ஐபிஎல் 2025: பேட்டிங், பவுலிங்கில் அற்புதம்.. வெற்றியுடன் புள்ளிப்பட்டியலில் மேலே ஏறிய லக்னோ.. கீழே இறங்கிய குஜராத்

மேலும் படிக்க: ஐபிஎல் 2025: நல்ல தொடக்கம் தந்த கில், சாய் சுதர்சன்.. கடைசி நேரத்தில் கட்டுப்படுத்திய லக்னோ

லக்னோ சேஸிங்

முன்னதாக, டாஸ் வென்ற லக்னோ கேப்டன் ரிஷப் பந்த் பவுலிங்கை தேர்வு செய்த நிலையில், முதலில் பேட் செய்த குஜராத் டைட்டன்ஸ்் 20 ஓவரில் 6 விக்கெட் இழப்புக்கு 180 ரன்கள் எடுத்தது. இந்த ஸ்கோரை சேஸ் செய்த லக்னோ சூப்பர் ஜெயண்ட்ஸ் 19.3 ஓவரில் 4 விக்கெட் இழப்புக்கு 186 ரன்கள் எடுத்தது. இதன் மூலம் 3 பந்துகள் எஞ்சியிருக்க 4 விக்கெட் வித்தியாசத்தில் வெற்றி பெற்றது.

அதிகபட்சமாக நிக்கோலஸ் பூரான் 68, ஐடன் மார்க்ரம் 58 ரன்கள் அடித்தனர். குஜராத் பவுலர்களில் பிரசித் கிருஷ்ணா 2, ரஷித் கான் ஒரு விக்கெட்டை எடுத்தனர்.

இந்த வெற்றியால் லக்னோ சூப்பர் ஜெயண்ட்ஸ் அணி, குஜராத் டைட்டன்ஸ் அணியின் தொடர் வெற்றி பயனத்துக்கு முட்டுக்கட்டை போட்டுள்ளது. இந்த வெற்றியால் லக்னோ சூப்பர் ஜெயண்ட்ஸ் மூன்றாவது இடத்துக்கு முன்னேறியுள்ளது. குஜராத் டைட்டன்ஸ் முதல் இடத்தில் இருந்து இரண்டாவது இடத்துக்கு கீழே இறங்கியுள்ளது.

மேலும் படிக்க: ஐபிஎல் 2025: மூன்று பேர் மட்டுமே இரட்டை இலக்க ரன்கள்.. சீட்டுக்கட்டு போல் சரிந்த ராஜஸ்தான் ராயல்ஸ் விக்கெட்டுகள்

பந்த் தடுமாற்றம்

இந்த சீசனில் பேட்டிங்கில் தடுமாறும் ரிஷப் பந்த், இந்த போட்டியில் தனது பேட்டிங் ஆர்டரை மாற்றி ஓபனராக களமிறங்கினார். அடுத்தடுத்து பவுண்டரிகளை அடித்து அணிக்கு நல்ல தொடக்கத்தை அளித்தபோதிலும் 18 பந்துகளில் 21 ரன்கள் அடித்து அவுட்டானர். பேட்டிங்கில் ரிஷப் பந்த் மோசமான பார்ம் குஜராத் டைட்டன்ஸ் அணிக்கு எதிரான போட்டியிலும் தொடர்ந்துள்ளது. இருப்பினும் கடந்த நான்கு போட்டிகளில் குவித்த ஸ்கோரை விட அதிகமான ரன்களை அவர் எடுத்திருப்பது அணிக்கு ஆறுதல் தரும் விஷயமாக அமைந்துள்ளது.

அத்துடன் ஓபனிங்கில் களமிறங்கிய மார்க்ரம் - பந்த் ஆகியோர் இணைந்து முதல் விக்கெட்டுக்கு 65 ரன்கள் சேர்த்தனர். பவர்ப்ளே ஓவர்களில் லக்னோ சூப்பர் ஜெயண்ட்ஸ் விக்கெட் இழப்பின்றி 60 ரன்கள் குவித்தது.

மார்க்ரம் - பூரான் அதிரடி

ஆரஞ்சு தொப்பி வைத்திருப்பவரான பார்மில் இருக்கும் பூரான் இந்த போட்டியில் வழக்கபோல் தனது அதிரடியை தொடர்ந்தார். தொடக்கத்தில் இருந்து சிறப்பாக பேட் செய்து வரும் மார்க்ரமும் இணைந்து ரன் வேட்டையில் ஈடுபட்டார். இந்த ஜோடி இரண்டாவது விக்கெட்டுக்கு 58 ரன்கள் சேர்த்தது.

ஓபனராக பேட் செய்த மார்கரம் 26 பந்துகளில் அரைசதமடித்த நிலையில், 58 ரன்களில் அவுட்டானார். தனது இன்னிங்ஸில் 9 பவுண்டரி, ஒரு சிக்ஸர் அடித்தார்.

மேலும் படிக்க: ஐபிஎல் 2025: காயம் காரணமாக ஐபிஎல் போட்டிகளில் இருந்து விலகிய கிளென் பிளிப்ஸ்

இதேபோல் தொடர்ச்சியாக சிக்ஸர்களாக பறக்க விட்டு வான வேடிக்கை காட்டி வந்த நிக்கோலஸ் பூரான் 23 பந்துகளில் அரைசதத்தை கடந்தார். 34 பந்துகளில் 61 ரன்கள் அடித்த பூரான் தனது இன்னிங்ஸில் 7 சிக்ஸர்கள், ஒரு பவுண்டரி அடித்தார். இம்பேக்ட் வீரராக பேட் செய்ய வந்த ஆயுஷ் பதோனியும் சிறப்பாக பங்களிப்பு செய்து 28 ரன்கள் அடித்தார்.

அடிவாங்கிய சிராஜ், சாய் கிஷோர்

குஜராத் அணியின் ஸ்டிரைக் பவுலர்களாக கடந்த போட்டிகளில் ஜொலித்து வந்த முகமது சிராஜ், சாய் கிஷோர் ஆகியோர் இந்த போட்டியில் லக்னோ பேட்ஸ்மேன்களுக்கு எதிராக அடிவாங்கியுள்ளனர். சிராஜ் 4 ஓவர்களில் 50 ரன்கள் விட்டுக்கொடுத்து விக்கெட் எதுவும் வீழ்த்தவில்லை. அதேபோல் சாய் கிஷோர் 1.3 ஓவரில் 35 ரன்கள் வாரிவழங்கினார்.

கட்டுக்கோப்பாக பந்து வீசிய பிரசித் கிருஷ்ணா 4 ஓவரில் 26 ரன்கள் விட்டுக்கொடுத்து 2 விக்கெட் எடுத்தார். அத்துடன் வாஷிங்டன் சுந்தர் 4 ஓவரில் 28 ரன்கள் விட்டுக்கொடுத்து ஒரு விக்கெட் வீழ்த்தினார்.