Harold Das: “தெறிக்க..” வேறு அவதாரம் எடுத்திருக்கும் அர்ஜூன்.. லோகேஷின் இரத்த வளையத்தில் ஹரால்ட் தாஸ்! - வீடியோ இங்கே!

லோகேஷ் கனகராஜ் இயக்கத்தில் விஜய் நடித்து இருக்கும் திரைப்படம் லியோ. இந்தப்படத்தில் அர்ஜூன், சஞ்சய் சத், த்ரிஷா, பிரியா ஆனந்த், மிஷ்கின் உள்ளிட்ட பலர் நடித்துள்ளனர். இந்தத்திரைப்படத்தின் இறுதிக்கட்ட படப்பிடிப்பு சமீபத்தில் நிறைவடைந்தது. இருப்பினும் மீண்டும் காஷ்மீர் பறந்த படக்குழு, அங்கு இன்னும் சில காட்சிகளை படமாக்கி வருகிறது. 

படம் தொடங்கியதில் இருந்தே சரியான இடைவேளையில் படம் தொடர்பான அப்டேட்களை கொடுத்து ரசிகர்களுக்கு படம் தொடர்பான எதிர்பார்ப்பு அடங்காமல் பார்த்து வருகிறது படக்குழு! அந்த வகையில் அண்மையில் சஞ்சய் தத்தின் பிறந்தநாளன்று வீடியோ ஒன்று வெளியிடப்பட்டது. அதில் அவர் ஆண்டனி தாஸ் என்ற கதாபாத்திரத்தில் நடித்திருப்பதாக அறிவிக்கப்பட்டது. இந்த வீடியோ ரசிகர்கள் மத்தியில் ஏகோபித்த வரவேற்பை பெற்றது. 

அதனைத்தொடர்ந்து நேற்று முன் தினம் இந்தத்திரைப்படம் குறித்து தன்னுடைய ட்விட்டர் பக்கத்தில் லியோ தயாரிப்பு நிறுவனம் பதிவு ஒன்றை வெளியிட்டது. அதில், “ அதுதான் கணக்கு புரிதா உனக்கு” என்று பதிவிட்டு லியோ திரைப்படம் வெளியாக இன்னும் 67 நாட்களே இருக்கிறது என்று குறிப்பிட்டது. இதனை ரசிகர்கள் கொண்டாடினர். 

இதனிடையே நிகழ்ச்சி ஒன்றில் பேசிய படத்தின் தயாரிப்பாளர் லலித் நடிகர் அர்ஜூனின் பிறந்தநாளான இன்று படத்தின் மற்றொரு அப்டேட் வெளியாகும் என்று பேசியிருந்தார். அதனைத்தொடர்ந்து நேற்றைய தினம் படத்தில் அர்ஜூன் ஹர்லாடு தாஸ் என்ற கதாபாத்திரத்தில் நடித்திருப்பதாக அறிவிக்கப்பட்டது. இந்த நிலையில் தற்போது அவரது கதாபாத்திரம் தொடர்பான அப்டேட்  வீடியோவாக வெளியிடப்பட்டு இருக்கிறது.