டாப் 10 சினிமா செய்திகள்.. அந்தரங்க வீடியோ குறித்து மனம் திறந்த ஓவியா முதல்.. ஜெயம் ரவியின் புதிய படம் வரை..

கோலிவுட் சினிமாவில் இன்று நடைபெற்ற முக்கிய செய்திகளின் தொகுப்புகள் இங்கே தரப்பட்டுள்ளது. இந்த செய்தித் தொகுப்பில், அந்தரங்க வீடியோ குறித்து மனம் திறந்த ஓவியா முதல்.. ஜெயம் ரவியின் புதிய படம் வரை நடந்த முக்கிய கோலிவுட் அப்டேட்களை காணலாம்.

1. நடிகை ஓவியாவின் அந்தரங்க வீடியோ ஒன்று வெளியாகி பரபரப்பை ஏற்படுத்திய நிலையில், அதுகுறித்து நடிகை ஓவியா தற்போது பேசியுள்ளார். தன் முதுகில் குத்தியவர்கள் பற்றி நான் கவலைப்படுவதில்லை. நாம் நம்முடைய வாழ்க்கையின் மீது மட்டும் கவனம் செலுத்தினால் போதும். எனக்கு அட்வைஸ் கொடுப்பதும் பிடிக்காது. வாங்குவதும் பிடிக்காது என ஓவியா மனம் திறந்து பேசியுள்ளார்.

2. 2013ம் ஆண்டில் கன்னட மொழியில் தொடங்கிய பிக்பாஸ் நிகழ்ச்சி தற்போது 11வது சீசனில் அடியெடுத்து வைத்துள்ளது. இந்த அனைத்து சீசன்களையும் தொகுத்து வழங்கி வந்தவர் நடிகர் கிச்சா சுதீப் தான். இந்நிலையில், அவர் இந்த 11வது சீசன் தான் எனது கடைசி சீசன் எனத் தெரவித்து அவரது ரசிகர்களை அதிர்ச்சியடையச் செய்துள்ளார். இதுகுறித்து கருத்து தெரிவித்துள்ள கிச்சா சுதிப், பிக்பாஸில் 11 ஆண்டுகள் ஒன்றாகப் பயணித்தது சிறப்பான விஷயம். தற்போது இது எனக்கான நேரம். இதிலிருந்து விலகி தற்போது எனக்கு என்ன செய்ய வேண்டுமோ அதில் கவனம் செலுத்தவிருக்கிறேன் எனக் கூறியுள்ளார்.

3. இயக்குனர் சிறுத்தை சிவா இயக்கத்தில் நடிகர் சூர்யா நடித்துள்ள கங்குவா திரைப்படம் வரும் நவம்பர் 14 அன்று உலகம் முழுவதிலும் பிரம்மாண்டமாக வெளியாக உள்ளது. இந்நிலையில், இதுகுறித்து இயக்குநர் சிறுத்தை சிவா பேசுகையில், படம் அனைவரையும் சந்தோஷப் படுத்தும். படம் பார்க்க வரும் ரசிகர்களுக்கு புது அனுபவத்தை கொடுக்கும். பழங்குடியினரின் வாழ்வியலை குறித்தான வரலாற்று படமாக இருக்கும் எனத் தெரிவித்திருந்தார்.

4. ஜெய்பீம் புகழ் த.செ. ஞானவேல் இயக்கத்தில் நடிகர் ரஜினி காந்த், அமிதாப் பச்சன், பகத் பாசில், ராணா டகுபதி, மஞ்சு வாரியார் உள்ளிட்ட நட்சத்திரங்கள் நடிப்பில் வேட்டையன் திரைப்படம் வெளியானது. இந்தப் படம் உலகம் முழுவதும் வெளியான 5வது நாளில் 240 கோடி ரூபாய் வசூல் செய்துள்ளதாக அப்படத்தின் தயாரிப்பு நிறுவனம் லைகா தெரிவித்துள்ளது.

5. நடிகர் விக்ரமின் 62வது படத்தை சித்தா பட இயக்குநர் அருண்குமார் இயக்குகிறார். வீர தீர சூரன் என தலைப்பிடப்பட்ட இந்த படத்தில் துஷாரா விஜயன், எஸ்.ஜே.சூர்யா, சித்திக் ஆகியோர் நடித்துள்ளனர். இப்படத்தின் கதாநாயகியாக நடித்துள்ள துஷாரா விஜயனின் பிறந்தநாளை முன்னிட்டு வீர தீர சூரன் படக்குழு சிறப்புப் போஸ்டரை வெளியிட்டுள்ளது. மேலும், வேட்டையன் படக்குழுவும் வீடியோ ஒன்றை வெளியிட்டுள்ளது.

6. தேசிய விருது பெற்ற இயக்குநர் சீனு ராமசாமி இயக்கத்தில் கடந்த மாதம் வெளியான படம் கோழிப்பண்ணை செல்லதுரை. இந்தப் படத்தில் நடித்ததன் மூலம் ஜப்பானில் நடந்த இண்டி திரைப்பட விருது விழாவில் நடிகை சத்யாவிற்கு சிறந்த நடிகை விருது கிடைத்தது. இந்நிலையில், ஸ்பெயின் நாட்டின் பாரம்பரிய ஜிரோனா திரைப்பட விருது விழாவில் சிறந்த திரைப்படமாக தேர்வு செய்யப்பட்டுள்ளது. இந்த விழாவில் தேர்வு செய்யப்பட்ட முதல் தமிழ்படம் என்ற பெருமையையும் இந்தப் படம் பெற்றுள்ளது.

7. விக்னேஷ் சிவன் தற்போது எல்ஐகே (லவ் இன்ஷூரன்ஸ் கம்பெனி) என்ற படத்தை இயக்கியுள்ளார். இப்படத்தில் கதாநாயகனாக பிரதீப் ரங்கநாதன், கதாநாயகியாக கீர்த்தி ஷெட்டி நடித்துள்ளனர். டைம் டிராவலை மையமாக வைத்து எடுக்கப்பட்டுள்ள இந்தப் படத்திற்கு அனிருத் இசையமைத்துள்ளார். இந்நிலையில், இப்படத்தின் முதல் சிங்கிள் தீமா என்ற பாடல் நாளை காலை 10.06 மணிக்கு வெளியாக உள்ளது என படக்குழு தெரிவித்துள்ளது.

8. நடிகர் அஜித்- இயக்குநர் சிறுத்தை சிவா கூட்டணியில் வீரம், வேதாளம், விவேகம், விஸ்வாசம் படங்கள் வெளியாகி நல்ல ஹிட் கொடுத்தன. இந்த நிலையில், இந்தக் கூட்டணி மீண்டும் இணைய உள்ளதாக இயக்குநர் சிறுத்தை சிவா கூறியுள்ளார். மேலும், இதுகுறித்து நடிகர் அஜித்தே அறிவிப்பார் எனவும் கூறி ரசிகர்களை குஷி படுத்தியுள்ளார்.

9. நடிகர் ரஜினிகாந்த் நடிப்பில் வெளியான வேட்டையன் திரைப்படம் ரசிகர்கள் மத்தியில் கலவையான விமர்சனங்களை பெற்று வரும் நிலையில் இந்தப் படத்தின் டெலிடட் சீன்களை வேட்டையன் படக்குழு வெளியிட்டுள்ளது. ரஜினிகாந்த் மற்றும் பகத் பாசில் நடித்த காட்சிகள் தற்போது வெளியிடப்பட்டுள்ளது.

10. தமிழ் திரையுலகில் பரபரப்பாக பேசப்பட்டுவரும் நடிகர் ஜெயம் ரவி, தனக்கு இயக்குநர் வெற்றி மாறனுடன் இணைந்து பணியாற்ற விருப்பம் உள்ளதாக தெரிவித்துள்ளார். இதை வெற்றிமாறனிடம் கூறிய நிலையில், விரைவில் அதுகுறித்து ஆலோசிக்கலாம் எனக் கூறியதாக தெரிவித்துள்ளார்.