4484 பந்துகளுக்கு பிறகு பும்ரா ஓவரில் அடிக்கப்பட்ட சிக்ஸ்.. அறிமுக ஆட்டத்திலேயே அசத்திய 19 வயது ஆஸி., வீரர்
சாம் கான்ஸ்டாஸ் அந்த ஓவரின் இரண்டாவது பந்தில் சிக்ஸர் அடித்து வரலாறு படைத்தார். 2021 ஆம் ஆண்டுக்குப் பிறகு டெஸ்டில் ஜஸ்பிரித் பும்ரா வீசிய பந்தில் சிக்ஸர் அடித்த உலகின் முதல் பேட்ஸ்மேன் ஆனார். கடைசியாக பும்ரா ஓவரில் சிக்ஸர் அடித்ததும் ஆஸி., பேட்ஸ்மேன் தான். அவர் கேமரூன் கிரீன்.
4484 பந்துகளுக்கு பிறகு பும்ரா ஓவரில் சிக்ஸர் அடித்த வீரர் என்ற வரலாற்று சாதனையை படைத்தார் ஆஸி., பேட்ஸ்மேன் கான்ஸ்டாஸ். இவருக்கு வயது 19. இந்த மேட்ச்சில்தான் சர்வதேச கிரிக்கெட்டில் அறிமுகமானார். முதல் மேட்ச்சிலேயே அரை சதம் விளாசிய அவர், 60 ரன்கள் எடுத்து ஆட்டமிழந்தார்.
ஆஸ்திரேலிய அணி டாஸ் வென்று பேட்டிங் தேர்வு செய்தது. முதல் இன்னிங்சில் ஆஸி., விளையாடி வருகிறது. கவாஜா, லபுசேன் ஆகியோரும் அரை சதம் விளாசி அதிரடி காண்பித்து வருகின்றனர்.
மெல்போர்ன் கிரிக்கெட் மைதானத்தில் நடக்கும் பாக்சிங் டே டெஸ்டில் பேட்டிங் செய்யும் போது கான்ஸ்டாஸ் பின்வாங்கவில்லை. இந்தியாவுக்கும் ஆஸ்திரேலியாவுக்கும் இடையிலான 4வது டெஸ்ட் போட்டியின் முதல் நாள் ஆட்டத்தில் ஒரு மணி நேர ஆட்டத்தில் 52 பந்துகளில் அரை சதத்தை அடித்தார். முதல் ஓவரிலேயே அவர் களமிறங்கினார். கான்ஸ்டாஸ் ஆறு பவுண்டரிகள் மற்றும் இரண்டு சிக்ஸர்களை விளாசி வெளியேறினார்.
20வது ஓவரை ஜடேஜா வீசினார். அப்போது கான்ஸ்டாஸ் எல்பிடபிள்யூ ஆனார்.
முன்னதாக, ரிவர்ஸ் ஸ்கூப், ஸ்கூப் ஷாட்களை ஆடினார் கான்ஸ்டாஸ். ஜஸ்பிரித் பும்ரா ஓவரில் ஒரு சிக்ஸரை அவர் அடித்தார், அப்போது விராட் கோலி, சாம் கான்ஸ்டாஸ் மீது நேருக்கு நேர் மோதினார். இதனால், இருவரும் சிறிது நேரம் மைதானத்தில் முறைத்துக் கொண்டனர். வாக்குவாதம் செய்தனர். கவாஜா இருவரையும் சமாதானம் செய்தார். கோலி மீதான தன்னுடைய கோபத்தை, கான்ஸ்டாஸ் பும்ரா வீசிய பந்தின் மீது வெளிப்படுத்தினார்.
உண்மையில், 10வது ஓவருக்குப் பிறகு, விராட் கோலி மறுமுனையில் ஸ்லிப்பில் சென்றார். அதே நேரத்தில் சாம் கான்ஸ்டாஸ் தனது கிரீஸை மாற்றிக் கொண்டிருந்தார். அப்போது, இருவருக்கும் இடையே மோதல் ஏற்பட்டது. அந்த மோதலில் விராட் கோலியின் தோள்பட்டையும், சாம் கான்ஸ்டாஸ் தோள்பட்டையும் ஒன்றோடு ஒன்று தாக்கியது. இருப்பினும், அது யாருடைய தவறு என்ற எதிர்வினை மைதானத்தில் இருந்தது.
பாக்சிங் டே டெஸ்ட்
பாக்ஸிங் டே டெஸ்ட் என்பது குத்துச்சண்டையில் மல்லுக்கட்டுவது போன்று என்ற அர்த்தம் கிடையாது. கிறிஸ்துமஸுக்கு அடுத்த நாள் ஆஸ்திரேலியாவில் விளையாடப்படும் கிரிக்கெட் போட்டி பாக்ஸிங் டே என்றழைக்கப்படுகிறது. கிறிஸ்துமஸ் பண்டிகையையொட்டி மேலை நாடுகளில் தேவாலயங்கள் முன் பெரிய பாக்ஸ் ஒன்று வைக்கப்படுவது வழக்கம். அதில் சேரும் பரிசுப் பொருட்கள், பணம் ஆகியவற்றை கிறிஸ்துமஸுக்கு மறுநாள் அதாவது டிசம்பர் 26ம் தேதி பிரித்து ஏழைகளுக்கு கொடுக்கும் முறை இருந்து வருகிறது.
அன்றைய தினத்தில் ஆஸ்திரேலியாவில் கிரிக்கெட் நடத்துவது வழக்கமானது. இதையொட்டி அந்தப் போட்டியை பாரம்பரியமாக ஆஸ்திரேலியா நடத்தியும் வருகிறது. கிறிஸ்துமஸுக்கு அடுத்த நாள் ஏதோ ஒரு நாட்டு அணியுடன் கிரிக்கெட் போட்டியை ஆஸ்திரேலியா கிரிக்கெட் வாரியம் ஏற்பாடு செய்திருக்கும்.
அந்த வகையில் இந்தமுறை இந்தியாவுடன் டெஸ்ட் போட்டி நடைபெறவுள்ளது. இது பார்டர்-கவாஸ்கர் டெஸ்ட் தொடருடன் வருகிறது. இத்தொடரின் 4வது டெஸ்ட் போட்டி நாளை மெல்போர்னில் காலை 5 மணிக்கு தொடங்குகிறது.
