ரஜினி , விஜய் பட தயாரிப்பாளர் காலமானார்

தமிழ் , தெலுங்கு , இந்தி உள்ளிட்ட மொழிகளில் இயக்குநராகவும் , தயாரிப்பாளராகவும் பணியாற்றி வந்தவர் , டி .ராமா ராவ் . இவர் அமிதாப் பச்சன் , ரஜினி , விஜய் , விக்ரம் என முன்னணி நடிகர்களின் திரைப்படங்களைத் தயாரித்து உள்ளார் . அதே போல் தமிழில் தில் , யூத் அருள் , உனக்கும் எனக்கும், மலைக் கோட்டை ஆகிய படங்களைத் தயாரித்து இருக்கிறார். இவர் தெலுங்கு மற்றும் இந்தி ஆகிய மொழிகளில் சுமார் 70 படங்களை இயக்கி இருக்கிறார் .

டி .ராமா ராவ் உயிரிழப்பு

இந்த நிலையில் டி .ராமா ராவ் ( 83 ) உடல் நிலை சரியில்லாத காரணத்தினால் சென்னையில் உள்ள பிரபல மருத்துவமனையில் அனுமதிக்கப்பட்டு சிகிச்சை பெற்று வந்தார் . இதனிடையே சிகிச்சை பலனின்றி இன்று ( ஏப்ரல் 20 ) அதிகாலை அவர் உயிரிழந்தார் .

இவரது இறுதிச் சடங்கு இன்று ( ஏப்ரல் 20 ) மாலை 4 மணிக்கு கண்ணம்மா பேட்டை மயானத்தில் நடைபெற உள்ளது . இவருக்கு தாதினேனி ஜெயஸ்ரீ என்ற மனைவியும் , சாமுண்டீஸ்வரி , நாக சுசீலா , அஜய் ஆகிய குழந்தைகளும் உள்ளனர் . இவரின் மறைவுக்குத் திரையுலகைச் சேர்ந்த பிரபலங்கள் பலரும் இரங்கல் தெரிவித்து உள்ளனர் .

டி .ராமா ராவின் திரைப் பயணம்

இந்தித் திரையுலகில் கடந்த 1979 ஆம் ஆண்டு நுழைந்த டி .ராமா ராவ் , அமிதாப் பச்சன், ஜீதேந்திரா, தர்மேந்திரா, சஞ்சய் தத், அனில் கபூர், கோவிந்தா, மிதுன் சக்ரவர்த்தி போன்ற முன்னணி நடிகர்களுடன் பணியாற்றினார். சூப்பர் ஸ்டார் ரஜினிகாந்தை ’ அந்த கானூன் ‘ படத்தின் மூலம் இந்தியில் அறிமுகப்படுத்திய பெருமை இவருக்கு உண்டு.

ஜூடாய், ஜீவன் தாரா, ஏக் ஹி புக், அந்தா கானூன், இன்குலாப், இன்சாப் கி புகார், வதன் கே ரக்வாலே, தோஸ்தி துஷ்மணி, நாச்சே மயூரி, ஜான் ஜானி ஜனார்தன், ராவன் ராஜ், முகாப்லா, ஹத்காடி, ஜங் போன்ற சூப்பர் ஹிட் இந்தியில் திரைப்படங்களை இவர் தயாரித்தார்.

ஸ்ரீ லக்ஷ்மி புரொடக்ஷன்ஸ் பேனரில் தமிழ் படங்களை தயாரித்த இவர் , விக்ரம், விஜய், ஜெயம் ரவி, விஷால் போன்ற முன்னணி நடிகர்களை வைத்து திரைப்படங்களை தயாரித்தார் .

இந்தியாவில் ஸ்டெயின்லெஸ் ஸ்டீல் ஃப்ளெக்சிபிள் குழாய்களை உற்பத்தி செய்யும் முன்னணி நிறுவனமான மெட்ராஸ் ஹைட்ராலிக் ஹோஸ் பிரைவேட் லிமிடெட் தலைவராகவும் இவர் இருந்தார் என்பது குறிப்பிடத்தக்கது .