Tamil Movies: ஜெமினி கணேசன் இயக்குநர் அவதாரம்,ரசிகர்கள் மறக்க முடியாத சிந்து சமவெளி - இன்று வெளியான தமிழ் படங்கள் லிஸ்ட்

செப்டம்பர் 3ஆம் தேதியான இன்று தமிழில் சூப்பர் ஹிட்டான கிளாசிக் படங்கள் வெளியாகியுள்ளன. அதேபோல் சிவாஜி கணேசன், ஜெமினி கணேசன் தவிர டாப் ஹீரோக்களின் படங்கள் இந்த நாளில் வெளியாகவில்லை. 1940களில் இருந்து தற்போது வரை செப்டம்பர் 3இல் வெளியான முக்கிய தமிழ் படங்கள் எவை என்பதை பார்க்கலாம்.

மங்கையர்கரசி

தமிழ் சினிமாவின் சிறந்த கிளாசிக் படங்களில் ஒன்றாக இருப்பது மங்கயரக்கரசி. பி.யு. சின்னப்பா, பி. கண்ணாம்பா, அஞ்சலி தேவி நடித்த இந்த படத்தை ஜித்தன் பேனர்ஜி இயக்கியிருப்பார். தெலுங்கில் வெளியாகி சக்கை போடு போட்ட கோலபாமா என்ற படத்தின் தமிழ் ரீமேக்காக மங்கயர்கரசி உருவாகி தமிழிலும் வெற்றி பெற்றது. தெலுங்கில் நடித்த ரோலில் அஞ்சலி தேவி தமிழ் பதிப்பிலும் நடித்திருப்பார். படத்தின் பி.யு. சின்ன்ப்பா மூன்று ரோலிலும், காமெடியன் என்.எஸ்.கே டபுள் ரோலிலும் நடித்திருப்பார்கள். படத்தின் கண்ணாம்மா நடிப்பு வெகுவாக பேசப்பட்டது. சிறந்த சூப்பர் ஹிட் கிளாசிக் பிளாக் அண்ட் படமான மங்கையர்கரசி வெளியாகி இன்றுடன் 75 ஆண்டுகள் ஆகிறது.

சரஸ்வதி சபதம்

நடிகர் திலகம் சிவாஜி கணேசன் - ஏ.பி. நாகராஜன் கூட்டணியில் வெளியான சிறந்த புராண படம் சரஸ்வதி சபதம். புலமைப்பித்தன் நாவல் வக்கும் வக்கும் என்பதை அடிப்படையாக கொண்ட இந்த படத்தின் திரைக்கதை அமைக்கப்பட்டிருக்கும். படத்தில் சிவாஜி கணேசன், ஜெமினி கணேசன், சாவித்ரி, பத்மினி, தேவிகா, கே.ஆர். விஜயா, நாகேஷ், சிவகுமார், மனோரமா என பெரும் நட்சத்திர பட்டாளமே நடித்திருப்பார்கள்.

கலர் படமான வெளியான சரஸ்வதி சபதம் படத்தில் கே.வி. மகாதேவன் இசையமைப்பில் கோமாதா எங்கள் குலமாதா, கல்வியா செல்வமா வீரமா, தாய் தந்த, ராணி மகராணி போன்ற கிளாசிக் பாடல்கள் இடம்பிடித்துள்ளன. தமிழ் சினிமாவின் முக்கிய புராண படமாக இருந்து வந்த சரஸ்வதி சபதம் வெளியாகி இன்றுடன் 58 ஆண்டுகள் ஆகிறது

நவக்கிரகம்

மறைந்த இயக்குநர் சிகரம் பாலசந்தர் இயக்கத்தில் நாகேஷ் கதையின் நாயகனாக நடித்த படம் நவக்கிரகம். படத்தில் ஸ்ரீகாந்த், ஆர் முத்துராமன், லட்சுமி, ராகிணி, சிவக்குமார், ரமா பிரபா, உள்பட பலரும் நடித்திருப்பார்கள். பிரபல காமெடி நடிகரான ஒய்.ஜி. மகேந்திரனுக்கு இதுதான் அறிமுக படம்.

காமெடி டிராமா பாணியில் உருவாகி நாகேஷுக்கு சூப்பர் ஹிட் படமாக அமைந்த நவக்கிரகம் வெளியாகி இன்றுடன் 54 ஆண்டுகள் ஆகிறது

இதய மலர்

எழுத்தாளர் மணியன் எழுதிய நினைவுகள் நிலைக்கட்டும் என்ற நாவலை அடிப்படையாக கொண்ட காதல் திரைப்படமாக உருவானதுதான் இதயமலர். இந்த படம் மூலம் நடிகர் ஜெமினி கணேசன் இயக்குநர் அவரதாரம் எடுத்தார். இதய மலர்தான் அவர் இயக்கிய ஒரே படமாகவும் உள்ளது.

ஜெமினி கணேசன், செளகார் ஜானகி, சுஜாதா, கமல்ஹாசன் பிரதான கதாபாத்திரங்களில் நடித்திருப்பார்கள். ரசிகர்கள் மத்தியில் வரவேற்பை பெற்ற இந்த படம் வெளியாகி 48 ஆண்டுகள் ஆகிறது

தியாகி

சிவாஜி கணேசன் நடிப்பில் வெளியான பக்கா ஆக்‌ஷன் கமர்ஷியல் படம் தியாகி. சி.வி. ராஜேந்திரன் இயக்கிய இந்த படம் கன்னட படமான அந்தா என்ற படத்தின் ரீமேக்காக உருவானது. சிவாஜியுடன் சுஜாதா, ஸ்ரீபிரியா, கீதா, மேஜர் சுந்தரராஜன், விஜயகுமார் பிரதான கதாபாத்திரங்களில் நடித்திருப்பார்கள்.

சிவாஜி இரட்டை வேடங்களில் நடித்திருந்த இந்த படம் சென்சார் செய்வதில் சிக்கல் ஏற்பட்டது. படத்தில் இடம்பிடித்த வன்முறை காட்சிகளுக்கு ஆட்சோபனை தெரிவிக்கப்பட்டது. இதன் பின்னர் சென்சார் செய்யப்பட்ட வெளியாக சிவாஜிக்கு கமர்ஷியல் ஹிட் கொடுத்த படமாக இருக்கும் தியாகி வெளியாகி இன்றுடன் 42 ஆண்டுகள் ஆகிறது

தலைவாசல்

1990 காலகட்டத்தில் கல்லூரி மாணவர்களின் வாழ்க்கையில் நிகழும் அரசியல் தலையீடு, போதை பழக்கம், வன்முறை திணிப்பு எப்படி நிகழ்கிறது என்பதன் பின்னணியும், அதிலிருந்து மாணவர்களை திசை திருப்பி நல்வழிப்படுத்தும் கல்லூரி முதல்வர் என்ற ஒன்லைனில் கொண்ட கதைதான் தலைவாசல். இயக்குநர் செல்வா முதல் படமான இதில் ஆனந்த், பானு பிரகாஷ், சிவரஞ்சனி, நாசர் உள்பட பலரும் நடித்திருப்பார்கள். குணச்சித்திர கதாபாத்திரங்களில் தற்போது நடித்து வரும் தலைவாசல் விஜய்யின் முதல் படம் இது. கல்லூரி முதல்வராக எஸ்.பி. பாலசுப்பிரமணியம் பிரதான கதாபாத்திரத்தில் நடித்திருப்பார்

வைரமுத்து பாடல்வரிகள் எழுத பால பாரதி இசையமைப்பில் படத்தின் பாடல்கள் நல்ல வரவேற்பை பெற்றன. கல்லூரி மாணவர்களின் வாழ்க்கையை அடிப்படையாக கொண்டு வெளியான ரசிகர்களை கவர்ந்து சூப்பர் ஹிட்டான தலைவாசல் வெளியாகி இன்றுடன் 32 ஆண்டுகள் ஆகிறது

குடைக்குள் மழை

இயக்குநர் பார்த்திபன் இயக்கி, நடித்திருந்த இந்த படத்தில் மதுமிதா, ஸ்ரீமன், தீபா வெங்கட் பிரதான கதாபாத்திரங்களில் நடித்திருப்பார்கள், கமல்ஹாசனின் குணா படம் போல் சைக்கோ த்ரில்லர் பாணியில் உருவாகியிருந்த இந்த படத்துக்கு விமர்சக ரீதியாக பாராட்டுகள் கிடைத்தாலும் பாக்ஸ் ஆபிஸில் தோல்வியை தழுவியது.

கார்த்திக் ராஜா இசையமைத்திருக்கும் இந்த படத்தின் பாடல்கள் ஹிட்டாகியுள்ளன. தனது வித்தியாசமான திரைக்கதை, மேக்கிங் என பார்த்திபன் உருவாக்கிய குடைக்குள் மழை வெளியாகி இன்றுடன் 20 ஆண்டுகள் ஆகிறது.

சிந்து சமவெளி

தமிழ் சினிமா ரசிகர்களால் மறக்க முடியாத படமாக அமைந்திருந்தது சாமி இயக்கத்தில் வெளியான சிந்து சமவெளி. ஹரிஷ் கல்யாண், அமலாபால் ஆகியோருக்கு அறிமுக படமாக இது அமைந்தது. கொழுந்தனார் மீது அண்ணி ஆசைப்படும் கதைகளத்தில் உருவான உயிர் என்ற படத்தை இயக்கி சர்ச்சைக்குள்ளான இயக்குநர் சாமி இந்த படத்தில் மருமகள் மீது மாமனார் ஆசைப்படுவது போல் படத்தை இயக்கி சர்ச்சையை கிளப்பியிருந்தார்.

பாக்ஸ் ஆபிஸில் தோல்வியை சந்தித்த போதிலும், படம் பேசுபொருளானது. சர்ச்சையை கிளப்பிய ஏராடிக் த்ரில்லர் படமான சிந்து சமவெளி வெளியாகி இன்றுடன் 14 ஆண்டுகள் ஆகிறது.

இதே நாளில் ரகசியம், புழல், கல்லூரி காலங்கள், இரண்டு முகம், பலே பாண்டியா போன்ற படங்களும் வெளியாகின.

சமூக வலைத்தளங்களில் எங்களை பின் தொடரலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews

Facebook" https://www.facebook.com/HTTamilNews

You Tube: https://www.youtube.com/@httamil

Google News: https://tamil.hindustantimes.com/