பீஸ்ட் நேர்காணல் ; குண்டு பாய்ந்து உயிரிழந்த சிறுவன் - உதவிய தளபதி விஜய் இயக்கம்

நடிகர் விஜய் நடிப்பில் பீஸ்ட் திரைப்படம் நாளை வெளியாகவுள்ளது. படத்தை விளம்பரப்படுத்தும் வகையில் ஞாயிற்றுக்கிழமையன்று சன் தொலைக்காட்சியில் விஜய்யின் நேர்காணல் ஒளிபரப்பப்பட்டது. கிட்டத்தட்ட 10 ஆண்டுகளுக்கு பிறகு தொலைக்காட்சி ஒன்றுக்கு விஜய் பேட்டி கொடுத்ததால் ரசிகர்கள் மத்தியில் பெரும் எதிர்பார்ப்பு இருந்தது.

அதற்கு ஏற்றார்போல், விஜய்யின் நேர்காணல் யூடியூப்பில் பதிவேற்றம் செய்யப்பட்டு ஒரே நாளில் 62 லட்சம் பார்வைகளை கடந்துள்ளது. அதில், விஜய் பேசிய பல விவகாரங்கள் தற்போது பேசு பொருளாக மாறியுள்ளது. அந்த வகையில், புதுக்கோட்டை மாவட்டம் பசுமலைப்பட்டியில் துப்பாக்கி குண்டு பாய்ந்து உயிரிழந்த சிறுவன் புகழேந்தி குறித்து பேசியிருந்தார்.

இந்நிலையில், அந்த சிறுவனின் குடும்பத்தினரை நேரில் சந்தித்து புதுகோட்டை மாவட்ட தலைமை தளபதி விஜய் இயக்கம் சார்பாக 25 ஆயிரம் ரூபாய் நிதியுதவி வழங்கி புகழேந்தி குடும்பத்தினருக்கு ஆறுதல் தெரிவிக்கப்பட்டது.