Thalapathy 69: ‘தளபதி 69’ -ல் விஜய்க்கு ஜோடியாக நானா? .. ‘ஹெச். வினோத் அப்பவே சொன்னார்’ - மஞ்சு வாரியர் சூசக பதில்!

Thalapathy 69: ரஜினிகாந்த் நடிப்பில் வருகிற அக்டோபர் 10ம் தேதி வெளியாக இருக்கும் திரைப்படம் ‘வேட்டையன்’. இந்தத்திரைப்படத்தில் நடிகை மஞ்சுவாரியர் ரஜினிகாந்தின் மனைவியாக நடித்திருக்கிறார். இந்த நிலையில் மஞ்சு வாரியர் நடிகர் விஜயின் 69 வது திரைப்படத்தில் நடிக்க இருப்பதாக தகவல் வெளியானது. இந்த நிலையில், இது குறித்து மஞ்சுவாரியர் சூரியன் எஃப் எம் சேனலுக்கு அளித்த பேட்டியில் பேசி இருக்கிறார்.

தளபதி69 -ல் மஞ்சு வாரியரா?

இது குறித்து அவர் பேசும் போது, “துணிவு படத்தில் ஹெச். வினோத் உடன் பணியாற்றும் போது, முக்கியமான காட்சிகளை நான் நடித்துக்கொண்டிருந்த போது, அந்தக்காட்சிகளை இன்னும் பெட்டராக நடிக்க நான் சில முயற்சிகளை செய்தேன். 

ஆனால், அதையெல்லாம் செய்ய வேண்டாம் என்று சொல்லி என்னை இயக்குநர் ஹெச். வினோத் தடுத்து, இந்தப்படத்திற்கு இது போதும் என்று சொன்னார். அத்துடன் நீங்கள் நன்றாக நடிப்பதற்கு வேறு படம் தருகிறேன்” என்று சொன்னார். இதன் மூலம் நடிகர் விஜயின் 69 வது படத்தில் நடிகை மஞ்சு வாரியர் நடிக்க அதிக வாய்ப்பு இருப்பதாக திரை வட்டாரம் கூறுகிறது.

முன்னதாக,ரசிகர்களால் சூப்பர் ஸ்டார் என்று அழைக்கப்படும் ரஜினிகாந்த் நடிப்பில் உருவாகியிருக்கும் புதிய படம் வேட்டையன். இந்த படத்தை ஜெய் பீம் படப்புகழ் ஞானவேல் இயக்கியுள்ளார். ஆக்சன் த்ரில்லர் பாணியில் உருவாகியிருக்கும் வேட்டையன் படத்தில் பாலிவுட் சூப்பர் ஸ்டார் அமிதாப் பச்சன், மலையாள நடிகர் ஃபகத் பாசில், தெலுங்கு நடிகர் ராணா டகுபதி, மஞ்சு வாரியர், அபிராமி, துஷாரா விஜயன் என பெரும் நட்சத்திர பட்டாளமே நடித்துள்ளார்கள். படத்தின் இசை வெளியிட்டு நிகழ்வு சென்னை நேரு உள்விளையாட்டு அரங்கில் நடைபெற்றது. இதில் ரஜினிகாந்த் உள்பட படக்குழுவினர்கள் அனைவரும் பங்கேற்றனர்.

கனவில் கூட நினைத்து பார்க்காத ஒரு விஷயம்

விழாவில் நடிகை மஞ்சு வாரியர் பேசும்போது, "நான் இந்த மேடையில் நிற்பதற்கு, முன் தமிழில் நடித்த இரண்டு படங்கள் காரணம். ஒன்று அசுரன் மற்றொன்று துணிவு தற்பொழுது வேட்டையன். ஜெய் பீம் படத்தை பார்த்து உங்களோடு பணியாற்ற வேண்டுமென மிகவும் ஆசையாக இருந்தது. இந்த வாய்ப்பு கொடுத்ததற்கு நன்றி. என்னை பொறுத்தவரை கனவில் கூட நினைத்து பார்க்காத ஒரு விஷயம் இந்தப் படம். சிறப்பான ஒரு கூட்டணியில் இணைந்து படம் நடிப்பது மிகப் பெரிய சந்தோஷம்.

ஞானவேல் இயக்கத்தில், லைகா தயாரிப்பில், ரஜினியுடன் இணைந்து நடிக்கும் பெரிய வாய்ப்பு கிடைத்திருக்கிறது. என்னுடைய கதாபாத்திரம் உங்களுக்கு பிடிக்கும் என நம்புகிறேன். உங்களைப் போல இந்தப் படத்தை பெரிய திரையில் பார்க்க நானும் மிகுந்த ஆவலாக இருக்கிறேன். உங்கள் ஆதரவுக்கு நன்றி. ரஜினியை நேரில் பார்த்து இன்ஸ்பயர் ஆகி உள்ளேன். வாழ்க்கையில் என்ன யோசித்தாலும், திட்டமிட்டாலும் எது நடக்க வேண்டுமோ அதுதான் நடக்கும். அதை எனக்கு கூறி இருந்ததை மறக்கவே மாட்டேன்.

ரஜினியை நேரில் பார்ப்பேன் என கனவில் கூட நினைக்கவில்லை. ஆனால் தற்போது அவரை நேரில் பார்த்துள்ளேன், படத்தில் நடித்துள்ளேன், நடனம் ஆடியுள்ளேன், என்னால் நம்பவே முடியவில்லை. வேட்டையன் உருவாக என்ன காரணம் இருக்கிறதோ அந்த காரணத்துக்கு நான் நன்றி சொல்கிறேன்.

உங்களை விட அதிகமாக கேட்டு ரசித்து, ஆடியுள்ளோம்

‘மனசிலாயோ’ பாடலுக்கு இந்த அளவுக்கு வரவேற்பு கிடைத்தது மிகவும் சந்தோஷமாக உள்ளது. இதனை நான் எதிர்பார்க்கவில்லை. நீங்கள் எத்தனை மடங்கு இந்த பாடலைக் கேட்டு ரசிக்கிறீர்களோ அதைவிட அதிகமாக நாங்கள் படமாக்கப்பட்டபோது பாடலை கேட்டு, ஆடி மகிழ்ந்தோம்.

தலைவர் ரஜினி நடந்து நடந்து வரும்போதே 500 டான்சர்களும் கைதட்டுவார்கள். அவருடன் பக்கத்தில் உட்கார்ந்து பேசும்போது எல்லாத்தையும் மறந்து பேசுவேன். ரஜினியிடம் நல்ல ஒரு வைப்ரேஷன் உள்ளது. இந்த பாட்டு மூலமாக 500 டான்சர்ஸ் குடும்பத்துக்கு வேலை கிடைத்துள்ளது

நட்சத்திர நடிகர்களுடன் இணைந்து நடிப்பது எனக்கு கிடைத்த பாக்கியம். மக்களுக்கு பிடித்த படங்களில் நடிக்க வேண்டும் என்பது தான் என்னுடைய ஆசை. இந்தப் படத்தில் எல்லா கதாபாத்திரங்களுக்கும் முக்கியத்துவம் கொடுக்கப்பட்டுள்ளது. ஞானவேல் அப்படிப்பட்ட ஒரு இயக்குநர் தான். அவர் மீது எனக்கு முழுமையான நம்பிக்கை உள்ளது” என்றார்.