அமரன் ஓடிடி ரிலீஸை தள்ளி வைக்க விரும்பும் திரையரங்க உரிமையாளர்கள்! ரெட் ஜெயண்ட் மூவிஸிற்கு பறந்த கடிதம்

அமரன் திரைப்படத்தின் ஓடிடி வெளியீட்டை திரையரங்கு வெளியீட்டுக்கு பிறகு குறைந்தபட்சம் 8 வாரங்கள் கடந்த பின் வெளியிட கோரிக்கை விடுத்து, ரெட் ஜெயண்ட் மூவிஸ், தயாரிப்பாளர் கமல் மற்றும் நடிகர் சிவகார்த்திகேயனுக்கு தமிழ்நாடு திரையரங்க உரிமையாளர்கள் சங்கத்தினர் கடிதம் எழுதியுள்ளனர்.

அமரன் ஒரு உதாரணம்

அந்தக் கடிதத்தில், தமிழகம் முழுவதும் உள்ள திரையரங்குகளில் அமோகமாக ஓடிக்கொண்டிருக்கும் திரைப்படம் 'அமரன்'. இந்தத் திரைப்படம் பிளாக்பஸ்டர் வெற்றியைப் பெற்றுள்ளது. அதற்கு வாழ்த்துகள். நல்ல கதை அம்சம் கொண்ட படங்கள் குடும்ப ரசிகர்களை திரையரங்கிற்கு அழைத்து வரும் என்பதற்கு அமரன் படம் மீண்டும் ஒரு உதாரணமாக அமைந்துள்ளது.

ஓடிடி ரிலீஸை தள்ளி வையுங்கள்

திரையரங்க வெற்றியைப் போல வேறு எதுவும் ஒரு படத்தின் வெற்றியை நிரூபிப்பதில்லை. எனவே, திரையரங்கில் மக்களின் பேராதரவுடன் ஓடிக்கொண்டிருக்கும் அமரன் படத்திற்கு மதிப்பளித்து அமரன் படத்தின் ஓடிடியில் 8 வாரங்களுக்கு பிறகு வெளியிட வேண்டும்.

அதே உணர்வில், பிளாக்பஸ்டர் திரைப்படமான 'அமரன்' திரையரங்குகளில் சிறப்பாக ஓடிக்கொண்டிருப்பதைக் கருத்தில் கொண்டு, அதன் டிஜிட்டல் வெளியீட்டை குறைந்தது 8 வாரங்களுக்குத் தள்ளி வைக்குமாறு கேட்டுக்கொள்கிறோம்.

பாக்ஸ் ஆபிஸ் வெற்றிக்கு முன் உதாரணம்

வர்த்தகத்தில் அனுபவம் வாய்ந்தவர்கள் என்ற வகையில், திரைப்படத்தின் திரையரங்கு பிரத்தியேகத்தை நீட்டிக்க, திரைப்படம் மற்றும் ஒட்டுமொத்த தொழில்துறையின் நலனுக்காக நீங்கள் சாதகமான முடிவை எடுப்பீர்கள் என்று நாங்கள் நம்புகிறோம். இது படத்தின் பாக்ஸ் ஆபிஸ் வெற்றியை இனிமையாக்குவதுடன், எதிர்கால படங்களுக்கு முன்னுதாரணமாக அமையும். உங்களிடமிருந்து சாதகமான பதிலை எதிர்பார்க்கிறோம் எனக் கூறியுள்ளனர்.

அமரன் திரைப்படம்

இயக்குநர் ராஜ்குமார் பெரியசாமி ராணுவத்தில் வீர மரணம் அடைந்த தமிழ்நாட்டைச் சேர்ந்த மேஜர் முகுந்த்தின் வாழ்க்கை வரலாற்றை மையப்படுத்தி அமரன் எனும் திரைப்படத்தை இயக்கினார். நடிகர் கமல் ஹாசனும், சோனி பிக்சர்ஸும் இணைந்து தயாரித்த இந்தப் படத்தில் நடிகர் சிவகார்த்திகேயன் மேஜர் முகுந்த்தாகவும் நடிகை சாய் பல்லவி முகுந்த்தின் மனைவி இந்து ரெபேக்கா வர்கீஸாகவும் நடித்துள்ளார்.

10 நாட்களை கடந்தும் குறையாத மவுசு

தீபாவளி பண்டிகையை ஒட்டி தியேட்டர்களில் ரிலீஸான இந்தப் படம், வெளியான நாளில் இருந்து இன்று வரை மக்களால் கொண்டாடப்பட்டு வருகிறது. இந்த படத்தால் கவரப்பட்ட மக்கள் மீண்டும் மீண்டும் திரையரங்கிற்கு படையெடுப்பதால் படத்தின் வசூலும் 250 கோடியை கடந்துள்ளது.

படத்தின் காட்சிகளும் சிவகார்த்திகேயனுக்கும் சாய் பல்லவிக்கும் இருந்த கெமிஸ்ட்ரியும், ஜி,வி. பிரகாஷின் பின்னணி இசையும் ஒன்று சேர்ந்து மக்களின் மனங்களில் ஊஞ்சலாடியது. அதே சமயம் அமரன் படத்தின் ஓடிடி ரிலீஸ் எப்போது அறிவிக்கப்படும், படம் எப்போது வெளியாகும் என்ற எதிர்பார்ப்பும் ரசிகர்களிடையே அதிகரித்தது.

நெட்பிளிக்ஸின் முடிவு

ஒரு படம் தியேட்டரில் வெளியான 28 நாட்களிலேயே ஓடிடி தளத்தில் படம் வெளியாகலாம். ஆனால், தற்போது அமரன் படம் வெளியாகி 12 நாட்களைக் கடந்தும் திரையரங்குகளில் மக்கள் கூட்டம் அலைமோதுவதால் இந்தப் படத்தின் ஓடிடி ரிலீஸை ஒத்தி வைக்க நெட்பிளிக்ஸ் நிறுவனம் திட்டமிட்டுள்ளது.

முன்னதாக, நவம்பர் மாத இறுதியில் நெட்பிளிக்ஸ் ஓடிடி தளத்தில் அமரன் படம் வெளியாகும் என எதிர்பார்க்கப்பட்ட நிலையில், தற்போது அதன் வெளியீட்டுத் தேதி டிசம்பர் மாதத்திற்கு தள்ளி வைக்கப்பட்டுள்ளதாக தகவல்கள் வெளியான நிலையில், தியேட்டர் உரிமையாளர்கள் சங்கத்தினர், ஓடிடி ரிலீஸை தள்ளி வைக்குமாறு கடிதம் எழுதியுள்ளனர்.