வில்லனாக மிரட்டிய ரஜினி..விஜய்யின் மர்கெட்டை உயர்த்திய மாஸ் ஹிட்! தமிழில் இன்று வெளியான படங்கள் லிஸ்ட்

தமிழ் சினிமாவில் இன்றைய நாளில் தீபாவளி ரீலிசாக வெளியாகி சூப்பர் ஸ்டார் ரஜினிகாந்த், தளபதி விஜய், சிவாஜி கணேசன் உள்ளிட்டோர் நடித்த படங்கள் வெளியாகியுள்ளன. அக்டோபர் 22ஆம் தேதி வெளியான தமிழ் படங்கள் லிஸ்டை பார்க்கலாம்

செளபாக்கியவதி

கடந்த 1957ஆம் ஆண்டில் தீபாவளி நாளான அக்டோபர் 22ஆம் தேதி வெளியான வரலாற்று காமெடி படம் செளபாக்கியவதி. ஜெமினி கணேசன், சாவித்திரி, எஸ்.வி.ரெங்கா ராவ், கே.ஏ. தங்கவேலு, டி.பி. முத்துலட்சுமி, காக்கா ராதாகிருஷ்ணன் உள்பட பலர் நடித்திருக்கும் இந்த படத்தை ஜம்பண்ணா இயக்கியுள்ளார். படத்தில் மொத்தம் 16 பாடல்கள் இடம்பிடித்திருக்கும் நிலையில், மகாகவி காளிதாஸ், ஏ.எல். நாரயணன், பட்டுக்கோட்டை கல்யாணசுந்தரம், பழனிசாமி ஆகியோர் பாடல் வரிகள் எழுத பெண்ட்யலா இசையமைத்துள்ளார். சிறந்த காமெடி படமாக ரசிகர்களிடம் வரவேற்பை பெற்ற செளபாக்கியவதி வெளியாகி இன்றுடன் 67 ஆண்டுகள் ஆகிறது

முதலாளி

1957இல் செளபாக்யவதி படம் வெளியான அதே நாளில் போட்டியாக வெளியான படங்களில் ஒன்று முதலாளி. எஸ்.எஸ். ராஜேந்திரன் நடித்திருக்கும் இந்த படத்தை முக்தா சீனிவாசன் இயக்கியுள்ளார். பழம்பெரும் நடிகை தேவிகாவின் அறிமுக படமாகவும் முதலாளி உள்ளது. ராமானுஜம் மேடை நாடகத்தை அடிப்ப்டையாக வைத்து உருவான இந்த படம் ரசிகர்களை கவர்ந்து சூப்பர் ஹிட்டானது. எஸ். எஸ். ராஜேந்திரன், தேவிகா ஆகியோருக்கு திருப்புமுனை ஏற்படுத்திய இந்த படம் தெலுங்கு, மலையாளத்தில் ரீமேக் செய்யப்பட்ட அங்கு வரவேற்பை பெற்றது

அம்பிகாபதி

1957இல் தீபாவளி வெளியீடாக வெளியான மற்றொரு படம் அம்பிகாபதி. சிவாஜி கணேசன், பானுமதி நடித்திருந்த இந்த படத்தை பின்னாளில் எம்ஜிஆர் ஆஸ்தான இயக்குநராக மாறிய ப. நீலகண்டன் இயக்கியுள்ளார். வரலாற்று பின்னணி கதையை கொண்ட இந்த படம் பிளாக் அண்ட் ஒயிட்டில் படமாக்கப்பட்டிருந்தாலும், குறிப்பிட்ட சில காட்சிகள் கெவாகலர் என்ற வண்ணத்தில் தோன்று தொழில்நுட்பத்தில் படமாக்கியிருப்பார்கள். படத்தில் இடம்பிடித்த பாடல்கள் வண்ண நிறத்தில் படமாக்கியிருப்பார்கள். பழம்பெரும் காமெடி நடிகர் என்.எஸ். கிருஷ்ணன் கடைசி படமாக இது அமைந்துள்ளது.

1937இல் வெளியா அம்பிகாபதி படத்தின் ரீமேக்காக அதே பெயரில் உருவான இந்த படம் ரசிகர்களை கவர்ந்து சூப்பர் ஹிட்டானது. கவிஞரின் காதல் பற்றிய படம் என்பதால் படத்தில் 20க்கும் மேற்பட்ட பாடல்கள் இடம்பிடித்திருக்கும்.

மூன்று முடிச்சு

தமிழ் சினிமாவில் கல்ட் கிளாசிக் படங்களில் ஒன்றாக இருந்து வரும் மூன்று முடிச்சு வெளியாகி இன்றுடன் 48 ஆண்டுகள் ஆகிறது. ரஜினிகாந்த், கமல்ஹாசன், ஸ்ரீதேவி நடித்திருக்கும் இந்த படத்தை மறைந்த இயக்குநர் சிகரம் பாலசந்தர் இயக்கியிருப்பார். ரஜினிகாந்த் கதையின் நாயகனாக வில்லத்தனமான வேடத்தில் நடித்த படம், ஸ்ரீதேவி ஹீரோயினாக நடித்த முதல் படம் போன்ற பெருமையை பெற்ற மூன்று முடிச்சு,

இளம் பெண் மீது ஒரே அறையில் வசிக்கும் இருவர் காதல் வயப்படுவதால் நடக்கும் பிரச்னைகள், சிக்கல்களை அடிப்படையாக கொண்ட கதையம்சத்தில் உருவாகியுள்ளது.

தெலுங்கில் மறைந்த இயக்குநர் கே. விஸ்வநாத் இயக்கத்தில் வெளியான ஓ சீதா கதா படத்தை அடிப்படையாக கொண்டு உருவான மூன்று முடிச்சு சூப்பர் ஹிட்டானது. கண்ணதாசன் பாடல் வரிகள் எழுத எம்.எஸ். விஸ்வநாதன் இசையில் வசந்த காலம் பாடல் சிறந்த கிளாசிக் பாடலாக உள்ளது.

நல்லவனுக்கு நல்லவன்

சூப்பர் ஸ்டார் ரஜினிகாந்த், கார்த்திக், ராதிகா, துளசி பிரதான கதாபாத்திரத்தில் நடித்திருக்கும் இந்த படத்தை எஸ்.பி.முத்துராமன் இயக்கியுள்ளார். மறைந்த இயக்குநர் விசு திரைக்கதை எழுதியிருந்த இந்த படம் தீபாவளி வெளியீடாக திரைக்கு வந்தது. தெலுங்கில் ஹிட்டான தர்மாதுமுடு படத்தின் ரீமேக்காக உருவாகியிருந்த நல்லவனுக்கு நல்லவந தமிழிலும் சூப்பர் ஹிட்டானது. இந்த படத்துக்காக சிறந்த நடிகர் பிலிம் பேர் விருதை ரஜினிகாந்த் வென்றார்.

இசைஞானி இளையராஜா இசையில் சிட்டுக்கு செல்ல சிட்டுக்கு, உன்னைத்தானே தஞ்சம் என்று, நம்ம முதலாளி, வச்சுக்கவா போன்ற பாடல்கள் சூப்பர் ஹிட் பாடல்களாக இன்றும் ஒலித்துக்கொண்டிருக்கின்றன. ரஜினிகாந்துக்கு கமர்ஷியல் ஹிட் கொடுத்த நல்லவனுக்கு நல்லவன் படம் வெளியாகி இன்றுடன் 40 ஆண்டுகள் ஆகிறது.

கத்தி

தளபதி விஜய் நடித்து ஏ.ஆர். முருகதாஸ் இயக்கத்தில் 2014 தீபாவளி வெளியீடாக வந்த படம் கத்தி. சமந்தா ஹீரோயினாக நடித்திருக்கும் இந்த படத்தில், பாலிவுட் நடிகர் நீல் நிதின் முகேஷ் வில்லனாக நடித்திருப்பார். விஜய் இரட்டை வேடங்களில் நடித்திருக்கும் இந்த படம் ஆக்‌ஷன் த்ரில்லர் மசாலா பாணியில் சமூக கருத்தை எடுத்து சொல்லும் விதமாக அமைந்திருந்தது. பிலிம் பேர் விருது, சைமா, விஜய் விருதுகள் என பல்வேறு விருதுகளை குவித்த இந்த படம் தெலுங்கில் சிரஞ்சீவி நடிப்பில் கைதி நம்பர் 150 என அவரது கம்பேக் படமாக உருவானது. அனிருத் இசையில் அனைத்து பாடல்களும் சூப்பர் ஹிட் ஆனதுடன், பின்னணி இசை தெறிக்கவிடும் விதமாக இருந்தது.

கதை திருட்டு குற்றச்சாட்டு, படத்தை தயாரித்த லைகா நிறுவனத்தில் இலங்கை முன்னாள் அதிபர் மகிந்தா ராஜபட்சே பாட்னராக இருந்தது போன்ற சர்ச்சைகள் இருந்தாலும் படத்தின் விறுவிறுப்பான திரைக்கதை, விஜய்யின் நடிப்பு, ஏ.ஆர். முருகதாஸின் அனல் பறக்கும் வசனங்கள் என படம் சூப்பர் ஹிட்டானது. ரூ. 150 கோடிக்கு மேல் வசூலை ஈட்டி விஜய்யின் மார்கெட்டை வேற லெவலுக்கு உயர்த்திய கத்தி திரைப்படம் 2014 தீபாவளி திருநாளில் வந்த நிலையில், படம் ரிலீசாகி 10 ஆண்டுகள் ஆகிறது.

பூஜை

ஹரி இயக்கத்தில் விஷால், ஸ்ருதிஹாசன், சத்யராஜ், ராதிகா சரத்குமார் பிரதான கதாபாத்திரத்தில்

நடித்திருக்கும் இந்த படம் பேமிலி ட்ராமா ஆக்‌ஷன் த்ரில்லர் படமாக உருவாகியிருந்தது. வழக்கமான ஹரி படங்களின் பாணியில் உருவாகியிருந்த பூஜை கமர்ஷியல் ஹிிட் ஆனதுடன், கன்னடத்தில் மறைந்த நடிகர் புனித்ராஜ்குமார், ராஷ்மிகா மந்தனா நடிப்பில் ரீமேக் செய்யப்பட்டது. யுவன்ஷங்கர் ராஜா இசையில் படத்தின் பாடல்கள் அனைத்தும் ஹிட்டாகின. ஜூலை மாதத்தில் தொடங்கி அக்டோபர் மாதத்தில் வெளியான நிலையில், குறுகிய காலத்தில் உருவாகி விஷாலுக்கு ஹிட்டடித்த படமாக பூஜை உள்ளது.