World Cup 2023: இலங்கையை விரட்டியடித்த வங்கதேசம் - 3 விக்கெட் வித்தியாசத்தில் வங்கதேசம் அபார வெற்றி

உலகக் கோப்பைப் போட்டியில் வங்கதேசம் அணி இலங்கையை 3 விக்கெட்டுகள் வித்தியாசத்தில் வீழ்த்தி வெற்றிபெற்றுள்ளது. 

உலகக் கோப்பைத் தொடரின் 38வது போட்டி வங்கதேசம் - இலங்கை அணிகளுக்கு இடையே டெல்லியில் நடைபெற்றது. பகலிரவு ஆட்டமாக அருண் ஜெட்லி மைதானத்தில் மதியம் 2 மணிக்கு தொடங்கியது.

டாஸ் வென்ற வங்கதேசம், இலங்கையை பேட்டிங் செய்ய பணித்தது. இதையடுத்து முதலில் இலங்கை அணி பேட்டிங் செய்தது. அந்த அணி 49.3 ஓவர்களில் அனைத்து விக்கெட்டுகளையும் இழந்து 279 ரன்களை எடுத்தது. தொடக்க ஆட்டக்காரராக பதும் நிசங்கா களம் புகுந்தார். அவர் 41 ரன்கள் விளாசினார். எனினும் அரை சதம் பதிவு செய்வதற்குள் துரதிர்ஷ்டவசமாக ஆட்டமிழந்தார். குசால் பெரேரா 4 ரன்களிலும், கேப்டன் குசால் மெண்டிஸ் 19 ரன்களிலும் நடையைக் கட்டினர்.

பின்னர் வந்த சதீரா சமரவிக்ரமா 41 ரன்கள் விளாசி அணியின் ஸ்கோரை கணிசமாக உயர்த்த உதவினார். மறுபக்கம் சரித் அசலங்கா நிதானமாக விளையாடி பின்னர் விஸ்வரூபம் எடுத்தார். அவர் அதிரடியாக ஆடி சதம் பதிவு செய்தார். 105 பந்துகளில் 6 பவுண்டரிகள், 5 சிக்ஸர்கள் விளாசி 108 ரன்கள் எடுத்திருந்தபோது தன்ஸிம் பந்துவீச்சில் லிட்டன் தாஸிடம் கேட்ச் ஆனார். தனஞ்செய டி சில்வா 34 ரன்களிலும், மஹீஷ் தீக்ஷனா 22 ரன்களிலும் ஆட்டமிழந்தனர். 10 ஓவர்கள் வீசி 3 விக்கெட்டுகள் வீழ்த்தினார் தன்ஸிம். வங்கதேச கேப்டன் ஷாஹிப் அல் ஹசன் 2 விக்கெட்டுகளை சாய்த்தார்.

இதைத்தொடர்ந்து 280 ரன்கள் எடுத்தால் வெற்றி என்ற இலக்குடன் களமிறங்கியது வங்கதேச அணி. அந்த அணியின் தொடக்க ஆட்டக்காரர்களான தன்ஸித் ஹசன், இலங்கைவீரர் மதுஷங்கா பந்தில் 9 ரன்கள் மட்டுமே எடுத்தே நிலையில் கேட்ச் கொடுத்து அவுட்டானார். பின் வந்த லிட்டன் தாஸும் மதுஷங்காவின் பந்துவீச்சில் வெறும் 23 ரன்கள் மட்டுமே எடுத்த நிலையில் எல்.பி.டபிள்யூ ஆனார். அதைத் தொடர்ந்து வந்த வங்கதேச வீரர் நஜ்மஸ் ஹூசைன் சண்டோ நிதானமாக ஆடி அணியின் ஸ்கோரை உயர்த்தினார். அவர் 90 ரன்கள் எடுத்தபோது, மேத்யூஸ்ஸின் பந்தில் கிளீன்போல்டானார். அதனைத் தொடர்ந்து வங்கதேச கேப்டன் ஷாஹிப் அல் ஹசன் பொறுமையாக ஆடி 82 ரன்களைக் குவித்தார். அவரும் மேத்யூஸின் பந்தில் கேட்ச் கொடுத்து அவுட்டானார். அதனைத்தொடர்ந்து வந்த வீரர்கள் சொற்ப ரன்களில் அவுட்டாகினர். இறுதியாக வங்கதேச அணி தன்ஸிம் ஹசன் ஷாஹிப்பும், தவ்ஹீத் ஹிர்டாயும் பார்ண்டர்ஷிப் போட்டு விளையாண்டு, 41.1 ஓவர்களில் 7 விக்கெட் இழப்புக்கு 282 ரன்களை எடுத்தனர். இதன்மூலம் மூன்று விக்கெட் வித்தியாசத்தில் இலங்கையை வீழ்த்தி வங்கதேசம் அபாரவெற்றிபெற்றது. இத்தோல்வியின் மூலம் உலகக்கோப்பைத் தொடரில் இருந்து வெளியேறியது, இலங்கை அணி.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews  

https://www.youtube.com/@httamil 

Google News: https://bit.ly/3onGqm9 

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், ஆன்மிகம், புகைப்பட கேலரி, வெப் ஸ்டோரி, வேலைவாய்ப்பு தகவல்கள், சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.