ஐபிஎல் 2025: க்ருனால் அதிரடி.. டெல்லிக்கு பதிலடி.. புள்ளிப்பட்டியலில் டாப் இடத்துக்கு சென்ற ஆர்சிபி

இந்த இரு அணிகளுக்கு இடையிலான முந்தைய மோதலில் டெல்லி கேபிடல்ஸ் வெற்றி பெற்றது. எனவே டெல்லி கேபிடல்ஸ் அணிக்கு பதிலடி தரும் போட்டியாக ஆர்சிபிக்கு இது அமைந்துள்ளது.

இந்த போட்டியில் டெல்லி கேபிடல்ஸ் அணியில் டூ பிளெசிஸ் அணிக்கு மீண்டும் திரும்பினார். ஆர்சிபி அணியில் ஓபனர் சால்ட்க்கு பதிலாக ஜேக்கப் பீதல் சேர்க்கப்பட்டார்.

மேலும் படிக்க: ஐபிஎல் 2025: பவுலிங்கில் பும்ரா, போல்ட் தெறி சம்பவம்.. லக்னோவை பழிதீர்த்த மும்பை இந்தியன்ஸ்

முதலில் பேட் செய்த டெல்லி கேபிடல்ஸ் 162 ரன்கள் எடுத்த நிலையில், இந்த ஸ்கோரை சேஸ் செய்த ஆர்சிபி 165 ரன்கள் எடுத்து 6 விக்கெட் வித்தியாசத்தில் வெற்றி பெற்றது

ஆர்சிபி சேஸிங்

முன்னதாக, டாஸ் வென்ற ஆர்சிபி கேப்டன் ராஜத் பட்டிதால் பவுலிங்கை தேர்வு செய்த நிலையில், முதலில் பேட் செய்த டெல்லி கேபிடல்ஸ் 20 ஓவரில் 8 விக்கெட் இழப்புக்கு 162 ரன்கள் எடுத்தது. இந்த ஸ்கோரை சேஸ் செய்த ஆர்சிபி அணி 18.3 ஓவரில் 4 விக்கெட் இழப்புக்கு 165 ரன்கள் எடுத்து, 9 பந்துகள் எஞ்சியிருக்க 6 விக்கெட்டுகள் வித்தியாசத்தில் வெற்றி பெற்றது. டெல்லிக்கு எதிரான முந்தைய மோதலில் பெற்ற தோல்விக்கு ஆர்சிபி பதிலடி கொடுத்ததுடன், இந்த வெற்றிக்கு பின்னர் புள்ளிப்பட்டியலிலும் டாப் இடத்துக்கு முன்னேறியது.

அதிகபட்சமாக க்ருனால் பாண்டியா 73, விராட் கோலி 51 ரன்கள் அடித்தனர். டெல்லி பவுலர்களில் சிறப்பாக பந்து வீசிய கேப்டன் அக்சர் படேல் 2 விக்கெட்டுகளை கைப்பற்றினார்.

விராட் கோலி நிதானம்

ஆர்சிபி அணியில் சால்ட்க்கு பதிலாக சேர்க்கப்பட்ட ஜேக்கப் பீதல் 12 ரன்னில் அவுட்டாகி முதல் ஆளாக வெளியேறினார். இதன் பின்னர் இம்பேக்ட் வீரராக தேவ்தத் படிக்கல் களமிறக்கப்பட்டார். ஆனால் அவர் எந்த தாக்கத்தையும் ஏற்படுத்தாமல் டக் அவுட்டான நிலையில், அடுத்து வந்த கேப்டன் பட்டிதார் 6 ரன்னில் நடையை கட்டினார்.

மேலும் படிக்க: எனக்கும் கோலிக்கும் இடையே மெல்லிய கோடும் இருக்கும்.. மனம் திறந்து பேசிய தோனி

பவர்ப்ளே முடிவில் மூன்று முக்கிய விக்கெட்டுகளை இழந்த ஆர்சிபி அணி 35 ரன்கள் மட்டுமே எடுத்தது. ஓபனராக களமிறங்கிய கோலி விக்கெட் சரிவை தடுக்கும் விதமாக நிதான ஆட்டத்தை கடைப்பிடித்தார். அவ்வப்போது பவுண்டரிகளை அடித்த கோலி, ஐந்தாவது பேட்ஸ்மேனாக களமிறங்கிய க்ருனால் பாண்டியாவுடன் இணைந்து பார்ட்னர்ஷிப் அமைத்தார். பொறுமையாக ரன்களை சேர்த்து வந்த கோலி 45 பந்துகளில் அரைசதத்தை எட்டினார். அதன் பின்னர் 51 ரன்னில் முக்கியமான கட்டத்தில் அவுட்டானார்.

க்ருனால் அதிரடி

அணியின் ஸ்கோர் 4 ஓவரில் 3 விக்கெட் இழப்புக்கு 26 ரன்கள் இருந்தபோது ஆல்ரவுண்டர் க்ருனால் பாண்டியா களமிறக்கப்பட்டார். வழக்கமான பேட்டிங் ஆர்டரில் இருந்து புரொமோட் செய்யப்பட்ட க்ருனால் தொடக்கத்தில் நிதானத்தை வெளிப்படுத்த பின்னர் மெல்ல மெல்ல கியரை மாற்றி அதிரடியை வெளிப்படுத்த தொடங்கினார்.

இவருடன் பேட் செய்த கோலி ஸ்டிரைக் ரொட்டேட் செய்ய, க்ருனால் கிடைத்த வாய்ப்புக்களை பவுண்டரி, சிக்ஸர்களாக மாற்றினார். இவரது அதிரடியால் அணியின் ஸ்கோர் உயர்ந்த நிலையில் 38 பந்துகளில் அரைசதத்தை எட்டினார்.

மேலும் படிக்க: ப்ளேஆஃப் வாய்ப்புக்கு நிலைத்தன்மை, குழுவாக விளையாடுவது முக்கியம்.. பிரசித் கிருஷ்ணா

அதன் பின்னர் அதிரடியை தொடர்ந்த க்ருனால் கடைசி வரை களத்தில் இருந்து ஆட்டத்தை பினிஷ் செய்தார். சிறிய கேமியோ இன்னிங்ஸை வெளிப்படுத்திய டிம் டேவிட் 5 பந்துகளில் 19 ரன்கள் அடித்து அவுட்டாகாமல் இருந்தார்.

டெல்லி பவுலர்களில் முகேஷ் குமார் 3.1 ஓவரில் 51 ரன்களை வாரி வழங்கினார். நெருக்கடி தரும் விதமாக பவுலிங் செய்த அக்சர் படேல் 4 ஓவரில் 19 ரன்கள் மட்டும் விட்டுக்கொடுத்து 2 விக்கெட்டுகளை வீழ்த்தினார்.