Benefits of Mapillai samba Rice : திருமணத்தில் மணமகனுக்கு ஸ்பெஷலாக சமைத்து தரப்படும் அரிசி! அப்டி என்ன ரகசியம் இருக்கு?

தமிழகத்தின் பாரம்பரிய வரலாற்றில் முக்கிய இடம்பிடித்துள்ள அரிசி மாப்பிள்ளை சம்பா அரிசி. அந்த காலத்தில் இளவட்ட கல் என்ற ஒன்று இருக்குமாம், அதை தூக்குபவர்களுக்குத்தான் பெண்ணை தருவார்கள்.

அவர்கள் அந்தக்கல்லை தூக்கிவிட்டால் பலசாலிகளாக கருதப்படுவார்கள். அந்த பலம் பெறுவதற்கு உதவக்கூடிய அரிசி இது என்பதால், இது மாப்பிள்ளை சம்பா அரிசி என்று அழைக்கப்படுகிறது. இரும்புச்சத்து, நார்ச்சத்து, வைட்டமின்கள் மற்றும் ஆன்டி ஆக்ஸிடன்ட்கள் நிறைந்தது இந்த அரிசி.

100 கிராம் அரிசியில் 200 கலோரிகள் உள்ளது. மொத்த கொழுப்பு 2-3 கிராம், கெட்ட கொழுப்பு 0 சதவீதம், சோடியம் 6 மில்லிகிராம், பொட்டாசியம் 200 மில்லிகிராம், கார்போஹைட்ரேட் 60 கிராம், நார்ச்சத்துக்கள் 6 கிராம், சர்க்கரை ஒன்றரை கிராம், புரதம் 6 கிராம், இரும்புச்சத்து 0.9 மில்லிகிராம், வைட்டமின் இ 0.2 மில்லிகிராம், வைட்டமின் பி2 0.16 மில்லிகிராம், வைட்டமின் பி3 1.1 மில்லிகிராம், கால்சியம் 40 மில்லிகிராம், பாஸ்பரஸ் 200 மில்லிகிராம், மெக்னீசியம் 48 மில்லிகிராம் உள்ளது.

எடை மேலாண்மை

மாப்பிள்ளை சம்பா அரிசியில் உள்ள நார்ச்சத்துக்கள் உடல் எடை மேலாண்மைக்கு உதவுகிறது. இதில் உள்ள பசியை கட்டுப்படுத்தும் உட்பொருட்கள் உங்களுக்கு வயிறு நிறைந்த உணர்வைக் கொடுக்கும். இதனால் நீங்கள் உட்கொள்ளும் கலோரிகள் குறையும். அதிகளவு நார்ச்சத்துக்கள் நிறைந்துள்ளதால், அது எடை மேலாண்மைக்கு உதவும். அதில் கொழுப்பும் குறைவு.

நீரிழிவு நோய்க்கு உதவும்

மாப்பிள்ளை சம்பா அரிசி, உடலில் குளுக்கோஸ் அளவை மெல்ல மெல்ல அதிகரிக்கக் கூடியது. இதனால் டைப் 2 சர்க்கரை நோய்க்கு சிறந்தது. இதை சமைத்து உண்ணும்போது மிகவும் அதிக பலன்களை சர்க்கரை நோய்க்கு தருகிறது. உடல் எடை மேலாண்மைக்கும் உதவுகிறது. கருப்பு கவுனி அரிசியைப்போல் எண்ணற்ற நன்மைகளை கொண்டது மாப்பிள்ளை சம்பா அரிசி.

செரிமான ஆரோக்கியம்

மாப்பிள்ளை சம்பா அரிசியில் உள்ள நார்ச்சத்துக்கள், உடல் எடை குறைக்க மட்டும் பயனளிப்பதில்லை, செரிமான மண்டலத்தின் ஆரோக்கியத்தையும் அதிகரிக்கிறது. குடலில் நல்ல பாக்டீரியாக்களை அதிகரித்து, குடல் இயங்குவதை முறையாக்கி, மலச்சிக்கலை போக்குகிறது. ஆரோக்கியமான குடல் நுண்ணுயிர்களை பராமரிக்க உதவுகிறது. அது ஒட்டுமொத்த உடல் ஆரோக்கியத்துக்கும் உதவுகிறது.

இதய ஆரோக்கியம்

மாப்பிள்ளை சம்பா அரிசியில் ஆன்டி ஆக்ஸிடன்ட்கள் நிறைந்துள்ளது. இது இதய ஆரோக்கியத்துக்கு உதவுகிறது. இதில் உள்ள ஆந்தோசியாடினின்கள், கொழுப்பு மற்றும் ரத்த அழுத்தத்தை குறைக்கிறது. இந்த அரிசியில் உள்ள மற்றொரு மினரல் மெக்னீசியமாகும். அது ரத்த அழுத்தத்தை முறைப்படுத்தும்.

நோய் எதிர்ப்பை அதிகரிக்கிறது

இதில் உள்ள வைட்டமின்கள் மற்றும் மினரல்கள் உங்கள் உடலின் நோய் எதிர்ப்பு மண்டலத்தை வலுப்படுத்துகிறது. இதில் உள்ள ஆன்டி ஆக்ஸிடன்ட்கள் மற்றும் நுண் ஊட்டச்சத்துக்கள், குறிப்பாக சிங்க் சத்து உங்கள் உடலின் நோய் எதிர்ப்பு மண்டலத்தை பலப்படுத்துகிறது. நச்சு நிறைந்த பாக்டீரியாக்கள் மற்றும் வைரஸ்கள் ஏற்படுத்தும் தொற்றுக்களை எதிர்த்து போராடுகிறது.

நரம்பு மண்டலத்தை சீராக்குகிறது

மாப்பிள்ளை சம்பா அரிசியில் உள்ள வைட்டமின் பி2 மற்றும் பி3 ஆகியவை ஆரோக்கியமான நரம்பு மண்டல இயக்கத்துக்கு வழிவகுக்கின்றன. இந்த வைட்டமின்கள் ஒட்டுமொத்த உடல் ஆரோக்கியம் மற்றும் நினைவாற்றலை அதிகரிப்பதில் முக்கிய பங்கு வகிக்கிறது.

வயோதிகத்தை தாமதப்படுத்துகிறது

இதில் உள்ள ஆன்டி ஆக்ஸிடன்ட்கள் உடலில் செல்களை அழிக்கும் ஃப்ரீ ரேடிக்கல்களை சமப்படுத்துகிறது. இவைதான் வயோதிகத்துக்கும், மற்ற நோய்களுக்கும் காரணமாகிறது. இந்த அரிசியை அன்றாடம் எடுப்பது ஆரோக்கியமான சருமத்தை அளிக்கிறது. வயோதிகத்தின் அறிகுறிகளை குறைக்கிறது.

கொழுப்பை குறைக்கிறது

மாப்பிள்ளை சம்பா அரிசியில் உள்ள நார்ச்சத்துக்கள், உடலில் கொழுப்பு அளவை குறைக்கிறது. செரிமான மண்டலத்தில் உள்ள கொழுப்பை ஒன்றாக்கி இதை செய்கிறது. ரத்த சர்க்கரை அளவை கட்டுப்படுத்துகிறது.

குழந்தைகளுக்கு

வளரும் குழந்தைகளுக்கு மாப்பிள்ளை சம்பா அரிசி எலும்பு வளர்ச்சி, மூளை வளர்ச்சி மற்றும் ஒட்டுமொத்த உடல் ஆரோக்கியத்துக்கும் உதவுகிறது.

இதை தினமும் உட்கொள்ளலாம். நாம் இப்போது வெள்ளை பொன்னி அரிசிக்கு பழகிவிட்டதால், இதை வழக்கமாக உட்கொள்வதில் சிக்கல்கள் ஏற்படலாம். எனவே அடிக்கடி உட்கொள்வது உடலுக்கு பல்வேறு நன்மைகளைக் கொடுக்கிறது.