Actress Manorama: மனோரமா எனும் நடிப்பு ராட்சசியின் கதை
தமிழ் செய்திகள்  /  பொழுதுபோக்கு  /  Actress Manorama: மனோரமா எனும் நடிப்பு ராட்சசியின் கதை

Actress Manorama: மனோரமா எனும் நடிப்பு ராட்சசியின் கதை

Marimuthu M HT Tamil
Oct 10, 2023 05:42 AM IST

நடிகை மனோரமாவின் நினைவு நாள் இன்று அனுசரிக்கப்படுகிறது.

பன்முக நடிகை மனோரமாவின் நினைவுநாள்
பன்முக நடிகை மனோரமாவின் நினைவுநாள்

நகைச்சுவை, குணச்சித்திர வேடங்கள் என பல்வேறு மொழிகளில் 1500க்கும் மேற்பட்ட திரைப்படங்களில் நடித்திருக்கிறார், நடிகை மனோரமா. தமிழ்த்திரையுல ரசிகர்கள் இவரை ஆச்சி என்றே அன்போடு அழைக்கிறார்கள். இன்று தமிழ் திரை உலகில் அறிமுகமாகும் நகைச்சுவை நடிகைகளின் கனவு என்பது ஆச்சியின் இடத்தை பிடித்து விட வேண்டும் என்பது தான். ஆனால், அவரது இடத்தை யாராலும் பிடிக்கமுடியாது என்பதே நிதர்சனம்.

தென்னிந்தியாவின் 5 முதலமைச்சர்களுடன் நடித்த பெருமை கொண்ட மனோரமாவின் இயற்பெயர் கோபிசாந்தா. இவர் காசியப்பன் 'கிளாக்குடையார்' மற்றும் ராமாமிர்தம் ஆகியோருக்கு மகளாக பிறந்தார். மனோரமா, பழைய தமிழ்நாடு மாநிலத்தில், மன்னார்குடி அருகே திருகண்ணமங்கை என்னும் வசதியான குடும்பத்தில் பிறந்தார். இவரின் தந்தை ஒரு சாலை ஒப்பந்தக்காரராகப் பணியாற்றியவர். தந்தை காசியப்பன் கிளாக்குடையார் மனோரமாவின் தாயாா் ராமாமிா்தம் அவா்களின் தங்கையை இரண்டாம் தாரமாகத் திருமணம் புரிந்தார். இதையடுத்து கணவருடன் ஏற்பட்ட மனக்கசப்பால் புறக்கணிக்கப்பட்ட இராமாமிருதம் அம்மாள் மனோரமாவை அழைத்து கொண்டு, சிறுவயதில் காரைக்குடி அருகே உள்ள பள்ளத்தூர் என்ற ஊருக்கு குடிபெயர்ந்தார்.

மனோரமாவை ஆறாம் வகுப்பு வரை படிக்கவைத்தார், அவரது தாய். குடும்ப வறுமையின் காரணமாக பள்ளி படிப்பைத் தொடர முடியாத மனோரமா அங்குள்ள நாட்டுக்கோட்டை செட்டியார் வீடுகளில் வேலையாளியாக பல்வேறு பணிகளை செய்தார். பின், அவர்கள் தாயாருடன் பலகாரக் கடை நடத்தி வாழ்க்கையைத் தொடர்ந்தார். தனது பன்னிரெண்டாவது அகவையில் நாடகத்தில் நடிக்க களம் இறங்கினார், மனோரமா. " நாடக இயக்குனர் திருவேங்கடம், ஆர்மோனியக் கலைஞர் தியாகராஜன் ஆகியோர் இவருக்கு "மனோரமா" எனப் பெயர் சூட்டினர்.

மேடைகளில் தனது திறமையை வெளிப்படுத்திய மனோரமா 1958ஆம் ஆண்டு கவிஞர் கண்ணதாசனின் ’மாலையிட்ட மங்கை' திரைப்படத்தின் மூலம் நகைச்சுவை நடிகையாக சினிமா உலகத்துக்குள் அடியெடுத்து வைத்தார். இதையடுத்து தமிழ், தெலுங்கு, மலையாளம், கன்னடம், இந்தி, சிங்களம் என பல மொழிகளில் நடித்திருந்தார். தமிழில் 'களத்தூர் கண்ணம்மா', 'கொஞ்சும் குமரி', 'தில்லானா மோகனாம்பாள்', 'எதிர் நீச்சல்', 'பட்டிக்காடா பட்டணமா', 'காசேதான் கடவுளடா' எனத் தொடர்ந்து பல வெற்றிப் படங்களில் நடித்துத் தமிழ் சினிமாவில் தனக்கென்று ஒரு தனி இடத்தைப் பிடித்தார்.

நகைச்சுவை நடிப்பில் நாகேஷ் - மனோரமா இணை: நடிகர் நாகேஷ் - மனோரமா இருவரும் இணைந்து சந்திரோதயம், அன்னமிட்ட கை, சரஸ்வதி சபதம், தேர் திருவிழா, பூஜைக்கு வந்த மலர், கலாட்டா கல்யாணம் உள்ளிட்ட 19 திரைப்படங்களில் ரசிகர்களை கவர்ந்து இழுக்கும் காமெடி ஜோடியாக வலம் வந்தனர். இந்த ஜோடி திரையில் தோன்றினாலே ரசிகர்களுக்கு கொண்டாட்டம் தான் என்ற அளவிற்கு புகழின் உச்சிக்கே சென்றனர்.

தில்லானா மோகனாம்பாள் படத்தின் ஜில்ஜில் ரமாமணி கதாபாத்திரம், 'சம்சாரம் அது மின்சாரம்' திரைப்படத்தில் கண்ணம்மா பாத்திரம், "நடிகன்' திரைப்படத்தில் சத்யராஜை விரும்பும் பாத்திரம், 'சின்ன கவுண்டர்' திரைப்படத்தில் சுகன்யாவை வம்பிழுக்கும் பாத்திரம் என தான் நடித்த படங்களில் எல்லாம் ஆளுமையை செலுத்தியவர் மனோரமா.

1960 மற்றும் 1970-களில் நாகேஷ், சோ, தேங்காய் சீனிவாசன் நகைச்சுவை கலைஞர்களுடன் ஜோடி சேர்ந்த மனோரமா பின் அடுத்த தலைமுறையான ரஜினிகாந்த், கமல்ஹாசன் ஆகியோருடனும் இணைந்து குணச்சித்திர பாத்திரத்தில் ரசிக்க வைத்தார், மனோரமா. குறிப்பாக ரஜினிகாந்தின் அண்ணாமலை படத்தில் ரஜினியின் நிஜ தாய் போன்றே அற்புதமான நடிப்பை வெளிப்படுத்தியிருப்பார். மேலும், நடிகர்கள் கமல்ஹாசனுடன் இணைந்து அபூர்வசகோதரர்கள், மைக்கேல் மதனகாமராசன், எல்லாம் இன்பமயம் ஆகியப்படங்களில் சிறந்த நடிப்பை வெளிப்படுத்தியிருப்பார். அதன்பின் தலைமுறையான அஜித், விஜய், சூர்யா ஆகியோருடனும் அவர்களின் வேகத்திற்கு இணையாக ஈடுகொடுத்து நடித்து வந்தார்.

1000க்கும் மேற்பட்ட திரைப்படங்களில் நடித்த மனோரமா உலக கின்னஸ் சாதனைப் புத்தகத்தில் இடம் பிடித்தார். துரதிர்ஷ்டவசமாக 2015ம் ஆண்டு அக்டோபர் 10ம் தேதி உடல் நலக்குறைவால் மறைந்தார்.

ஆச்சி இந்த உலகை விட்டு மறைந்திருந்தாலும் இன்று தமிழ்த் திரை உலகில் நகைச்சுவை சாம்ராஜ்யத்தில் ராணியாக ஆட்சிசெய்து வருகிறார் என்பதே மறுக்க முடியாத உண்மை. இந்நிலையில் ஆச்சி மனோரமாவின் நினைவு நாளான இன்று அவர் குறித்த தகவல்களை பகிர்வதில் இந்துஸ்தான் டைம்ஸ் பெருமிதம் கொள்கிறது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

Google News: https://bit.ly/3onGqm9 

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.

Whats_app_banner

டாபிக்ஸ்

தமிழ்த் திரைப்பட செய்திகள், டிவி தொடர்கள், OTT செய்திகள், திரைப்பட விமர்சனங்கள், பாலிவுட், ஹாலிவுட் படங்கள் தொடர்பான சமீபத்திய அப்டேட்களை, பொழுதுபோக்கு பிரிவில் பார்க்கலாம்.