யூனியனில் இருக்க வேண்டும் என்பது அவரவர் உரிமை. யாராலும் அதை தடுக்க முடியாது. யாருடைய தொழில் வாய்ப்பையும் முயற்சியையும் அவர்கள் பறிக்கக்கூடாது. ஆனால் அதை செய்து கொண்டிருக்கிறார்கள்.

தேர்தல் என்றாலே திமுக - அதிமுக தான்

தமிழ்நாட்டில் 25 ஆண்டுகள் ஆனாலும் பாஜக ஆட்சிக்கு வரவே முடியாது. 2026 சட்டப்பேரவை தேர்தல் மிகக் கடுமையாக இருக்கும். தற்போது திமுக பல நல்ல விஷயங்கள் கொண்டிருக்கிறது. மகளிருக்கு பேருந்தில் இலவச பயணம், மாதம் மகளிருக்கு ஆயிரம் ரூபாய். கல்லூரி படிக்கும் பெண்கள், ஆண்களுக்கு ஆயிரம் ரூபாய் என செய்வதால் அவர்களுக்கு ஒன்னறை கோடி ஓட்டுக்கள் இருக்கின்றன.

இன்னும் தேர்தலுக்கு ஒன்னரை ஆண்டுகள் இருக்கிறது. விஜய் தற்போதுதான் அரசியலுக்கு வந்துள்ளார். அவருக்கு மிகப்பெரிய கூட்டம் கூடியிருக்கிறது. அதை ஓட்டாக மாற்ற வேண்டியது அவர் கையில்தான் உள்ளது. ஆனால் கூட்டத்துக்கு வாக்குக்கும் சம்பந்தமில்லை.

காமராஜர் தேர்தலில் நிக்கும்போது, சோ மெரினாவில் பேசும்போது ஒரு லட்சம் பேர் கூடினார்கள். ஆனால் அந்த தேர்தலில் கல்லூரி மாணவனிடம் காமராஜர் மிக பெரிய தோல்வியை தழுவினார். தமிழ்நாட்டில் தேர்தல் என்றால் திமுக vs அதிமுக மட்டும் தான். மற்றவர்கள் சைடில் விளையாடலாம்.

சீமான் கட்சியில் இருந்துதான் விஜய் கட்சிக்கு செல்வார்கள்

தாக்கம் என்பது வேறு ஆட்சி பிடிப்பது என்பது வேறு. தேர்தலுக்கு இன்னும் 500 நாட்கள் வரை உள்ளது. அந்த நாட்கள் அவரது செயல்தான் விஜய்யின் எதிர்காலத்தை தீர்மானிக்கும். விஜய், விஜய் என்று யார் பேசுகிறார்களோ அவர்கள்தான் உண்மையில் பயப்படுகிறார்கள் என்று அர்த்தம் என்றார். விஜய் கட்சிக்கு யாராவது செல்வார்கள் என்றால் சீமான் கட்சியிலிருந்து தான் செல்வார்கள்.

விஜய்க்கு வயது உள்ளது. இன்னும் ஆறு முதல் ஏழு தேர்தல் வரை போட்டியிட்டு அவர் மக்கள் நம்பிக்கையை பெறலாம். இன்று ஸ்டாலின் முதலமைச்சராக இருக்கிறார் என்றால், மூன்று முறை தமிழகத்தில் சுற்றுப்பயணம் மேற்கொண்டுள்ளார். இப்போ மூன்று நாள் ஊரில் இல்லை. கேட்டால் கோவையில் இருக்கிறார் அங்கு இருக்கிறார், இங்கு இருக்கிறார் என கூறுகிறார்கள். விடியோ கான்பிரசிங் மூலம் திட்டத்தை தொடங்காமல் நேரில் சென்று தொடங்கி கட்சியை இன்றும் வளர்க்கிறார். அவரது ஸ்டாமினா, மன உறுதியுடன் இருந்தால் விஜய் ஜெயிக்கலாம்.

அரசியலுக்கு லாயக்கு இல்லாதவர் அண்ணாமலை

நானே செஃல்பி எடுத்து, 25 பேர் கூட வைத்துக்கொள்வேன் என்றால் அண்ணாமலை மாதிரி அரசியல் செய்தால் 40க்கு பூஜ்ஜியம் தான். நான் இதை ஒன்னரை வருடம் முன்னரே சொன்னேன். எனக்கு அவர் மீது கோபம் என்றார்கள். எனக்கு யார் மீது கோபம் இல்லை. அவர் பாஜக தலைவராக லாயக்கு இல்லை என்கிறார்கள். அவர் அரசியலுக்கு தகுதி இல்லாதவர். அவர் ஒழுங்க படிக்காம அரசியலுக்கு வந்தார். இப்போது எதோ படிக்கபோறேன்னு அறிக்கை விடுறார்.

தேவையில்லாமல் விஷயமாக தமிழகத்தில் பிராமணர்களுக்கு பாதுகாப்பு இல்லை என்கிறார்கள். யாரும் அவர்களை அடித்து கொள்ளவில்லை. இனப்படுகொலை என்கிற வார்த்தையை பயன்படுத்துகிறார்கள். பாஜவில் தான் பிராமணர்களுக்கு இனப்படுகொலை நடக்கிறது. கட்சியில் பிராமணர்கள் இல்லாமல் ஒழித்துவிட்டார்கள்.

திமுகவை திட்டிக்கொண்டால் இருந்தால் வளரமுடியாது. ஹார்லிக்ஸ், காம்பிளான் குடிச்சுகிட்டு நான் வளர்கிறேன் மம்மி என்றால் வீட்டில் இருப்பவர்கள் சந்தோஷபடுவார்கள். அவர் வாய திறந்தாலே பொய். ஒரு பத்திரிகையில் உடம்பு முழுவதும் வாய் இருக்கிறதென்றால் அவர் அண்ணாமலை தான் என்று குறிப்பிட்டுள்ளார்கள்.

வாந்தி எடுப்பது போல் பேசக்கூடாது

பிராமணர்களின் 50 சதவிகிதம் பேர் கையில் செல்போன் கூட இல்லாமல் உள்ளார்கள் தினசரி கூலி வேலை, கட்டிட வேலை புரோகிதம் போன்ற பணிகளை தான் செய்கிறார்கள்.

பொதுவெளியில் பேசும் பொழுது என்ன பேச வேண்டும் என்பதை விட எதை பேசக்கூடாது என்பதை தெரிந்து கொள்ள வேண்டும். மைக்கை பார்த்ததும் வாந்தி எடுப்பது போல் பேசக்கூடாது கஸ்தூரி பேசியது மிகவும் கண்டிக்காதது.

மேலும் 'பிராமணர் நல வாரியம்' அமைப்போம் என்று திமுக அறிவித்தால் அவர்களுக்காக பிரச்சாரம் செய்வோம். ஆனால் எந்த கட்சியிலும் சேர மாட்டேன், எந்த கட்சி இதைச் சொன்னாலும் அதற்கு சார்பாகப் பிரச்சாரம் செய்வேன்" என்று எஸ்.வி.சேகர் தெரிவித்தார்.