IND vs AUS 3rd T20: தோல்வி பயத்தால் மாற்றம்..அதிரடி வீரரை களமிறக்கும் ஆஸ்திரேலியா!
இந்தியாவுக்கு எதிரான மீதமுள்ள மூன்று போட்டிகளுக்கான டி20 அணியில் மாற்றங்களை செய்துள்ளது ஆஸ்திரேலியா. உலகக் கோப்பையை வென்ற ஆஸ்திரேலியா அணியைச் சேர்ந்த 6 வீரர்கள் விடுவிக்கப்பட்டனர்.
உலகக்கோப்பை வென்ற உற்சாகத்தோடு ஆஸ்திரேலியா அணி இந்தியாவில் சுற்றுப் பயணம் செய்து 5 போட்டிகள் கொண்ட டி20 தொடரில் விளையாடி வருகிறது. பெரும்பாலான நட்சத்திர வீரர்கள் இல்லாமல் விளையாடி வரும் அந்த அணி சற்றுதடுமாறி வருகிறது.
விசாகப்பட்டினத்தில் நடைபெற்ற முதல் டி20 ஆட்டத்தில் 2 விக்கெட்கள் வித்தியாசத்தில் வெற்றி பெற்றது. அடுத்து திருவனந்தபுரத்தில் நடைபெற்ற 2-வது ஆட்டத்தில் முதலில் பேட்டிங் செய்த இந்திய அணி 235 ரன்களை குவித்தது. அடுத்து ஆடிய ஆஸ்திரேலிய அணியால் 191 ரன்கள் மட்டுமே எடுக்க முடிந்தது. இதன் மூலம் 44 ரன்கள் வித்தியாசத்தில் இந்திய அணி அபார வெற்றி பெற்றது. இதன்மூலம் டி 20 தொடரில் இந்திய அணி 2-0 என முன்னிலை வகிக்கிறது.
இந்த சூழலில் கவுகாத்தியில் இன்று நடைபெறும் மூன்றாவது டி20 ஆட்டத்தில் இந்தியா வெற்றி பெறும்பட்சத்தில் தொடரை கைப்பற்றி விடும். ஆனால், ஆஸ்திரேலிய அணி அடுத்த 3 போட்டிகளையும் வென்றால் மட்டுமே தொடரை கைப்பற்ற முடியும்.
இந்த நிலையில் தான் ஆஸ்திரேலிய அணி அதிரடி மாற்றங்களை செய்துள்ளதாக தகவல் வெளியாகி இருக்கிறது. அதன்படி, இந்தியாவுக்கு எதிரான ஐந்து போட்டிகள் கொண்ட டி20 தொடரில் இருந்து உலகக் கோப்பையை வென்ற அணியில் இடம்பெற்ற 7 வீரர்களில் ஆறு பேரை விடுவிக்க ஆஸ்திரேலியா முடிவு செய்தது. இன்று (நவ.28) கவுகாத்தியில் நடைபெறும் மூன்றாவது டி20 போட்டிக்குப் பிறகு க்ளென் மேக்ஸ்வெல், மார்கஸ் ஸ்டோனிஸ், ஜோஷ் இங்கிலிஸ் மற்றும் சீன் அபோட் ஆகியோர் நாடு திரும்புவார்கள் என்றும், ஸ்டீவ் ஸ்மித் மற்றும் ஆடம் ஜம்பா ஏற்கனவே நாடு திரும்பியதாகவும் தெரிவித்துள்ளது. உலகக் கோப்பைக்கு முன்னதாக இந்தியாவுக்கு எதிராக மூன்று போட்டிகள் கொண்ட தொடரில் விளையாடிய ஆஸ்திரேலியாவின் ஒருநாள் தொடர் அணியில் இந்த வீரர்களில் பெரும்பாலானோர் ஒரு பகுதியாக இருந்தனர்.
உலகக்கோப்பையை வென்ற ஆஸ்திரேலிய அணியில் இடம்பெற்ற ட்ராவிஸ் ஹெட்டை டி20 தொடரில் களமிறக்க ஆஸ்திரேலியா திட்டமிட்டுள்ளது. இந்தியாவுக்கு எதிராக மீதமுள்ள ஆட்டங்களில் அவர் விளையாடுவார் எனவும் தெரிவிக்கப்பட்டுள்ளது. இன்றைய ஆட்டத்தில் அவர் களமிறக்கப்படலாம் என எதிர்பார்க்கப்படுகிறது. டி20 அணியில் மாற்றங்களைப் பொருத்தவரை, விக்கெட் கீப்பர் ஜோஷ் பிலிப் மற்றும் பிக்-ஹிட்டர் பென் மெக்டெர்மாட் ஆகியோர் ஏற்கனவே கவுகாத்தியில் உள்ள அணியுடன் இணைந்துள்ளனர்.
ராய்ப்பூரில் நான்காவது டி20 போட்டிக்கு முன்னதாக பென் துவர்ஷுயிஸ் மற்றும் ஆஃப் ஸ்பின்னர் கிறிஸ் கிரீன் ஆகியோர் புதன்கிழமை அணியில் சேர வாய்ப்புள்ளது. ஆஸ்திரேலிய அணி நிர்வாகம் தங்கள் அணியில் ஒரு ஸ்பெஷலிஸ்ட் ஃபிங்கர் ஸ்பின்னரை சேர்க்க வேண்டியதன் அவசியத்தை உணர்ந்த பிறகு கிரீன் நான்காவது டி20ஐயில் அறிமுகமாக உள்ளார்.
இந்திய தொடருக்கான புதுப்பிக்கப்பட்ட ஆஸ்திரேலிய டி20 அணி :
மேத்யூ வேட் (கேப்டன்), ஜேசன் பெஹ்ரன்டோர்ஃப், டிம் டேவிட், பென் ட்வார்ஷூயிஸ், நாதன் எல்லிஸ், கிறிஸ் கிரீன், ஆரோன் ஹார்டி, ட்ராவிஸ் ஹெட், பென் மெக்டெர்மாட், ஜோஷ் பிலிப், தன்வீர் சங்கா, மேட் ஷார்ட், கேன் ரிச்சர்ட்சன்
டாபிக்ஸ்