Pasanga Actor Kishore:சிறந்த நடிகர் விருது பசங்க கிஷோருக்கு குவியும் வாழ்த்துகள்

கடந்த 2009ஆம் ஆண்டு பாண்டிராஜ் இயக்கத்தில் வெளியாகி சிறந்த திரைப்படத்துக்கான தேசிய விருதை பெற்ற படம் பசங்க. சிறுவர்களின் பள்ளிப்பருவம், நட்பு, சண்டை, பாசம் ஆகியவற்றை அடிப்படையாக கொண்டு வெளியான இந்தப் படத்தில் பிரதான கதாபாத்திரமான அன்பு என்ற கேரக்டரில் தோன்றிய கிஷோருக்கு சிறந்த குழந்தை நட்சத்திரத்துக்கான தேசிய விருது கிடைத்தது.

இதையடுத்து கடந்த இருநாள்களுக்கு முன்னர் சென்னை கலைவாணர் அரங்கில் சிறந்த திரைப்படங்கள், நடிகர், நடிகைகளுக்கான விருது வழங்கும் விழா நடைபெற்றது. இதில் 2009 முதல் 2014ஆம் ஆண்டு வரை தேர்வு செய்யப்பட்ட படங்கள், கலைஞர்கள் விருது வழங்கப்பட்டது.

அந்த வகையில் 2009ஆம் ஆண்டு வெளியான பசங்க படத்தில் நடித்ததற்கு சிறந்த குழந்தை நட்சத்திரம் விருது கிஷோருக்கு வழங்கப்பட்டது. அந்தப் படத்தில் நடித்தபோது சிறுவனாக இருந்த கிஷோர் தற்போது மீசை வளர்ந்து இளைஞராக மாறியுள்ள நிலையில் விருதை பெற்றார்.

விருது வாங்குவதற்காக வேட்டி சட்டையுடன் வந்திருந்த அவரை பார்த்த பலரும் ஆச்சர்யப்பட்டதோடு, விருது பெற்ற கிஷோருக்கு வாழ்த்துகளை தெரிவித்துள்ளனர். கிஷோர் விருது வாங்கும் விடியோ இணையத்தில் வைரலான நிலையில், அதை பார்த்த பலரும் பாராட்டுகளை குவித்து வருகின்றனர்.

பசங்க படத்துக்கு பின்னர் கிஷோர் துரோகி, கோலிசோடா, நெடுஞ்சாலை, வஜ்ரம், ஹவுஸ் ஓனர் உள்பட சில படங்களில் நடித்துள்ளார்.

பசங்க படத்தில் இவரது நடிப்பு வெகுவாக பேசப்பட்டது. இவருடன் ஜீவா கதாபாத்திரத்தில் நடித்திருந்த ஸ்ரீராமும் சிறப்பான நடிப்பை வெளிப்படுத்தியிருப்பார். அவருக்கு சிறந்த குழந்தை நட்சத்திருத்துக்கான விருது வழங்கப்பட்டது.