ஐபிஎல் 2025: திணறடித்த குஜராத் பவுலர்கள்.. ஒற்றை இலக்கத்தில் 5 பேர் அவுட்! மும்பையை கரை சேர்த்த வில் ஜாக்ஸ், சூர்யகுமார்
குஜராத் பவுலர்கள் அபார பந்து வீச்சின் மூலம் மும்பை இந்தியன்ஸ் பேட்ஸ்மேன்களை திணறடித்தனர். மிடில் ஓவரில் வில் ஜாக்ஸ், சூர்யகுமார் யாதவ் பார்டனர்ஷிப் அமைத்த நிலையில், கோஸ் நல்ல பினிஷங்கை கொடுத்தார். இதனால் மும்பை இந்தியன்ஸ் 155 ரன்கள் எடுத்து கரை சேர்ந்துள்ளது.
ஐபிஎல் 2025 தொடரின் 56வது போட்டி மும்பை இந்தியன்ஸ் - குஜராத் டைட்ன்ஸ் அணிகளுக்கு இடையே மும்பை வான்கடே மைதானத்தில் நடைபெற்று வருகிறது. இந்த போட்டி தொடங்கு முன் மும்பை இந்தியன்ஸ் 11 போட்டிகளில் 7 வெற்றி, 4 தோல்வியுடன் புள்ளிப்பட்டியலில் மூன்றாவது இடத்தில் உள்ளது. குஜராத் டைட்டன்ஸ் 10 போட்டிகளில் 7 வெற்றி, 3 தோல்வியுடன் புள்ளிப்பட்டியலில் நான்காவது இடத்தில் உள்ளது.
மும்பை இந்தியன்ஸ் முந்தைய போட்டியில் ராஜஸ்தான் ராயல்ஸ் அணியை வீழ்த்தியது. குஜராத் டைட்டன்ஸ் முந்தைய போட்டியில் சன் ரைசர்ஸ்க்கு எதிராக வெற்றி பெற்றது. இரு அணிகளும் ப்ளேஆஃப் வாய்ப்பை உறுதி செய்துவிட்ட நிலையில், டாப் 2 இடத்தை தக்க வைத்துக்கொள்ளும் முயற்சியில் களமிறங்கியுள்ளன.
இந்த சீசனில் இந்த இரு அணிகளுக்கு இடையிலான முதல் மோதலில் குஜராத் வெற்றி பெற்றது. எனவே மும்பை இந்தியன்ஸ் இந்த முறை குஜராத்தை பழிதீர்க்கும் முனைப்பில் களமிறங்கியுள்ளது.
மும்பை இந்தியன்ஸ் கடந்த போட்டியில் விளையாடிய அதே அணியுடன் களமிறங்கியுள்ளது. குஜராத் அணியில் அர்ஷத் கான், ககிசோ ரபாடா ஆகியோர் சேர்க்கப்பட்டுள்ளனர்.
குஜராத் பவுலிங்
இந்த போட்டியில் டாஸ் வென்ற குஜராத் டைட்டன்ஸ் கேப்டன் சுப்மன் கில் பவுலிங்கை தேர்வு செய்துள்ளார். இதையடுத்து முதலில் பேட் செய்த மும்பை இந்தியன்ஸ் 20 ஓவரில் 8 விக்கெட் இழப்புக்கு 155 ரன்கள் எடுத்துள்ளது. அதிகபட்சமாக வில் ஜாக்ஸ் 53, சூர்யகுமார் யாதவ் 35, கோஸ் 27 ரன்கள் எடுத்துள்ளனர்.
குஜராத் பவுலர்களில் சாய் கிஷோர் 2 விக்கெட்டுகளை கைப்பற்றினார். ரஷித் கான், ஜெரால்ட் கோட்சி, முகமது சிராஜ், அர்ஷத் கான், பிரசித் கிருஷ்ணா ஆகியோர் தலா ஒரு விக்கெட் எடுத்தனர்.
முக்கிய பேட்ஸ்மேன்கள் ஏமாற்றம்
மும்பை இந்தியன்ஸ் முன்னணி பேட்ஸ்மேன்கள் ஏமாற்றம் அளிக்கும் இன்னிங்ஸை வெளிப்படுத்தினர். குஜராத் பவுலர்களின் டாப் கிளாஸ் பந்து வீச்சை சமாளிக்க முடியாமல் தங்களது விக்கெட்டுகளை பறிகொடுத்து பெவிலியன் திரும்பினர். ரியான் ரிக்கெல்டன் 2, ரோஹித் ஷர்மா 7, திலக் வர்மா 7, ஹர்திக் பாண்டியா 1, நமன் திர் 7 என ஒற்றை இலக்கத்தில் அவுட்டாகினர்.
வில் ஜாக்ஸ் - சூர்யகுமார் பார்ட்னர்ஷிப்
மும்பை பேட்ஸ்மேன்களில் வில் ஜாக்ஸ், சூர்யகுமார் யாதவ் ஆகிய இருவர் மட்டுமே நிதானமும், அதிரடியும் கலந்து ரன்குவிப்பில் ஈடுபட்டனர். இந்த ஜோடி மூன்றாவது விக்கெட்டுக்கு 71 ரன்கள் சேர்த்தனர்.
5 பவுண்டரி, 3 சிக்ஸர் என அதிரடி காட்டிய வில் ஜாக்ஸ் 35 பந்துகளில் 53 ரன்கள் அடித்து ரஷித் கான் பந்தில் வீழ்ந்தார். இதேபோல் சூர்யகுமார் யாதவ் 24 பந்துகளில் 5 பவுண்டரிகளுடன் 35 ரன்கள் அடித்து அவுட்டானார்.
கடைசி இரண்டு ஓவர்களில் அதிரடி கேமியோ இன்னிங்ஸை வெளிப்படுத்திய கார்பின் போஸ் 22 பந்துகளில் 27 ரன்கள் எடுத்தார்.
குஜராத் பவுலர்கள் அபாரம்
குஜராத் பவுலர்களில் ஸ்பின்னர்களான சாய் கிஷோர், ரஷீத் கான் மும்பை பேட்ஸ்மேன்களுக்கு நல்ல நெருக்கடியை தந்தனர். சாய் கிஷோர் 4 ஓவரில் 34 ரன்கள் விட்டுக்கொடுத்து 2 விக்கெட்டுகளை வீழ்த்தினார். ரஷித் கான் 4 ஓவரில் 21 ரன்கள் மட்டுமே விட்டுக்கொடுத்தார்.
இதேபோல் வேகப்பந்து வீச்சாளர்களில் அர்ஷத் கான் 3 ஓவரில் 18 ரன்கள் விட்டுக்கொடுத்து ஒரு விக்கெட் எடுத்தார். பிரசித் கிருஷ்ணா 4 ஓவரில் 37 ரன்கள் என அதிகமாக வாரி வழங்கியபோதிலும், இவர்தான் அதிகபட்சமாக 10 டாட் பந்துகளை வீசியுள்ளார். அத்துடன் அர்ஷத் கானும் 10 டாட் பந்துகளை வீசினர்.
Muthu Vinayagam Kosalairaman
