Hardik pandya: காயத்தால் ஆஸ்திரேலியா, தென் ஆப்பரிக்கா தொடரிலிருந்து விலகும் பாண்ட்யா! யார் கேப்டன்?

உலகக் கோப்பை 2023 தொடரில் இந்திய அணியின் முக்கிய ஆல்ரவுண்டராக இருந்து வந்தவர் ஹர்திக் பாண்ட்யா. வங்கதேசத்துக்கு எதிரான போட்டியில் பவுலிங் செய்தபோது கணுக்காலில் காயமடைந்தார். இதையடுத்து அவருக்கு ஓய்வு அளிக்கப்பட்ட நிலையில், சூர்யகுமார் யாதவ் அணியில் சேர்க்கப்பட்டார்.

இந்த உலகக் கோப்பை தொடரில் 4 போட்டிகளில் விளையாடி பாண்ட்யாவுக்கு ஒரேயொரு முறை மட்டும் பேட்டிங் செய்ய வாய்ப்பு கிடைத்தது. அதில் 11 ரன்கள் அடித்து நாட்அவுட் பேட்ஸ்மேனாக இருந்தார். அனைத்து போட்டிகளிலும் பவுலிங் செய்த பாண்ட்யா 5 விக்கெட்டுகளை கைப்பற்றியதுடன், கேட்ச் ஒன்றும் பிடித்துள்ளார்.

பாண்ட்யாவுக்கு காயத்தின் தீவிரம் அதிகரித்த நிலையில் உலகக் கோப்பை 2023 தொடரிலிருந்து விலகினார். இருப்பினும் இந்திய அணி குழுவிலிருந்து வெளியேறாமல் தொடர்ந்து அணிக்கு தனது ஆதரவை வெளிப்படுத்தி வருகிறார்.

இதையடுத்து உலகக் கோப்பை தொடர் முடிந்த பின்னர் ஆஸ்திரேலியா மற்றும் தென் ஆப்பிரிக்கா அணிகளுக்கு எதிராக ஒரு நாள், டி20 தொடர்களில் இந்தியா விளையாட உள்ளது. இந்த இரு தொடர்களிலிருந்தும் ஹர்திக் பாண்ட்யா விலகியுள்ளதாக தகவல்கள் வெளியாகியுள்ளன.

அவருக்கு ஏற்பட்டிருக்கும் கணுக்கால் காயம் குணமாவதற்கு குறைந்து, முழு பிட்னஸ் பெற்று விளையாடுவதற்கு குறைந்தது இரண்டு மாதங்கள் ஆகும் என கூறப்படுகிறது. இதனால் அவர் ஆஸ்திரேலியாவுக்கு எதிராக சொந்த மண்ணில் நடக்கவிருக்கும் டி20 தொடர், தென் ஆப்பிரிக்காவில் மூன்று ஒருநாள் போட்டிகளில் இருந்து விலகி உள்ளார்

ஆஸ்திரேலியாவுக்கு எதிராக ஐந்து டி20 போட்டிகளில் இந்திய அணி விளையாடவுள்ளது. இந்த தொடர் வரும் 23ஆம் தேதி விசாகப்பட்டினத்தில் தொடங்குகிறது.

இந்த தொடர் முடிவடைந்த பின்னர் இந்திய அணி தென் ஆப்பிரிக்காவுக்கு சுற்றுப்பயணம் சென்று, மூன்று டி20, மூன்று ஒருநாள் போட்டிகளில் பங்கேற்கிறது. ஹர்திக் பாண்ட்யா இல்லாத நிலையிலும், சீனியர் வீரர்களுக்கு ஓய்வு அளிக்கப்படும்பட்சத்திலும் இந்திய டி20 அணிக்கு சூர்யகுமார் யாதவ் அல்லது ருதுராஜ் கெய்க்வாட் கேப்டனாக நியமிக்கப்படலாம் என கூறப்படுகிறது.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9