Euro 2024: ஜார்ஜியாவிடம் பலத்த அடி வாங்கிய போர்ச்சுகல்! மோசமான சாதனை புரிந்த கிறிஸ்டியானா ரொனால்டோ

யூரோ 2024 கோப்பை தொடர் ஜெர்மனியில் நடைபெற்று வருகிறது. இந்த முறை மொத்தம் 24 அணிகள் இடம்பிடித்துள்ளது. புதிய அணியாக ஜார்ஜியா களமிறங்கியுள்ளது. மொத்தம் 6 குரூப்கள், ஒவ்வொரு குரூப்களிலும் 4 அணிகள் லீக் சுற்றுகளில் மோதி வருகின்றன.

போர்ச்சுகலை வீழ்த்திய ஜர்ஜியா

குரூப் எஃப் பிரிவில் இடம்பிடித்திருக்கும் போர்ச்சுகல் - ஜார்ஜியா அணிகளுக்கு இடையிலான போட்டி நடைபெற்றது. பரபரப்பான இந்த போட்டியில் ஜார்ஜியா 2-0 என்ற கோல் கணக்கில் வெற்றி பெற்றது. இந்த போட்டி முழுவதும் 73 சதவீதம் வரை பந்தை தனது கட்டுப்பாட்டில் வைத்திருந்த போதிலும் போர்ச்சுகல் அணியால் ஒரு கோல் கூட அடிக்க முடியவில்லை.

ஆட்டம் தொடங்கிய இரண்டாவது நிமிடத்தில் க்விச்சா க்வரத்ஸ்கேலியா என்பவரும், பின்னர் 57வது நிமிடத்தில் பெனால்டி வாய்ப்பை பயன்படுத்தி ஜார்ஜஸ் மிகாவுடாட்ஜே என்பவரும் ஜார்ஜியா அணிக்காக கோல்கள் அடித்தனர். யூரோ கோப்பை தொடரில் ஜார்ஜியா பெற்ற முதல் வெற்றியாக இந்த போட்டி அமைந்துள்ளது.

கிறிஸ்டியானோ ரொனால்டோ மோசமான சாதனை

ஜார்ஜியாவுக்கு எதிரான இந்த போட்டியில் போர்ச்சுகல் ஸ்டார் வீரரான கிறிஸ்டியானோ ரொனால்டோ தனது வாழ்க்கையில் முதல் முறையாக பெரிய சர்வதேச போட்டியின் குரூப் போட்டியில் ஒரு கோல் கூட அடிக்காமல் இருந்துள்ளார்.

இந்த போட்டியில் தோல்வியை தழுவினாலும், குரூப் எஃப் பிரிவில் விளையாடிய 3 போட்டிகளில் இரண்டு வெற்றி, ஒரு தோல்வியுடன் முதலிடத்தில் உள்ளது. வரும் ஜூலை 1ஆம் தேதி ரவுண்ட் ஆஃப் 16 சுற்றில் ஸ்லோவேனியாவை தனது முதல் போட்டியில் எதிர்கொள்கிறது.

ரொனால்டோவுக்கு மோசமான தொடர்

போர்ச்சுகலுக்காக ரொனால்டோ விளையாடும் 10வது பெரிய சர்வதேச தொடராக யூரோ 2024 உள்ளது. அவர் இதுவரை விளையாடிய தொடர்களில், குரூப் பிரிவு போட்டிகளில் ஒரு முறையாவது கோல் அடித்துள்ளார். 39 வயதான ரொனால்டோ முக்கிய சர்வதேச தொடர்களின் கடைசி 10 சர்வதேச போட்டிகளில், பெனால்டி அல்லாத கோல் அடிக்காமல் இருந்துள்ளார். 

2004இல் இரண்டு , 2008, 2012இல் மூன்று, 2016இல் மூன்று, 2020இல் 5 என இதுவரை 14 கோல்கள் அடித்துள்ள ரொனால்டோ, யூரோ கோப்பை வரலாற்றில் அதிக கோல் அடித்த வீரராக உள்ளார்.

ஆனால் ஜார்ஜியாவுக்கு எதிரான ஆட்டத்தின் போது ரொனால்டோ மற்றொரு முக்கிய சாதனையும் நிகழ்த்தினார். அதாவது  ஃபிஃபா உலகக் கோப்பையில் 22 போட்டிகள் மற்றும் ஐரோப்பிய சாம்பியன்ஷிப்பில் 28 போட்டிகள் உட்பட முக்கிய சர்வதேச போட்டிகளில் போர்ச்சுகலுக்காக தனது 50வது போட்டியில் களமிறங்கியுள்ளார்.

போர்ச்சுகல் அணிக்காக 130 கோல்கள் அடித்து அதிக கோல் அடித்த வீரர் என்ற பெருமையை பெற்றவராக ரொனால்டோ உள்ளார்.

ஸ்பெயின், ஜார்ஜியா, டென்மார்க், ஜெர்மனி, போர்ச்சுகல், ஸ்லோவேனியா, பிரான்ஸ், பெல்ஜியம், ருமேனியா, நெதர்லாந்து, ஆஸ்திரேலியா, துருக்கி, இங்கிலாந்து, ஸ்லோவாக்கியா, சுவிட்சர்லாந்து மற்றும் இத்தாலி ஆகிய அணிகள் ரவுண்ட் ஆப் 16 சுற்றுக்கு முன்னேறியுள்ளன.

யூரோ கால்பந்து போட்டிகள் ஜூன் 14 முதல் ஜூலை 14 வரை ஜெர்மனியில் நடைபெறுகிறது, அங்கு இத்தாலி தனது பட்டத்தை பாதுகாக்கிறது, அதே நேரத்தில் போர்ச்சுகல் தனது இரண்டாவது பட்டத்தை துரத்துகிறது, 2016 இல் முதல் பட்டத்தை வென்றது. (ஏஎன்ஐ)

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews 

Facebook" https://www.facebook.com/HTTamilNews 

You Tube: https://www.youtube.com/@httamil 

Google News: https://tamil.hindustantimes.com/ 

ஹிந்துஸ்தான் தமிழ் வாட்ஸ் அப் குடும்பத்தில் இணைய கீழே உள்ள லிங்கை கிளிக் செய்யுங்கள்.

https://www.whatsapp.com/channel/0029Va9NEUA7IUYU4eBTc81v