World Cup 2023: தென் ஆப்பரிக்கா பேட்டர்களை அடுத்தடுத்து பெவிலியனுக்கு அனுப்பிய ஜடேஜா! 243 ரன்களில் இந்தியா வெற்றி

உலகக் கோப்பை 2023 தொடரின் 37வது போட்டி இந்தியா - தென் ஆப்பரிக்கா அணிகளுக்கு இடையே கொல்கத்தாவில் ஈடன் கார்டன் மைதானத்தில் இன்று நடைபெற்றது. இதில் டாஸ் வென்ற இந்திய அணி கேப்டன் ரோஹித் ஷர்மா பேட்டிங்கை தேர்வு செய்தது.

இதையடுத்து முதலில் பேட் செய்த இந்திய அணி 50 ஓவரில் 5 விக்கெட் இழப்புக்கு 326 அடித்தது. விராட் கோலி தனது பிறந்தநாளான இன்று ஒரு நாள் போட்டியில் தனது 49வது சதத்தை பூர்த்தி செய்தார். இதன் மூலம் ஒரு நாள் போட்டிகளில் அதிக சதம் அடித்தவர்களில் சச்சினின் சாதனையை சமன் செய்தார். 101 ரன்கள் எடுத்த அவர் கடைசி வரை ஆட்டமிழக்காமல் உள்ளார்.

ஷ்ரேயாஸ் ஐயர் அரைசதமடித்து 77 ரன்கள் எடுத்தார். ஜடேஜா கடைசி கட்டத்தில் அதிரடி காட்டி 29 ரன்கள் அடித்து அவுட்டாகாமல் இருந்தார். தென் ஆப்பரிக்கா பவுலர்களில் இங்கிடி, ஜான்சன், கேசவ் மகாராஜ், ஷம்ஸி ஆகியோர் தலா ஒரு விக்கெட்டை வீழ்த்தினர்.

தென் ஆப்பரிக்கா அணி புள்ளிப்பட்டியலில் முதல் இடத்தை பிடிக்க 327 ரன்களை சேஸ் செய்ய வேண்டும் என்ற நிலையில் களமிறங்கியது. இதைத்தொடர்ந்து இந்தியாவின் அசத்தலான பவுலிங்கை தாக்குபிடிக்க முடியாமல் 27.1 ஓவரில் 83 ரன்கள் எடுத்து ஆல்அவுட்டாகியுள்ளது. இதந் மூலம் 243 ரன்கள் வித்தியாசத்தில் மிகப் பெரிய வெற்றியை பெற்றுள்ளது.

தனது ஸ்பின் பவுலிங்கால் தென் ஆப்பரிக்கா பேட்ஸ்மேன்களை மிரட்டிய ஜடேஜா 5 விக்கெட்டுகளை வீழ்த்தினார். முகமது ஷமி, குல்தீப் யாதவ் ஆகியோர் 2 விக்கெட்டை எடுத்தனர். முகமது சிராஜ் ஒரு விக்கெட்டை எடுத்துள்ளார்.

உலகக் கோப்பை 2023 தொடரில் விளையாடிய 8 போட்டிகளிலும் வெற்றி பெற்று, தோல்வியை சந்திக்காத அணியாக இருந்து வருகிறது. பிறந்தநாளில் சாதனை சதமடித்த விராட் கோலி ஆட்ட நாயகன் விருதை வென்றார்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil  

Google News: https://bit.ly/3onGqm9