ரசிகர்களுக்கு விருந்தாக நான்கு புதிய படங்கள், ஒரு த்ரில்லர் சீரிஸ்..தமிழில் பிரபல ஓடிடி தளங்களில் இந்த வார ரிலீஸ்

கடந்த வாரம் ஓடிடி தளங்களில் பெரிதாக தமிழ் படங்கள் ரிலீஸ் ஆகவில்லை. மாறாக கார்த்திக் சுப்பராஜ் தயாரித்த ஸ்னேக்ஸ் அண்ட் லேடர்ஸ் என்ற வெப் சீரிஸ் அமேசான் ப்ரைமில் வெளியானது.

அத்துடன், ரமேஷ் கோவிந்தராஜன் நடித்து இயக்கிய சென்னையில் வானம் மேகமூட்டத்துடன் காணப்படும் என்ற படம் ஆஹா ஓடிடி தளத்தில் வெளியானது.

இதைத்தொடர்ந்து இந்த வாரம் சில புதிய தமிழ் படங்கள் டாப் ஓடிடி தளங்களில் வெளியாகி ரசிகர்களுக்கு விருந்து படைக்க உள்ளன. அதன்படி இந்த வார தமிழ் ஓடிடி ரிலீஸ் எவையெல்லாம் என்பதை பார்க்கலாம்

மெய்யழகன்

கார்த்தி - அரவிந்த் சாமி பிரதான கதாபாத்திரங்களில் நடிக்க 96 பட இயக்குநர் பிரேம் குமார் இயக்கத்தில் பேமிலி டிராமா பாணியில் வெளிவந்த படம் மெய்யழகன். கடந்த மாதம் 27ஆம் தேதி வெளியாகி ரசிகர்கள் மத்தியில் வரவேற்பை பெற்றதுடன், நல்ல வசூலையும் குவித்த இந்த படம் தற்போது நெட்பிளிக்ஸ் ஓடிடி தளத்தில் அக்டோபர் 25ஆம் தேதி ஸ்டரீம் ஆக உள்ளது.

இந்த படம் தமிழ் தவிர தெலுங்கு, மலையாளம், கன்னடம், இந்தி ஆகிய மொழிகளிலும் வெளியாகிறது

கடைசி உலகப் போர்

இசையமைப்பாளர் ஹிப் ஹாப் தமிழா ஆதி இயக்கி நடித்திருக்கும் போர் பின்னணியிலான சயின்ஸ் பிக்சன் ஆக்சன் த்ரில்லர் படமாக கடைசி உலகப் போர் உள்ளது. படத்தில் அனகா கதையின் நாயகியாக நடித்துள்ளார். நாசர், நடராஜ் சுப்பிரமணியம், அழகம் பெருமாள் உள்பட பலரும் நடித்திருக்கும் இந்த படம் கடந்த மாதம் 20ஆம் தேதி வெளியான நிலையில், விமர்சக ரீதியாக பாராட்டை பெற்றது.

இதையடுத்து கடைசி உலகப் போர் படம் அமேசான் ப்ரைம் மற்றும் டென்ட்கோட்டை ஓடிடி தளங்களில் அக்டோபர் 25ஆம் தேதி வெளியாகிறது.

ஹிட்லர்

இசையமைப்பாளர் விஜய் ஆண்டனி நடிப்பில் கடந்த மாதம் 27ஆம் தேதி வெளியான ஆக்சன் த்ரில்லர் படம் ஹிட்லர். தனா இயக்கியிருக்கும் இந்த படத்தில் ரியா சுமன் ஹீரோயினாக நடித்துள்ளார். கெளதம் மேனன், சரண் ராஜ், ரெடிங் கிங்ஸ்லீ, விவேக் பிரசன்னா, ஆடுகளம் நரேன் உள்பட பலரும் நடித்திருக்கும் இந்த படம் கலவையான விமர்சனங்களை பெற்றது. தற்போது அமேசான் ப்ரைம், சிம்பிளி செளத், டென்ட்கொட்டா ஓடிடி தளங்களில் அக்டோபர் 25 முதல் ஸ்டிரீமிங் ஆகிறது.

கோழிப்பண்ணை செல்லத்துரை

சீனு ராமசாமி இயக்கத்தில் புதுமுகம் ஏகன், யோகி பாபு, பிரஹிடா சாகா, ஐஸ்வர்யா தத்தா, பாவா செல்லத்துரை உள்பட பலர் நடித்திருக்கும் படம் கோழிப்பண்ணை செல்லத்துரை. கடந்த மாதம் 20ஆம் தேதி வெளியான இந்த படம் கலவையான விமர்சனங்களை பெற்றது. தற்போது சிம்ப்ளிசெளத் ஓடிடி தளத்தில் அக்டோபர் 24 முதல் ஸ்டீரிமிங் ஆகிறது

ஐந்தாம் வேதம்

மர்மதேசம் சீரிஸை இயக்கியிருக்கும் நாகா இயக்கத்தில் உருவாகியிருக்கும் புத்தம் புதிய த்ரில்லர் சீரிஸ் ஐந்தாம் வேதம். கடந்த வாரம் இதன் ட்ரெய்லர் வெளியாகி ரசிகர்கள் மத்தியில் வரவேற்பை பெற்றன.

சாய் தன்ஷிகா, சந்தோஷ் பிரதாப், தேவதர்ஷின், ஒய்.ஜி. மகேந்திரன், பொன் வண்ணன் உள்பட பலரும் நடித்து எதிர்பார்ப்பை ஏற்படுத்தியிருக்கும் இந்த சீரிஸ் ஜீ5 ஓடிடி தளத்தில் அக்டோபர் 25 முதல் ஸ்டிரீமிங் ஆகிறது.

தமிழில் நான்கு படங்கள், ஒரு த்ரில்லர் சீரிஸ் வெளியாக இருக்கும் நிலையில் பிற மொழிகளை பொறுத்தவரை பிரைம் வீடியோவில் கன்னடத்தில் மூரு காசினா குதுரே என்ற படம் அமேசான் ப்ரைமிலும், ஜியோ சினிமாவில் மிராண்டா பிரதர்ஸ் என்ற இந்தி படமும் வெளியாகிறது.