Tamilisai Soundarajan: ’200 சவரன் தங்கம்! டெம்போ ட்ராவலர்!’ முன்னாள் ஆளுநர் தமிழிசை சவுந்தராஜனின் சொத்து மதிப்பு இதோ!

நாடாளுமன்றத் தேர்தலுக்கான வேட்புமனுத்தாக்கல் தொடங்கி நடைபெற்று வரும் நிலையில் தென் சென்னை தொகுதியில் போட்டியிடும் பாஜக வேட்பாளர் தமிழிசை சவுந்தராஜன் தன்னிடம் 200 சவரன் நகையும் டெம்போ ட்ராவலரும் உள்ளதாக தனது வேட்புமனுவில் தெரிவித்துள்ளார். 

தென் சென்னை வேட்பாளர்கள்

தென்சென்னை தொகுதியை பொறுத்தவரை திமுக சார்பில் தமிழச்சி தங்கபாண்டியன், அதிமுக சார்பில் முன்னாள் அமைச்சர் டி.ஜெயக்குமார் மகன் ஜெயவர்தன், பாஜக சார்பில் முன்னாள் ஆளுநர் தமிழிசை சவுந்தராஜன், நாம் தமிழர் கட்சி சார்பில் பேராசிரியர் தமிழ்ச்செல்வி ஆகியோர் போட்டியிடுகின்றனர்.

வேட்புமனுத்தாக்கல்

தமிழகம் மற்றும் புதுச்சேரியில் வரும் ஏப்ரல் 19ஆம் தேதி அன்று ஒரே கட்டமாக நாடாளுமன்றத் தேர்தல் நடைபெறுகிறது. இதற்கான வேட்புமனுத்தாக்கல் மார்ச் 20ஆம் தேதி தொடங்கியது. வேட்புமனு தாக்கல் செய்ய கடைசி நாள் மார்ச் 27 ஆகும். மார்ச் 28ஆம் தேதி வேட்புமனுக்கள் மீதான பரிசீலனை நடைபெறும் நிலையில், வேட்புமனுக்களை திரும்பப் பெற மார்ச் 30ஆம் தேதி கடைசி நாள் ஆகும். பதிவு செய்யப்பட்ட வாக்குகள் வரும் ஜூன் 4ஆம் தேதி எண்ணப்பட்டு அன்றே முடிவுகள் அறிவிக்கப்படுகின்றன.

வேட்புமனுத்தாக்கலில் என்ன இருக்கும்?

வேட்புமனுத்தாக்கல் செய்யும் போது வேட்பாளர் மற்றும் அவரை சேர்ந்த குடும்ப உறுப்பினர்களின் அசையும் மற்றும் அசையா சொத்துக்கள், வங்கி வைப்புத் தொகை, நிறுவனங்களில் வைத்திருக்கும் பரஸ்பர நிதி மற்றும் நிறுவன பங்குகள், காப்பீடு குறித்த விவரங்கள், கடன் பத்திரங்கள், தனிநபருக்கோ அல்லது நிறுவனங்களுக்கோ அளித்துள்ள கடன் விவரங்கள், கடன் வாங்கிய விவரங்கள், மோட்டார் வாகனங்கள் குறித்த விவரங்கள், வேட்பாளர் மீது பதியப்பட்டுள்ள வழக்குகள் ஆகியவற்றை தெரிவிக்க வேண்டும். வேட்புமனுத்தாக்கல் குறித்த விவரங்களை தேர்தல் ஆணையம் தனது அதிகாரப்பூர்வ இணையதளத்தில் மக்கள் பார்வைக்காக வெளியிட்டுள்ளது.

சொத்து மதிப்பு

தன் மீது எந்த கிரிமினல் வழக்கும் இல்லை என கூறி உள்ள தமிழிசை சவுந்தராஜன், தனது பெயரில் ஒரு கோடியே 57 லட்சத்து 40 ஆயிரத்து 286 ரூபாய் மதிப்புள்ள அசையும் சொத்துக்கள் உள்ளதாக கூறி உள்ளார். இதில் 200 சரவன் தங்க நகைகளும், 10 லட்சம் மதிப்புள்ள டைக்னோஜிஸ்டிக் ஆய்வகம் மற்றும் 10 லட்சம் மதிப்புள்ள ஸ்கேனிங் மெஷின், டொயோட்டா ஃபார்டூனர் கார், ஃபோர்ஸ் எஸ்யூவி ரக கார், ஃபோர்ஸ் டெம்போ ட்ராவலர் உள்ளிட்டவை அடங்கும். தனது கணவர் சௌந்தராஜன் பெயரில் 3 கோடியே 92 லட்சம் ரூபாய்க்கு அசையும் சொத்துக்கள் உள்ளதாகவும் தனது வேட்புமனுவில் தமிழிசை சவுந்தராஜன் குறிப்பிட்டுள்ளார். 

அசையா சொத்துக்களை பொறுத்தவரை, தனது பெயரில் 60 லட்சம் மதிப்புள்ள அசையா சொத்துக்களூம், தனது கணவர் சௌந்தராஜன் பெயரில், 13 கோடியே 70 லட்சம் மதிப்புள்ள அசையா சொத்துக்களும் உள்ளதாக கூறி உள்ளார். அரசிடம் செல்லுத்த வேண்டிய வரி பாக்கியோ நிலுவைத் தொகையோ ஏதுமில்லை என்றும் தமிழிசை குறிப்பிட்டுள்ளார்.

இதில் தன்னிடம் வேளண் நிலமோ அல்லது வேளாண் அல்லாத நிலமோ ஏதும் இல்லை என தெரிவித்துள்ள தமிழிசை, திருவள்ளூர் மாவட்டம் மணலியில் தனது பெயரில் ஒரு குடியிருப்பு உள்ளதாக கூறி உள்ளார்.