HBD Prashanth: 'காதல் இளவரசன்.. ஆணழகன்..' விஜய், அஜித்துக்கு டப் கொடுத்த டாப் ஸ்டார் பிரசாந்த்!

HBD Prashanth: பதினேழாம் வயதில் தமிழ் சினிமாவில் ஹீரோவாக நுழைந்து சிகரம் தொட்ட நடிகர் பிரசாந்த் பிறந்த நாள் இன்று இந்த நாளில் அவர் குறித்த தகவல்களை திரும்பி பார்க்கலாம்.

1990 காலகட்டத்தில் பெண்களுக்கு மிகவும் பிடித்த ஹீரோ. அப்போதைய டாப்ஸ்டார் இவர் தான். இன்று திரை உலகில் தளபதி, தல என்று இன்று கோலோச்சி கொண்டிருக்கும் விஜய், அஜித் எல்லாம் அப்போது இவரைத் தாண்டி பிரபலமாக முடியவில்லை. அந்த வகையில் விஜய், அஜித்துக்கு டப் கொடுத்த டாப் ஸ்டார் பிரசாந்த். 1973 ஆம் ஆண்டு ஏப்ரல் 6ல் நடிகர் தியாகராஜன் மற்றும் சாந்தி தம்பதியினரின் மூத்த மகனாக சென்னையில் பிறந்தார்.

படித்து டாக்டர் ஆக வேண்டும் என்று விரும்பிய பிரசாந்த் மருத்துவ கல்லூரியி சேர்ந்த போதும் அவருடைய தந்தை நடிகர் தியாகராஜனுடைய ஆசை வேறாக இருந்தது. தமிழ் சினிமாவில் பெரிய ஹீரோவாக மாற்றி விட ஆசைப்பட்டு அவரை லண்டனில் உள்ள டிரினிட்டி காலேஜ் ஆப் மியூசிக் பயிற்சி நிறுவனம் சென்று நடிப்பு பயிற்சி பெற்றார். அவர்கள் ஆசைப்படி தனது பதினேழாம் வயதில் வைகாசி பொறந்தாச்சு என்ற திரைப்படம் மூலம் 1990 ல் அறிமுகம் ஆனார். முதல் படமே மாபெரும் வெற்றி பெற்றது.

முதல் படத்திலேயே பெரிய வெற்றி கிடைப்பது அரிது. சினிமாவில் நடிக்க நுழையும் போதே நடனம், சண்டை பயிற்சி, நடிப்பு கலை என்று கற்று கொண்டு வந்தவர். ராதாபாரதி இயக்கத்தில் வெளிவந்த பிரசாந்த் நடிப்பில் வெளியான முதல்படமே பெரிய வெற்றி பெற்று பட்டிதொட்டியெங்கும் நல்ல அறிமுகம் தந்தது. இரண்டாவது படமாக மலையாள படத்தில் நடித்தார். 1992 ல் வெளியான செம்பருத்தி படம் அவருக்கு திருப்புமுனை படமாக அமைந்தது. தமிழ் திரைப்பட உலகில் சாக்லேட் பாயாக வெகுகாலம் நிலைத்து நின்றார்.

1993ல் மணிரத்னம் இயக்கத்தில் வெளிவந்த திருடா திருடி பட வெற்றிக்கு பிறகு வெரைட்டியாக கதாபாத்திரங்களை தேர்வு செய்து கொண்டு நடித்தார். குறிப்பாக பிரசாந்த் தந்தை இயக்கி 1995ல் வெளியான ஆணழகன் என்ற திரைப்படத்தில் லட்சுமி என்ற பெயரில் பெண் வேடமிட்டு நடித்ததை எவரும் மறக்க முடியாது. அதேபோல் சங்கர் இயக்கத்தில் 1998ல் வெளிவந்த பிரம்மாண்டமான வெற்றி பெற்ற திரைப்படம் ஜீன்ஸ். இதில் இரட்டை வேடங்களில் பிரசாந்த் உலக அழகி ஐஸ்வர்யா ராய் உடன் நடித்தார்.

வண்ண வண்ண பூக்கள், உனக்காக பிறந்தேன், கிழக்கே வரும் பாட்டு, ராசாமகன், கண்மணி, செந்தமிழ் செல்வன், கல்லூரி வாசல், கண்னெதிரே தோன்றினாள், ஜோடி, பூமகள் ஊர்வலம், காதல் கவிதை, ஆசையில் ஓர் கடிதம், அப்பு, பார்த்தேன் ரசித்தேன், பிரியாத வரம் வேண்டும், தமிழ், வெற்றி, ஆயுதம், லண்டன், வின்னர், தகப்பன் சாமி, பொன்னர் சங்கர் என்று பல வெற்றி படங்களை தந்தவர். தமிழ் சினிமாவில் வடிவேலு பிரசாந்த் காம்போவில் வெளிவந்த வின்னர் திரைப்படத்தில் வரும் நகைச்சுவை காட்சிகள் எல்லாம் அவ்வளவு பாப்புலர். 

தமிழ் தவிர மலையாளம், இந்தி, தெலுங்கு படங்களில் நடித்துள்ளார். பெரிய எண்ணிக்கையில் படங்களில் நடிக்காத போதிலும் அவரின் தொடர் வெற்றி உச்ச நட்சத்திர அந்தஸ்த்தில் அவரை வைத்தது. 2006 க்கு பின்னர் அவருக்கு பட வாய்ப்புகள் குறைய ஆரம்பித்தது. நீண்ட கால தயாரிப்பு, கடுமையான நிதி நெருக்கடி, பாதியில் நின்று போன திரைப்படங்கள் என்று பல காரணங்கள் உள்ளன. 

பொன்னர் சங்கர் என்ற வரலாற்று திரைப்படம் பிரசாந்த்க்கு நீண்ட காலம் எடுத்து கொண்டது. பிலிம்பேர் விருது, கலைமாமணி விருதுகளையும் பெற்று இருக்கிறார். பிரசாந்த் ஸ்டார் நைட் என்ற பெயரில் பல மேடை நிகழ்ச்சிகளையும் நடத்தி இருக்கிறார். இவர் கிரகலட்சுமி என்பவரை திருமணம் செய்த போதிலும் மூன்று ஆண்டுகள் கழித்து விவாகரத்து செய்து விட்டார். இவருக்கு ஒரு மகனும் உள்ளார்.

பிரபலமான நடிகர் விக்ரம் அவர்களுடைய மாமா பையன் தான் பிரசாந்த் என்று பலருக்கு தெரியாது. தமிழகம் மட்டுமின்றி வெளிநாடுகளிலும் அதிக அளவில் ரசிகர்களை சேர்த்து வைத்திருந்தவர். தற்போது கூட விஜய் அவர்களின் நடிப்பில் உருவாகி வரும் கோட் திரைப்படத்தில் முக்கியமான கதாபாத்திரத்தில் நடித்து வருகிறார் என்பது குறிப்பிடத்தக்கது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9